2Dɛnnda lemasalan 9 - BII BILA

Masa laandu fula Saba-o kɔɛ Salomɔn yilɔɔ

¹ Mí masa laandu fula o lɛŋnde Saba len nin-ndo tuɛi tɔ́ɔ́ bɛndu Salomɔn-ndo. O kon mó mal, mó hun Yerusalɛm le ndu kɔlɔɔ solio a ɲuuniaala kàlà-kálàlan. Mó hun a vannda sɛ́lɛ́ bɛndoo kɔɔli, a ɲɔɔmɛɛa o siiluu ansan, sianion taw-taw a powta báà kàlàlan o lakɔɔ-a. Mó hun o Salomɔn ndo, mó dimul ndu sɔɔn va ndu o kɔl-lon kpow.

² Mí Salomɔn muli ɲuuniaala ndɔlan kpow, o kɛ́-kɛ̀ lo mí Salomɔn bumba ndu tɛɛsiaa le.

³ Masa laandu fula kon Saba-o cɔu kɔlkalu bɛndu Salomɔn-ndo, cɛi lemasa ndóò tangul-lo,

⁴ ɲɛdiaa va dionnɔnndo o Salomɔn ndo cɛinin-ndo, cɛila vanaa ndɔa baalaa va nin-ndan, valta vanaa ndɔa baalaa va tosaa lan a volɔɔla ndáà nɔ lekɔɔ lan, volɔɔla vanaa va ndu ɲɛdiaa a mɔiyan yɔngoo-a ndáà nɔ lekɔɔ lan, a heelɔla va le luɛyɔɔ o Cɛi-Mɛlɛka-o nin-ndan, mó hilul.

⁵ O kon mó dimul masaa aa: «I laalan maa ɲɛ-ɲɛ yáà tuei a nɔm o kɔɔ a á kɔlkalu nɔmndo o kɔɔ o lɛŋnde nilen nin, toɲaa lekɛ́ndɛi o co ni.

⁶ Te ndóò ve mí ya pila hun mí ca a lehɔl te, i ve sɔɔn nda va ya dimullo-on laalan te. Nduyɛ, hali tálá kɔlkalu nɔmndo i tui ndu tɔ́ɔ́ le. A hiow mɛɛ yáà tuei nɔm tɔ́ɔ́ yɛ.

⁷ Mbɔ̀ vanaa nɔmnda a vanaa nɔmaa baalaa pɛl tɔnɔ bɛndu! Dɛnɛ kɛndɔɔ co le vanaa nɔmaa baalaa co nɔm ikɛi lɔ́ɔ́-lɔ́ɔ̀, má va nilan yaŋɔɔ o sɔɔn kɔlkalun nɔmndon-nda!

⁸ Biiloo co le Mɛlɛka Hala nɔmndo, o ce nɔm ɲia, mó kɛsi nɔm o kpɛŋɛ ndɔ lemasaa coo le vaa masaa le ndu Mɛlɛka Hala nɔmndo-o. Kani Hala nɔmndo kaola Israɛlla, o yeema mì Israɛlaa kalaa va yoomu le lɔ́ɔ́-lɔ́ɔ̀. Lelan o suili nɔm masaa nda coo ni haliko ma tosa sakpoyɛi a dɛnɛ sandaa.»

⁹ O kon kɔɔli, mó yɔngu masaa Salomɔn sianion kilolan vàálan layàá a tálá, ansan taw-taw a powta báà kàlàlan. Kabi bɛɛ vana ci lɛ ansan maa ansan masa laandu fula Saba-o ndóò yɔngu masaa Salomɔn-ndo-o le.

¹⁰ Mí vanaa baalaa Hiram-nda a vanaa baalaa Salomɔn-ŋaa va hunɔɔ a sianion fulaa Ofir-a hun vɛlɛ a yɔmii santal a á powta báà kàlàlan.

¹¹ A yɔmii santal ken masaa toosiaa nɛila vanáà kei le luɛyɔɔ o Cɛi-Hala-o a o cɛi masaa nin-ndan ni. A ndi koni o toosiaa vɛlɛ bangalan a bondomalan le vanaa n'condua ni. Kabi paandu vanáà ci vɔ ɲɛm vaa lende o tàndá Yuda-o nin te few.

¹² Mí masaa Salomɔn yɔngu masa laandu fula kon Saba-o ɲɛm ndóò yeema-on a ɲɛm ndóò ɲuna-on kpow. Mí ɲɛm ndu sɔla-on hiaw ɲɛm ndóò cuu masaa Salomɔn-ndon. Mó can, mó muungun o lɛŋnde ndɔlen nin nda vanaa ndɔa baalaa.

Bolofaa Salomɔn-ndo

¹³ Sianin va Salomɔn luɛyɔɔ o ba o vɔsio nin-ndon va lusullo kilolan vaalan bidiin,

¹⁴ handɔɔ niko o mulu ndóò bii vanaa hun a vɔngulan o lɛŋnden nin-nda a yulaa o ba-o coo, handɔɔ vɛlɛ o sianion a volin masaa Arabii a masaa n'bungaa va Salomɔn cuuo-on coo.

