2Korɛntea 11 - BII BILA

Pol nda kiilaa lacòòvaa

¹ Àá! Te niáà cɛl pɛ mì niáà biwnun diɔmii nii ɲɛ-pɔmbɔ. Nduyɛ, lekɛ́ndɛi, la co ya biwnɔnndo.

² I kaola niaa mì va paŋalaa le niaa, Hala o ba kon co fulaa ni. Kani i dɔw niaa fulu le vanapɔnɔɔ ndu pilɛ kpé, Krista pɛɛn, haliko mi la kɔ fula ndu o hɔl maa felengi sina vɔ dɛnɛ vanapɔnɔ loo, o dendu Mɛlɛka o hɔl-lo pɛɛn.

³ Nduyɛ, siòònde co ya yɔŋii yiyannda niaalan la luei niaa o pɔwlan nin, mì la faŋa niaa Krista o ibuŋ maa mɛɛ kɛwvo luei Hawa o pɔwlan nin a kɔlkalu vɔɔndo yɛ.

⁴ Kani vana pum co hunɔɔ o niaa lo, mò hun dimul niaa sɔɛi Yeesu celen, Yeesu o naa n dimul niaa sɔɛi ndɔ loo, mì la cɛl kɔl celen, faŋanndo o kɔl diandaa naa n cɔm niaa-o coo, mì la cɛl yoongu celen, faŋanndo o Yoongu kɛndɛ niaa sɔla naa o ba-o coo. Nduyɛ, la co kon cɛlɔɔ ɲɛkɛndɛi.

⁵ Nduyɛ, o yiyan nuu nin, kiilaa niaa co kan cɔu maa a hiow vannda-a, a hiw ya hali ɲɛ-pɔmbɔ le.

⁶ Mì i cee bɛɛ isɔɔ le, kɛ dɛnɛ sinaa co ya lepɛŋ te. N cɔm niaa kon válán o nɛi oo nɛi coo a o dɛnndan kpow nin.

⁷ Tuma ya dimul niaa Yoongu kɛndɛ Hala-a o, o co a vɔngu le ya dimul niaa ndu le, mí tuisin tootoo le niaa heeloo. Vɛ̀ɛ̀ i cee tosa lende le?

⁸ Kundala vanaa laalaŋaa celen la sala ya, mí cua volin ndan le niaa malaa.

⁹ Telen ya va niaa tɛɛn, mí va o bahavɛiyo nin-ndo, i hendu vana-vana volɔɔ coo le, kani vanaa laalannda Maseduan a va ya malaa ni. Mí mandan o dɛnndan nin kpow yɔŋii yáà va o ba niaa bɛngu, nduyɛ i hiawnin laci a kon tosaa.

¹⁰ Le toɲa Krista co ya ho nin-ndo, o tàndá Akaii-yo nin kpow, vana-vana nɔla mò kuuna ya kuundianndo le sɔɛi ken te.

¹¹ Le yɛɛ ya co yɛ ken dimio? Bàà mò va maa i kaola niaa le? Hala sínà maa i kaola niaa.

¹² O ya co tosaa-o, i hiawnin laci a ndu tosaa haliko mi tɛɛmbuu yonga vanaa co yiyanndo maa a co baalaa tosaa maa naa-a.

¹³ Vanaa vaa lende-a a co kiilaa lacòòvaa ni, vanaa baalaa fondoa co vannda huiyo-a, a co handɔnndo o hɔl maa kiilaa Krista-a nda co ni.

¹⁴ Kɛ kon dow vana kɔndɔfili le, kani Setana pila bɛɛ co handɔnndo o hɔl maa mɛlɛkanɔ ɲɛ-tengaa o co ni.

¹⁵ Lelan, buɛyaa Setana-a va pɛ handɔnndo o hɔl maa buɛyaa dɛnɛ sandaa nda co ni, ken i dow vana kɔndɔfili le. Kani mɛɛlula ndalan la vanin mɛɛ dɛnnda ndalan la co yɛ.

Sangala Pol sɔla lan

¹⁶ I co cɔɔlu dimi, vana-vana ca ya diom te, te lende niaa co yɛ ya cɔu ni, mɛɛ la bii ya lende, haliko mi sɔla fondaa, mì ya bɛɛ lisan ɲɛ-pɔmbɔ.

¹⁷ Ɲɛ ya co hoo dimio-o, o co Mɛlɛka le vem ya ndu dimi le, kɛ o diɔmii nii nin ya co kuundianndo nuaa ni.

