2Dɛnnda lemasalan 8 - BII BILA

Baalala yɛ́-yɛ́la Salomɔn tosa lan

¹ O vɔsilan bidiin bɛngu, mí Salomɔn cii Cɛi-Hala-o a cɛi ndɔ ndu pilaa tangul.

² Mó mingi kobila Hiram yɔngu ndu lan tangul, mó kɛsi cuavaa Israɛlla o kobila lan nin.

³ O kon kɔɔli, mí Salomɔn kɔ del kobio Hamat-Soba coo a cɔwvo, mó bii ndu.

⁴ Mó tangul kobio Tadmɔr o lɛŋnde veselɛilen nin, a kobila va le ɲɛm dian mandaa o tàndá Hamat-o nin-ndan.

⁵ Mó tangul kobio Bɛt-Hɔrɔn-o-dɛngbɔɔ-nin a Bɛt-Hɔrɔn-o-pembei-coo. Kobila mayoomulan la va ni, láà nɔ kpakilan lakungaa a sungbuma kpakian, láà nɔ vɛlɛ diola luɛyaalan a sɔkɔma n'cilinndan.

⁶ Mó mingi vɛlɛ Baalat tangul a kobila ndóò manda ɲɛdiaa nin-ndan kpow, kobila ndóò manda ɲɛla ɲaanannda soa nan-ndan nin-ndan a la ndóò manda soa ndɔa nin-ndan. Mí Salomɔn cɔaw vɛlɛ ɲɛ-ɲɛ ndóò nɔ o kɔl le cɔvɔɔ Yerusalɛm, o pembei Liban coo a o lɛŋnde va ndu o ba bɛngu len nin.

⁷ Vanaa pum ndáà lo o lɛŋnde len nin, nda ve cuavaa Israɛl te. Nda yɔŋnun haa ni: Hitiia, Amoriia, Perisiia, Heviia a Yebusiia.

⁸ Poaa ndaa koma lo nda kɔɔli o lɛŋnde len nin-nda, a Israɛlla diw le-a, mí Salomɔn siinguu nda pɔtɔlla, vali lepɔtɔl kon nda co tosaa háá paalen nden ni.

⁹ Salomɔn tundu Israɛlnɔ kɛ́-kɛ̀ o baalala lepɔtɔlta lan nin te, kani vanaa cɔwva, simlacia vanaa cɔwva, vanaa ɲaanun o soa coo-a a vanaa ɲaanun a ɲɛla ɲaanannda soa nan-ndan-nda nda va ni.

¹⁰ Simlacia Salomɔn ndóò kɛsi vannda coo-a va kpow-kpow kɛmɛ lediin a beleŋuɛɛnu.

¹¹ Mí Salomɔn kɔ faŋa cua masaa Esipte-o o Kobi David-o nin, mó hun luei ndu o cɛi ndóò tengul ndu-o nin. Kani mó dimi aa: «Laa nuu bɛnda mò cal o cɛi lemasaa David masaa Israɛl-lo nin te. Kani fondala diandaalan cɛila nda luei kesu kpemaa nin-ndan la co ni.»

¹² O kon mí Salomɔn va Mɛlɛka sálàla loamaalan solullo o fonda-loamaa-lasálà ndóò tengul Mɛlɛka o Cɛiyo hɔl-ndɔ-o coo.

¹³ Maa mɛɛ Moise ndóò handu silalan le lepalaa-lepala o palɛi yɛ́-yɛ́i ken nin yɛ, mí Salomɔn va sálàla va le palɛi pɛngiɛi lan, sálàla va le paangun sɛnɛiyon-ndan a sálàla va le kafola bɛndula yɛ́-yɛ́lan ndan solio. Kafola lan la va lan ni: kafo bulu toosian a lɛvɛn too, kafo koavaa a kafo lakùùo.

¹⁴ Mí Salomɔn yɔngu kundala vannda ha baalala ndalan, mɛɛ David fuɲa ndɔ ndóò dimi yɛ: vanaa-solia-lasálàá, leviaa va le Mɛlɛka biiloo lepalaa-lepala-a, te kon te le nda malaa o baalalan nin-nda, a kunda kpalilaa cumulaa ladioa, a ndáà kɛsi cumullo o diola pilɛn-pilɛnndan-nda. Lende David vana baala Hala-o ndóò dimi ni.

¹⁵ Vannda faŋan o diomnda masaa David ndóò dimul nda le dɛnɛ vanaa-solia-lasálàá a leviia-o coo le, hali le dɛnnda tɔ̀lan kpow, maa dɛnnda n'volilan.

¹⁶ Mí baalala Salomɔn-ndan la cuu tosan kpow, kandɔɔ o paale Cɛi-Hala-o kilan-nden háá mó cuu tangul. Nuaa Cɛi-Hala-o cuu cɔvɔɔ ni.

¹⁷ O kon mí Salomɔn kɔa Ɛsiɔn-Kebɛr a Ɛilɔt, fondala dɛ̀ndɛ̀lan la sim o mɛmma ihɛllan coo, o lɛŋnde Edɔm-nden nin-ndan la va lan ni.

¹⁸ Mí Hiram yɔngu buɛyaa ndɔa sina mɛnndan taw-va dɛ̀ndɛ̀lan, mí ndáà yoo Salomɔn dɛ̀ndɛ̀la lan. Má kɔa latulu nda buɛyaa Salomɔn-nda Ofir, má cua sianion kilolan vaalan tɔ́ a layàá lon, má cuu masaa Salomɔn mun.