2Dɛnnda lemasalan 6 - BII BILA

¹ O kon mí Salomɔn dimi aa: «Mɛlɛka, nɔm óò yeema le calle nɛɛ yifidiia,

² kɛ ya, i cii nɔm cɛi kɛndɛ sɔvɛ bɛndoo tengul, nɛɛ n vanin icali le fɛɛn a fɛɛn-nda pɛɛn!»

Sɔɔn dimin le Cɛi-Hala-o sɔɔ Mɛlɛka o ba-on

³ Israɛlla kpow a va isisi lon, mí Salomɔn mulin, mó dɔaw nda duaa.

⁴ Mó dimi aa: «Biiloo co le Mɛlɛka, o co Hala Israɛlla-o. O yiilu David fuɲa ni kpemaa a sondo ndɔɔ, mó peelu sɔɛi ken a bala ndɔlan. Nuaa ndóò dimul ndu ni aa:

⁵ ‹Kandɔɔ o paale ya soli vanaa nia o lɛŋnde Esipte len nin-nden, i hɛli kobi oo kobi o kobila Israɛlla tɛɛn le ya cɛi tengul nɛɛ ya vanin icali-a le, i hɛli vɛlɛ vana le vaa simlacinɔ vanaa nia le, Israɛlla pɛɛn.

⁶ Kɛ mí hɛli Yerusalɛm haliko mi diola nilan la va biilɔnndo lon. Mí hɛli vɛlɛ David, haliko mo tosa masalen vanaa nia coo, a co Israɛlla-a.›»

⁷ Mí Salomɔn dimi vɛlɛ aa: «David fuɲa ni ndóò tuu le Cɛi-Hala-o tangullo o diola Mɛlɛka Hala Israɛlla.

⁸ Kɛ mí Mɛlɛka dimul ndu aa: ‹Yiyan kɛndɔɔ pila n sɔla le ya cɛiyo tengullo ni.

⁹ Kɛ nduyɛ, o co nɔm te tangulnin cɛi kon te, po nɔmndo, o n solin o ipulu-o co ndu tangul ni.›

¹⁰ Mí Mɛlɛka peelu sɔɛi ndóò dimi ken-nde. Ya Salomɔn, mí siŋnun masaa o fonda David fuɲa ni-o, mí cal o kpɛŋɛ lemasa Israɛlla coo mɛɛ Mɛlɛka ndóò dimi ndi yɛ. O kon, mí tangul Cɛiyo o diola Mɛlɛka Hala Israɛlla.

¹¹ Mí kɛsi kesoo lenin, o kpema Mɛlɛka-o co nin-ndo, kpema o yii nda Israɛlla-o pɛɛn.»

Piɛile Salomɔn-nden

¹² Mí Salomɔn sim o fonda-loamaa-lasálà Mɛlɛka-o hɔl-ndɔ, Israɛlla kpow o hɔl, mó heelu balan.

¹³ Nduyɛ, ndu Salomɔn ndóò tangul bàndóó a daɲan o bɛɔ tɛɛn, o va bandei dunndo leŋuɛɛnu, buo dunndo leŋuɛɛnu, simndan dunndo leyàá. Mó hel lecoo, mó baŋ vulan Israɛlla kpow o hɔl, mó heelu balan o halataala.

¹⁴ Mó piɛi aa: «Éé Mɛlɛka Hala Israɛlla, hala celen co maa nɔm o halataala a o lɛŋnden coo le. A lo o lediom coo a kpema nɔm n yii-o, a co vanaa baalaa nɔmaa co kelaa nɔm o hɔl o sandei nin a kɔlta ndalan kpow-va mandaa.

¹⁵ Lelan n peelu sɔɛi nɔm óò dimul vana nɔm baalaa, David fuɲa ni-e ni. Sɔɛi nɔm óò solin o sondo-e, ndi n peelu hau nuaa a kpaaya nɔm bɛndoo ni.