¹⁵ Mí masaa Salomɔn cɔaw kɔ̀ɔ̀la cɔwlan a sianin fɛtufɛton. Le kɔ̀ɔ̀ cɔw kɛ́-kɛ̀ cɔvɔɔ, mó teengiaa sianion kilolan tan ŋɔmpum.

¹⁶ Mó cɔaw vɛlɛ kɔ̀ɔ̀la cɔwla bɔɔpɔɔlan kɛmɛ leyáá a sianin lɔan. Le kɔ̀ɔ̀ cɔw kɛ́-kɛ̀, mó luei sianion kilolan tan yáá. Mó kɛsi lan o Cɛiyo-Bundɔɔ-Liban-ndo.

¹⁷ Mí masaa cɔaw vɛlɛ kpɛŋɛ lemasa bɛndoo a ciŋun kamaa, mó yikpa ndu a sianin diandan.

¹⁸ Kpɛŋɛ lemasa kalaa ndóò nɔ helɔɔlan tan ŋɔmpum, ndóò nɔ vɛlɛ ɲɛ kɛsiaa n'peloo o holaa nɛɛ pilɛ a kpɛŋɛ kalaa, a sianion ndu bɛɛ ndóò cɔwnun ni. Ndóò nɔ lɔɔlan o kpengun miunndon, a tuula yàlàá nda ŋiɔn o kpengun miuŋun kpɛŋɛ kalaa coo.

¹⁹ Má tuuliaa vɛlɛ yàlàá tɔ́ a à ŋiɔn o helɔɔlan coo, kpengei a ŋɔmpum, kpengei pilɛi a ŋɔmpum. Dɛnɛ súú vaa lende ndóò tosan ndɔ o lemasa oo lemasa nin te.

²⁰ Taalala kólaala masaa Salomɔn-ndan kpow a sianion ndáà cɔw lan ni, ɲɛm-laandun va o Cɛiyo-Bundɔɔ-Liban nin-ndon kpow a sianin diandan ndáà cɔw mun ni. Ɲɛ-ɲɛ ve o cɔavaa a n'voli le. Bau telen Salomɔn va masaa-o, vannda ndáà ci mun ɲɛ sɔvɛ taw le.

²¹ Masaa ndóò nɔ dɛ̀ndɛ̀la mamɛnndan, la ndóò viam Tarsis dí le kɔlan a vanaa ɲaanun dɛ̀ndɛ̀la mamɛnnda masaa Hiram-ndan-nda. Vɔsilan la hiow pɛ layàá, la hin lapiaa ca a sianion, a volion, a ciŋun kamaa, a tɔmnda a á yovaa kɛndɛ-kɛndɛa pum.

²² Masaa Salomɔn ndóò hiow masaa va o lɛŋnden coo-a kpow bolofaa a kɔlkaloo ni.

²³ Nda kpow va hunɔɔ ndu sɔɔn ɲuuniaa, kani kɔlkaloo pila Hala ndóò ke ndu ni.

²⁴ Nduyɛ vɔsi oo vɔsi, masaa kan va ndu ɲɛm toosian a volion-ndon, ɲɛm toosian a sianion-ndon, volɔɔla cuɛinanndan, ɲɛm cɔwvon, ɲɛm cun kɛndɔn, soa a milɛɛa cuuo.

²⁵ Salomɔn ndóò nɔ hèélan vàála hiɔɔlu le soa a le ɲɛla ɲaanannda ndɔla soa nan-ndan mandaa. Ndóò nɔ soa vaalan tɔ́ a latiɔn, mó kɛsi nda o kobila ɲɛm cɔwvon va n'mandaa nin-ndan nin, mó mandan a tiŋ ikɛi Yerusalɛm.

²⁶ Mó tosa masalen masaa ha coo, a lɛŋii ndɛi va cɔnɔnndo o pee bɛndoo Efrate, keiyo a lɛŋnde Filistia, kɔlan tiiyaa dí o pɛɛngulan a lɛŋnde Esipte len-nda.

²⁷ Mí masaa Salomɔn kui volion Yerusalɛm maa lapow, mó kui yɔmii sɛɛdrei maa buumbui vul a ba ndɔ o dɛɛlaa nin-nde.

²⁸ Esipte a o lɛŋnde kpow nin soa Salomɔn-nda ndáà fula ni.

Piɔ́m Salomɔn-ndo

²⁹ Dɛnnda tɔ̀la Salomɔn-ndan, kandɔɔ lataselan háá lamɛɛlaalan, la co lasɛvaa o Dɛnnda Natan vana-tɛɛngaa-diom Hala-o lan nin, o Diomnda Ahiya fula Silo-o tɛɛnguu lan nin a o Vundule Yedo, vana-tɛɛngaa-diom Hala-o len nin. Sɛbɛ Vundule Yedo, vana-tɛɛngaa-diom Hala-o len le co kon nin-ndo, a Yeroboam po Nebat-o o kɔɔ o soo ni.

³⁰ Mí Salomɔn tosa masalen vɔsilan belehiɔɔlu Israɛlla kpow coo, Yerusalɛm o va icali ni.

³¹ Salomɔn ndóò vuo, má kumbu ndu fuɲa ndɔ ikɛi o Kobi David fuɲa ndɔ-o nin. Mí Roboam po ndɔ koma sul masaa o fonda ndɔɔ.