2Korɛntea 6 - BII BILA

¹ Lelan, naa co vallo a Hala diom pilɛ-a, n co niaa tɛɛlɔn, la cɛ̀l mì kɛndɛi niaa sɔla Hala o ba-e i tambun fúú le.

² Kani o dimi aa: «O telen kɛndɔɔ, mí mulul nɔm, o paale cindaa len coo, mí mala nɔm.» Má cè niko telen niaa bɛnda mì la cɛl dɛnɛ kɛndɛ Hala-o o! Má cè niko paale cindaa len!

³ N yeema mì vali naa tambu labɛɛ le, lelan, ɲɛ-ɲɛ tosa mò luei vanndo o pɔwlan nin, n tosan kon te.

⁴ Kɛ o dɛnndan nin kpow, n co vannda cɔmndo maa vanaa baalaa Hala-a lekɛ́ndɛi naa n co ni: n co sangalan biwnɔnndo taw, sɔɔn imɔnɔn a sɔɔn yɔngu vana buulannda bɛndulan-ndon.

⁵ Vannda lɔɔ naa, má mal naa o kaasoolan. Mí vanaa pum a del naa coo. N tosa baalala kálà-kálàlan, má lɔli naa lahɔl, má tuŋ naa ɲɛdiaa.

⁶ N co cɔmndo maa vanaa baalaa Hala-a naa n co ni: a diondɔɔ naa n dendu-o, dɛnɛ sinaa naa, biuvɔnndo naa, vili naa kɛndɔɔ, Kɔl-Diandaa co naa vallo nin-ndo, a o kaola kpeekpei naa n nɔ-o nin,

⁷ a sɔɔn toɲan vannda dimullo a o kpaaya Hala-o nin. A sɔɔn dɛnɛ sandan naa n co vannda cɔlɔbaa ni, mì n va vɛlɛ cɛvɔnndo a mun.

⁸ Vannda co naa bɛɛlen keo, mà va naa bɛ̀ɛ̀lan tɛɛmbuuo. A co sɔɔn vɔɔnndon dimio a naa o kɔɔ, mà va sɔɔn naan kɛndɔn dimio. A co naa cɔw vanaa lacòòvaa, nduyɛ toɲaa naa n co nda dimullo ni.

⁹ A co yiyanndo maa vannda sínà naa le, kɛ nduyɛ a sínà naa válán, a co naa cɔw maa vanaa vílɛ́i, kɛ nduyɛ n co yoomu ɲɛkɛndɛi. A co naa sangaa tuisio coo, kɛ nduyɛ a co naa diw le.

¹⁰ A co naa kɔltan tɛɛmbuuo, kɛ nduyɛ n co a ɲaaloo lɔ́ɔ́-lɔ́ɔ̀. N co maa vanaa kɔɛi bɛndu, kɛ nduyɛ n co vannda tɔnɔɔ looloo, n co maa vanaa lepɛŋ, kɛ nduyɛ, ɲɔɔn kpow n co naa o ba.

¹¹ Caaŋaa naa Korɛnte, kpendekele naa n soo o niaa lo ni, mí n kumbil niaa kɔlta naalan kpow.

¹² N kɛɛ niaa kaola naa cɔm te, kɛ mí la kindal naa kɔlta niaalan.

¹³ Maa mɛɛ ya sɔaa o cuavaa nia lo yɛ, lende ya co sɔɛi o niaa lo ni. La kumbil naa kɔltan mɛɛ naa n kumbil niaa la naalan yɛ.

Silaa le manndanndo a vanaa co vanaa laalan te-a o kɔɔ

¹⁴ La luei bollen o yɔm lebol pilɔɔ bɛngu niaa vanaa laalan te-a le. Kani ɔ́ɔ̀ bɛnda co ɲɛ sandu-o a ɲɛ sendu loo tɛɛn-ndo? Ɔ́ɔ̀ canyɛi co ɲɛ-tengaa a ɲumndan tɛɛn-nde?

¹⁵ Ɔ́ɔ̀ bɛnda co Krista nda Setana tɛɛn-ndo? Te kon te ɔ́ɔ̀ bɛnda co vana laalanndo nda vana co vana laalan too tɛɛn-ndo?

¹⁶ Ɔ́ɔ̀ bɛnda co Cɛi-Hala-o nda piɔmnda tɛɛn-ndo? Kani naa co Cɛi-Hala kiyɛiyo ni, maa mɛɛ Hala pila dimi yɛ aa: «I vanin niaa tɛɛn, mì kela niaa tɛɛn, i vanin Hala niaa mì niaa va cuavaa nia.»

¹⁷ Lelan Mɛlɛka dimi ni aa: «La fula nda tɛɛn, mì la sɛyan niaa ndaa. Ɲɛ-ɲɛ co ɲɛ nɔɔlɛiyo, la pilan ndu le! O kon, i cɛlnin niaa.

¹⁸ I vanin Fuɲa nia, mì niaa va poaa niaa a cuavaa nia.» Mɛlɛka nɔ kpaayaa kpow-vo dimi lende ni.