¹⁶ Mɛlɛka, Hala Israɛlla, mɛɛ peelu niko sɔɛi n dimul vana nɔm baalaa, David fuɲa ni-e. Kani mí nɔm óò dimul ndu aa: ‹Te poaa nɔmnda caa pɛ kelaa, mà bii tɔŋnda nilan mɛɛ n kela ya o hɔl-lɛ, le lɔ́ɔ́-lɔ́ɔ̀ a folanin vana koma tosanin masalen o fonda nɔmndo-o Israɛl te.›

¹⁷ Lelan, Mɛlɛka, Hala Israɛlla, peelu niko sɔɛi nɔm óò dimul David vana nɔm baalaa-e.

¹⁸ Kɛ vɛ̀ɛ̀ Hala tiw yɛnin ba le calle lekɛ́ndɛi nda vanndacieea o lɛŋnden coo? Tofa vɔ mɛɛ halataala co o bɔɔ yɛ, kɛ hali a kon kpede nɔm Hala, a nɔla sulɔɔ lon te. Vɛɛ n tiw yɛnin ba sulɔɔ o cɛile pɔmbɔle ya tangul len-nden nin?

¹⁹ Kɛ o va bɛɛ lende Mɛlɛka Hala nuu, yaŋ nilan o piɛilen a o tɛɛlɔn ya vana nɔm baalaa co nɔm-ndo. Yaŋ nilan o koŋullo a o piɛile ya vana nɔm baalaa co o nɔm-nden.

²⁰ Màá hɔlte nɔmnden le va o Cɛiyo ho coo idii a icɔl, fonda n dimi hoo aa lon diola nɔmndan la vanin piɔlnɔnndo ni-o pɛɛn. Yaŋ nilan o piɛile vana nɔm baalaa co tosaa o fondaa ho coo len.

²¹ Yandi, te vana nɔm baalaa a Israɛlaa nɔmnda a tɛɛlun pɛ nɔm o fondaa ho, yaŋ nda nilan, ma tuei nda diom nɛɛ n co o calta nɔmndan nin o halataala-a, ma mal nda haki.

²² Te vanndo tosal pɛ puapilɛ ndɔɔ dɛnɛ vɔɔndo, mà baŋ ndu kpíŋ le mɛnanndo, te o hin pɛ le mɛnanndo o Cɛi nɔmndo ho nin, o fonda-loamaa-lasálàá ho hɔl-ndɔ,

²³ yandi nɔm Mɛlɛka, yaŋ ndu nilan nɛɛ n co o halataala-a ma tosa ɲɛ. Kiolu yamɛi vanaa nɔmaa baalaa tɛɛn, ma yaala vana vɔw-vo, mò sɔla sangaa le kela ndɔ vɔɔndo, ma ke vana nɔ dí-o dí ndɔɔ, ma bii ndu mɛɛ sakpoyɛi ndɔɛi co yɛ.

²⁴ Te yaamɔɔa nɔla pɛ vanaa nɔmnda, a co Israɛlla-a, le haki nda cuanin a nɔm-ndo, taa mangalan pɛ, mà biilu diola nɔmndan, taa piɛi pɛ nɔm, mà tɛɛlun nɔm o Cɛi nɔmndo ho nin,

²⁵ nɔm Mɛlɛka, tuei nda diom nɛɛ n co o halataala-a, ma mal nda haki, ma mingi nda o lɛŋnde n ke nda pila a fuɲaa ndaa mamaa len nin.

²⁶ Te halataalaa kindan pɛ, mì piɔɔ kɛɛ le siaa le haki nda tosanin-ndo, taa mulin pɛ mà piɛi nɔm o fondaa ho coo, mà biilu diola nɔmndan, te siɛmbulan la bii nda pɛ mà mulul hakila ndalan kɔɔ le lɔɔ n lɔaanin nda-o,

²⁷ nɔm Mɛlɛka, mulul nda nɛɛ n co o halataala-a. Mal vanaa nɔmaa baalaa haki, Israɛlla pɛɛn. Pɛɛku nda nɛila nda bɛnda mà kela coo lan, ma tuisi piɔɔ o lɛŋnde n ke nda kɛ́ɔ len coo.

