2Korɛntea 12 - BII BILA

Vunduan a cɔmnɔn Mɛlɛka cɔmnun Pol-lo

¹ Mɛɛ mì ya pila i kuundian, hali mì sɔla tɔnɔ o kuundian kon nin te. Sunsun, i co hunɔɔ isɔɔ a vunduma ya ce-an a á cɔmnɔn Mɛlɛka cɔmnun ya-o o kɔɔ.

² I sínà langbanɔ pilɛ o Krista nin, o co nin le vɔsilan tɔ́ a lahiɔɔlu, mó hel o halataalaa nin coo di. (I sínà le te o falon nin ndóò hel lende lekɛ́ndɛi ni, te kon te o vundulen nin, Hala ndu pilɛ kpé sínà ken ni.)

^3-4 I sínà maa mí langbanɔ kalaa ndóò hel háá o haliyɛɛnɛ di (kɛ mì cɔɔlu dimi, i sínà le te o falon nin ni, te kon te vundulen yáà ce lende ni, Hala ndu pilɛ kpé sínà ken ni), mó kɔ tuɛi sɔɔn kaaman vanaciee nɔla dimi loon, sɔɔn vanaciee cɛl mò mingi sondo coo loon.

⁵ Le vana vaa lende, i nɔla mì kuundian, kɛ le ya pila yɛ, a yoomuma nima lepɛŋndan o kɔɔ ya kuundiannin ni.

⁶ Hali yáà yeema bɛɛ le kuundianndo, yáà venin diɔm te, kani toɲaa yáà diminin ni. Kɛ i co kuundian te, yɔŋii vana cɔ ya o bɛndu hiovɔɔ ɲɛ ya co tosaa-o coo, te kon te mà ce ya mɛɛ vannda a co tueyɔɔ a ya o kɔɔ-e coo.

⁷ Kɛ nduyɛ, yɔŋii yongaa piɔ ya nin ca le kaamaala bɛndula ya ce o vunduan nin-ndan, mí sɔla sangaa o falon nin taw vana ca ko aa mɛlɛkanɔ Setana-o hun lɔɔ ya le ya kuunaa yɔŋii yongaa piɔ ya o n'dial ni.

⁸ Mí piɛi Mɛlɛka bɛmbɛ leyáá le ya solio o sanga kon nin.

⁹ Kɛ mó dimul-la aa: «Kɛndɛi nii tiw nɔm. Kani o yoomuma lepɛŋndan nin kpaaya nuu cɔmnùn ni.» Lelan, o co fisa mì kuundian o yoomuma nima lepɛŋndan nin, haliko mi kpaaya Krista-o va ya coo.

¹⁰ Lelan i dɔwnun ɲaale le kpaaya lepɛŋndo, le yeowla vannda co ya lan, le ɲɛm nda co ya tuŋɔɔ-on, le yɛle nda co ya tollo-len, a le sangala co ya coo le Krista lan. Kani telen ya nɔ mayoomu loo, telen kon ya sɔlà kpaayaa ni.

Pol cɔm buulan ndɔɔ le vanaa laalannda Korɛnte

¹¹ Maa vana kindu kɔl too ya va sɔɛi ni, kɛ niaa yɔŋ ken ni. Nduyɛ, oo bɛnda mì niáà soo le ya. Kani o va bɛɛ aa i co ɲɛ-ɲɛ le, i hiw kiilaa niaa latɔ́ɔ́-tɔ́ɔ́a dɔɔnanndo le.

¹² La ce biuvɔn nuu o dɛnnda cɔm maa kiilanɔɔ ya co ni lan niaa tɛɛn, lan la yɔŋnun tɔɔmaselelan, dɛnnda kɔndɔfiltan a kaamaalan ni.

¹³ Vɛ̀ɛ̀ kundala vanaa laalaŋaa tɔ̀a hiow yɛ tɔnɔɔ sɔla a niaa? Mɛɛ le kɛɛ ya kɛɛ siŋnɔn volɔɔ le niaa-o dɛ? Te lende yɛ ni, mɛɛ la mal-la haki le dɛnɛ sandaa lepɛŋ kon!

¹⁴ I cii nin bɛɛndian le niaa kɔlan yilɔɔ, kɔla yàándɔlan la vanin ndan ni. I venin o ba vana bɛngu le. Kani o co bolofaa niaa le ya co nuwviaa le, kɛ niaa pila. Kani, o co cuawva le a cuungiaa volion le kala-ncuawva le, kɛ kala-ncuawva a cuungiaa mun le cuavaa ndaa ni.

¹⁵ Lelan, ɲaaloo co ya o kɔl taw, mì pisi ɲɛ-ɲɛ ya nɔ le niaa, hali ya pila i pisin bɛɛ le yoomula niaalan. Te i kaola niaa pɛ kaola vaa lende, vɛ̀ɛ̀ mì niaa kaola ya ɲɛ-pɔmbɔ?

¹⁶ O va bɛɛ maa i siŋnun volɔɔ le niaa le. Kɛ hali a kon, la co cɔu maa i nɔ kɔlkalu vɔɔndo, maa a kɔlkalu vɔɔn kon ya bii niaa ni.

¹⁷ Vɛ̀ɛ̀ delɔɔ ya del niaa coo ni? Vɛ̀ɛ̀ vana pilɛ o vanaa ya vem o niaa lo-a tɛɛn de niaa balan ni?

¹⁸ I tɛɛlun Tite le kɔlan o niaa lo mí viam puapilɛ naa pum nda ndu. Vɛ̀ɛ̀ delɔɔ Tite del niaa coo ni? Vɛ̀ɛ̀ o co a yiyan pilɔɔ le naa n kela le? Vɛ̀ɛ̀ o co o foofola pilɛlan coo le naa n kɔɛ le?

¹⁹ O co nin lɔ́ɔ́ levil, la co yiyanndo maa le naa pila naa n co kindinndo ni. O Krista nin naa n co sɔɛi Hala o hɔl ni. Caaŋaa naa naa n kaolaa-a, le mɛɛ niaa hiaw laci o laalanndo nin yɛ naa n co kon kpow tosaa ni.

²⁰ Nduyɛ, buulanndo co ya, kani lɔ́ɔ́ ya tiiyanin lon-ndo, ko i komalnin pá niaa mɛɛ ya yeema yɛ mi niaa bɛɛ ce ya mɛɛ niaa yeema le ya cɔu yɛ. I co buulanndo, ko sɛɛngianndan ya komalnin niaa tɛɛn ni, ko paŋalianndan ni, ko kɔltuwvo ni. Te kon te, yevanndan, diolan vannda tɛɛmbuuo, congulan, kelaa a vannda o lasonndo, yongaa te kon te sɔngɔlan.

²¹ I co buulanndo, lɔ́ɔ́ ya kɔanin vɛlɛ niaa yilɔɔ-o, mì Hala tosa mì siɛmbulan la bii ya vɛlɛ le niaa, yɔŋii ya caŋ le vanaa kan, a tosa hakilan o tasendɔ taw, mà va hiovɔɔ laci-a. A kɛɛ kan le dɛnnda nɔɔlɛilan, suundaa a yeemɛi vɔɔnde malɔɔ-a.