2Korɛntea 8 - BII BILA

La yɔngu Hala a kɔlta niaalan kpow

¹ Puapilɛa naa, sunsun, n yeema mì la sínà mɛɛ kɛndɛi Hala-e i yɔŋnun vanaa laalannda tɛɛn Maseduan yɛ.

² Vanaa laalannda sɔla tɔɔndanndan o sangalan nin-ndon, kɛ a kon kpow a va a kɔlkɛndɔɔ taw. A bala fondola bɛndula va nda lan kpede, a va yɔngoo a kɔlta ndalan kpow.

³ Má yɔngu mɛɛ sɔla ndaa va yɛ, má hiaw bɛɛ o kon coo, i co lesei. Nduyɛ nda pila va yɔngoo lende ni.

⁴ Má baŋnun naa ɲunaa, maa n sɔɔnguu, mì n sɔɔ laba le vanaa diandaa malaa.

⁵ Nda pila fɔlɔn aa yɔngun Mɛlɛka ni, o kon kɔɔli má yɔngun le naa o kɛndɛi Hala-e bɛngu.

⁶ Lelan naa n tɛɛlun Tite ni, mò kɔɛ o niaa lo, mò kɔ hiow laci a vali kɛndɔɔ ho tosaa mɛɛ o kandu ndu yɛ.

⁷ Dɛnndan kpow la co niaa o ba, laalanndo, sɔɛi cai, dɛnɛ sinaa, kindinndo a kaola niaa nɔ le naa-o. La hiow vɛlɛ laci a dɛnɛ kɛndɔɔ ho tosaa.

⁸ Sɔɛi ya co hee dimio-e, o co mì baŋ niaa le ndi tosa le, kɛ le cɔmndo mɛɛ vanaa celen a co kindinndo yɛ, le kaola kpeekpei niaa nɔ-o sinaa.

⁹ Kani la sínà kɛndɛi Maalii naa Yeesu Krista yɔŋ le niaa-e, ndu vana bolofaa, mó siŋnun vana bala fondoo, haliko mi la siŋnun vanaa bolofaa o bala fondola ndɔlan kɔɔli.

¹⁰ Yiyan nuu co hoo le niaa o sɔɛi he nin ni: o bɛnda bɔɔ mi la hiow laci. Niaa yɔŋnun vanaa tasea tapɔm le cuungiaa ho yɔngoo ni. Ɛ̀ɛ̀ nduyɛ, mí la tosa kon a kɔlta niaalan kpede.

¹¹ Lelan sunsun, la siow vali kon tosa. Yeemɛi bii niaa taw le ndu siowvo mɛɛ ndíì bii niaa o ndu kandɔɔ yɛ. La tosà kon mɛɛ ɲɛ-sɔlaa niaa co yɛ.

¹² Kani te vanndo nɔ pɛ yeemɛi le yɔngoo, Hala cɛl mɛɛ sɔla vana kon co yɛ, kɛ o ve mɛɛ sɔla ndɔ co le yɛ le.

¹³ N nɔ yiyan mì la mala caanda, mì niaa pila koma lo bala fondo le, kɛ n yeema mì kpen-kpenndo va.

¹⁴ Telen niaa niaa nɔ hoo-o, la soli nda o bahavɛiyo nin, o kon telen nda bɛɛ a sɔlanin-ndo, a solinin niaa o bahavɛiyo nin. Ken tosanin ni mì kpen-kpenndo va,

¹⁵ maa mɛɛ o co o sɛvaa yɛ aa: «Vana cuungiaa hoo taw-vo, o co mò nɔ mò hiow caanda le, vana cuungiaa ɲɛ-pɔmbɔ-o bɛɛ, ɲɛ ve ndu lepɛŋ te.»

Tite a vanaa va ndu kɔɔli-a kɔɛ Korɛnte

¹⁶ I mel Hala balika le tùú o luei Tite yiyanndo o kɔl le niaa malaa mɛɛ ya nɔ yiyanndo le niaa malaa yɛ,

¹⁷ kani o cɛl o naa n ɲuna ndu-o a kɔl ndɔɔ kpow. Ndu pila kpeekpei tuu le kɔlan o niaa lo ni.

¹⁸ N co puapilɛ naa vana laalanndo pilɛ vomɔɔ nda ndu, o vanaa laalannda kpow a co candɔɔ le baala o co tosaa-o-o, Yoongu kɛndɛ Hala-o vannda tiiyallo pɛɛn.

¹⁹ Handɔɔ o kon coo, a cii ndu hɛli le naa liilaa le vali kɛndɔɔ ho tosaa, o naa n nɔ mì n tosa, mì vannda biilu Maalii pila-o. O kon mì n cɔm vɛlɛ mɛɛ naa n nɔ yeemɛi le ndu tosaa-e.

²⁰ N yeema mì vana-vana soo sɔɔn pɔmbɔ le cuungiaa bɛndu naa n co kon biyɔɔ-o le.

²¹ Kani n yeema mì n tosa dɛnɛ sandaa Mɛlɛka o hɔl daama le, kɛ vanndacieea kpow bɛɛ o hɔl.

²² Handɔɔ o kon coo, n co puapilɛ naa pilɛ vomɔɔ nda ndaa. N soli ndu kɔlɔ o dɛnndan taw nin, mí n ca maa o co a ɲaaloo lɔ́ɔ́-lɔ́ɔ̀. Kɛ sunsun, ɲaale ndɔɔ cɔɔlun le laalan o laalan niaa taw-vo.

²³ Le Tite yɛ, ndu co vana liila ya-o a vana naa n co baala pilɔɔ tosaa-o ni. Puapilɛa tɔ̀a co kɔlan nda ndaa-a yɛ, vanaa kundala vanaa laalannda vem-nda nda co ni. Le biilu Krista-o nda co baalaa ni.

²⁴ Lelan, la cɔm nda kaola kpeekpeiyo a kɔlɔ naa n co yongaa sɔɛi a niaa o kɔɔ-o, o kon mì kundala vanaa laalannda ce.