¹⁸ Le mɛɛ vannda taw a co kuundianndo o falon nin yɛ, ya bɛɛ i kuundiannin o falon nin.

¹⁹ Niaa vanaa kɔlkalua co vɔ cɛlɔɔ a kɔlta niaalan kpow le diɔmnda biuvɔnndo.

²⁰ Vannda co niaa cɔu maa n'cɛ, a co tɔnɔ niaa dioo, a co niaa ɲɔɔn poondia o laba, a co niaa kuundianndo coo, mà va niaa hɔlla lɔɔ, mì co kon cɛlɔɔ.

²¹ Siɛmbulan la co ya le hee dimio ni, n yɔŋnun bɔɔ vanaa yoomuma lepɛŋ. Nduyɛ, te vana tɔɔndan pɛ le vana pila kuundianndo, mɛɛ ya bɛɛ i co tɔɔndan. A diɔmii nii ya co hee dimio ni.

²² Vɛ̀ɛ̀ Hebreea nda co ni? Ya bɛɛ Hebreenɔɔ ya co ni. Vɛ̀ɛ̀ Israɛlla nda co ni? Ya bɛɛ Israɛlnɔɔ ya co ni. Cuavaa-imamaa Abraham-nda nda co ni? Ya bɛɛ cua ndɔ kon ya co ni.

²³ Hee ndi maa vana seemɛi kpeekpei ya co ndi dimi ni. Vɛ̀ɛ̀ vanaa baalaa Krista-a nda co ni? Ya, i hiow nda o nɛi kon coo, kani i kei o sangalan taw nin mí hiaw nda, a mal-la o kaasoolan taw mí hiaw nda, i sɔla lɔɔ hiovɔɔ o nda sɔla-o. Mbɔ̀ piɔ́mndo bindibindi ya bɔɔ!

²⁴ Yuifia lɔɔ ya beleyaa a leŋɔmahiɔlu, beleyaa a leŋɔmahiɔlu bɛmbɛ leŋuɛɛnu,

²⁵ a lɔɔ ya a kɔluei bɛmbɛ leyáá, a vii ya a powtan bɛmbɛ lepilɛ, mí dɛ̀ndɔ̀ɔ́ tambu a ya o mɛnndan coo bɛmbɛ leyáá, mí cii paalen lepilɛ a ɲumndan o mɛmma ihɛllan coo.

²⁶ I kela taw, i kei o kpundɛla bɔɔ-bɔɔ nin: i va le lo o peelo, vanaa del vannda coo-a del-la coo, vanaa nia naa n co súú pilɔɔ-a a va le ya diyɔɔ, vanaa súúla celennda tol-la coo, vannda ndáà yeema le ya diyɔɔ o kobilan nin, i va le piɔ́mndo sɔlaa o lɛŋnde veselɛilen nin, i va le lou o mɛmma ihɛllan nin, puapilɛa lacòòvaa va ya yaŋɔɔlan hɛnduuo laci.

²⁷ I sanga, mí yɔkpa, i va lɔan lahɔl telenndan lapum, yiaan a bolole vesɛilen le va ya palaa. Lɔ́ɔ́ lepum, i va sumndo biyɔɔ, hoeiye va ya biyɔɔ, i va a fɛ́lio.

²⁸ Sɔɔn celen co, n yɔŋnun ya-on. Mún mún, i cɔm mún te. I co buulanndo lepalaa-lepala le kundala vanaa laalannda kpow.

²⁹ Te vana pum va pɛ vana nɔ mayoomu loo, ya bɛɛ i cennun vana nɔ mayoomu loo. Te vana pilɛ pɔw pɛ, i sanga taw o kɔl nuu nin.

³⁰ Te i co pɛ kuundian, o yoomuma lepɛŋndan nin ya kuundiannin ni.

³¹ Hala, o co Fuɲaa Maalii naa Yeesu-o, o co vana duaa le fɛɛn a fɛɛn-ndo sínà maa i co lacòòva dimi le.

³² Telen ya va Damas-o, mí masa-ibunga va masalen tosaa Arɛtas o ba bɛngu-o kɛsi vanaa cɔwva o diola luɛyaala kobio le ya biyɔɔ.

³³ Kɛ mí vannda pum vow ya o kambɛiyo nin, má kei a ya o dio-pɔmbɔɔ, má tuisi ya o kpakio kɔɔli, o kon mí hialun ndu.