2Korɛntea 4 - BII BILA

Ɲɛ-sɔlaa kɔl co o mandaa o kpɛɛnɛi puulei nin-ndo

¹ Lelan, le tùú Mɛlɛka tuinun naa iɲíí, mó ke naa vallo ho le tosaa-o, n vunnun n'dial te.

² Kani n kɛɛ dɛnnda lasiɛmbula co tosanndo o vionnɔnndo nin-ndan. N co kɔlkalu vɔɔn tosa o dɛnndan nin te, n co vɛlɛ sɔɛi Hala tundɔɔ le. N co vannda toɲa kpeikpeiyo cɔmndo, mì n va kindinndo haliko ma laalan naa Hala o hɔl.

³ Te Yoongu kɛndɛ naa co vɔ pɛ o viannanndo, mɛɛ le vanaa co kɔlan o lou nin-nda o co lende ni,

⁴ le vanaa laalan te-a, a Setana masa ceendo ho suumiaa kan kɔltan-nda pɛɛn, yɔŋii nda cɔ ɲɛ vavonndo, o co Yoongu kɛndɛ biilu Krista-o-o, Krista co velan Hala-o o.

⁵ O co yoongu naa pila le naa n co yondaa le, kɛ yoongu Maalii Yeesu Krista-o naa n co dimio ni. Nduyɛ le Yeesu naa n co vanaa baalaa niaa ni.

⁶ Kani Hala dimi aa: «Ɲɛ-tengaa vanin ɲumndan teengiaa». Nduyɛ, ndu yɔngu naa pangeloo o lakɔl le biilu ndɔɔ sinaa ni, biilu co diondɔɔ Krista o hɔl-lo.

⁷ Kɛ naa nɔ ɲɛ-sɔlaa kɔl kon-nda co macoaa maa kpɛɛnɛn puulu. Haliko mi vana sínà maa Hala o ba kpaaya bɛndu kon fula ni, o co naa o ba le.

⁸ Vannda co naa sangala súú-súù ka tuisio coo, kɛ n co bɛwviaa le. N co o kɔndɔfillo nin, kɛ kɔlkɛsiaa co naa lepɛŋ te.

⁹ A co naa yɛlen tollo, kɛ Hala co naa malɔɔ le. A co naa kpuviaa, kɛ a co naa diw le.

¹⁰ N co kelaa lɔ́ɔ́-lɔ́ɔ̀ a piɔ́m Yeesu-o naa o n'dial, haliko mi yoomu ndɔɔ cɔmnun naa o n'dial.

¹¹ A co naa n co hoo yoomu-o kpede, n co o piɔ́mndo hɔl-ndɔ le Yeesu, haliko mi yoomu ndɔɔ cɔmnun o dialun naan n co hunɔɔ vu-on nin.

¹² Le hee, piɔ́mndo co naa baalaa o n'dial, haliko mi yoomoo tosa niaa koni baalaa o n'dial.

¹³ Nduyɛ, o co o sɛvaa aa: «I laalan, lelan ya soo ni.» Lende koni, naa bɛɛ, n laalan, lelan naa n co sɔɛi ni.

¹⁴ Kani n sínà maa Hala mingi Maalii Yeesu yoomu fulaa vanvílɛ́iya tɛɛn. O minginin naa vɛlɛ yoomu naa Yeesu-a, o kon kɔɔli mò kɔɛ a naa kpow o ndu lo.

¹⁵ Le dɛnɛ niaa kɛndɔɔ sɔɔn mun kpow n co yɔŋnɔnndo ni. Haliko mi kɛndɛi Hala-e kui, mì vannda taw mal balikaa le Hala biiloo.

La laalan mì la va yoomu

¹⁶ Lelan, n vunnun n'dial te. Dialun naan ivanacieeyan n va bɛɛ tambei o pɔm-pɔmbɔ, kɔl naa ndu bɛnda mò va muungoo o sɛnɛi lepalaa-lepala.

¹⁷ Kani sanga bɛndu co naa hoo coo sunsun-ndo co ɲɛ-ɲɛ le, nduyɛ le telen bingi koni o co ni. O co naa pɔɔ bɛɛndiaa le biilu naa hun sɔlanin-ndo. Biilu kon vanin le fɛɛn a fɛɛn, ndu hiawnin vaa o bɔɔ a sangaa ho.

¹⁸ Lelan, o co ɲɛm naa n co mun cɔw-von te naa n co tofa le, kɛ ɲɛm vana ci loon. Kani ɲɛm vana ca-on mun, le telen bingi koni n co ni, kɛ n vana ci loon mun co le lɔ́ɔ́-lɔ́ɔ̀.