²⁸ Te yima fofolan, te kon te nàà halimaa tol pɛ o lɛŋnden nin, te tɔlɔɔlan la vesa pɛ, te kon te mì la sɛ isisi o ciɛɔn nin, te sóónɔa a kamballa tol pɛ o lɛŋnden nin, te yaamɔɔa hinul pɛ vanaa nɔmnda o lɛŋnde ndalen nin, mà tiila nda o kobila ndalan nin, te sanga oo sanga, te kon te naa oo naa tol pɛ nda coo,

²⁹ te vanndo o pilɛ, te kon te Israɛlla kpow a tɛɛlun pɛ nɔm, mì vana-vana sina dɛnɛ vɔɔn o tosa-o, mì mɔnɛi bii ndu, mò heelu balan a kpengii Cɛi nɔmndo ho le nɔm piɛiyo,

³⁰ nɔm Mɛlɛka, mulul nda nɛɛ n co icali o halataala-a. Mal nda haki ma mingul vana-vana mɛɛ kela ndɔɔ co yɛ, kani a sina yiyan vana-vana nɔ o kɔl-lo. Nduyɛ, nɔm pilɛ kpé sina yiyannda co vanndacieea o kɔl-tan ni.

³¹ O kon, Israɛlla nɔnin siòòŋii nɔmnde, mà kela o nɛila nɔmndan coo o palɛi nda ciinin yoomu o lɛŋnde n ke len fuɲaa naa mamaa kpow len coo-e nin.

³² Te miallo, o fula o vanaa nɔmnda Israɛl tɛɛn too tuei pɛ diola nɔmnda bɛndulan a kpaaya nɔm bɛndoo tɔ́ɔ́, mò cɛn nɛɛ levil, mò hin o Cɛi nɔmndo ho nin le nɔm piɛiyo,

³³ nɔm Mɛlɛka, tuei ndu diom nɛɛ n co icali o halataala-a, ma ke ndu ɲɛ o hin nɔm piɛiyo-o, haliko mi vannda súúlan kpow o lɛŋnden coo a sina diola nɔmndan, mà nɔ siòòŋii nɔmnde maa vanaa nɔmnda, a co Israɛlla-a, mà sina vɛlɛ maa o Cɛi ya tangul hoo-o nin diola nɔmndan la co biiloo sɔlaa ni.

³⁴ Te vanaa nɔmnda a kɔɛ pɛ le yaamɔaa ndaa cɔlɔbaa, taa bii pɛ nɛila n co nda cɔm-ndan, taa muli pɛ hɔlla a ba kobi n hɛli hoo-o a o Cɛi nɔm ya tangul hoo o diola nɔmndan-ndo le nɔm piɛiyo,

³⁵ tuei nda diom o halataala, ma muli piɛile ndalen a tɛɛlɔn ndaa, ma mala nda.

³⁶ Taa cua pɛ hakio a nɔm, kani vana co le o tosa dɛnɛ haki loo, mì nɔm Mɛlɛka tambu kɔllo a nda, ma mal nda yaamɔaa ndaa o ba, mì yaamɔaa kan a kɔɛ a nda o biyɔɔ nin o lɛŋnden lepum nin, o va nɛɛ macɛlu o va nɛɛ levil polon,

³⁷ taa kɔ mangala pɛ yiyanndan o lɛŋnde nda kɔanin a nda o biyɔɔ nin-nden nin, mà sɔlɔlan yɔŋ nda vɔɔndo, mà piɛi nɔm, mà dimi aa: ‹N cua hakio, n yɔŋnun vanaa vɔɔn, n tosa dɛnnda vɔɔnndan›,

³⁸ taa muungu pɛ nɔm o labɛngunin a kɔlta ndalan a á yoomu ndaa kpow nɛɛ nda vanin o biyɔɔ nin-nda, taa lo pɛ o lɛŋnde nda vanin o biyɔɔ nin-nden nin, mà muli hɔlla a kpengii lɛŋnde ndalen, lɛŋnde n ke fuɲaa ndaa mamaa len, a kpengii kobi n hɛli hoo-o a á kpengii Cɛi nɔm ya tangul hoo-o, mà piɛi nɔm,

³⁹ yaŋ nilan o piɛile ndalen a o tɛɛlɔnnda ndalan nɛɛ n co icali o halataala-a. Mal vanaa nɔmnda haki ma lɔɔnun ibuŋ le nda, a tosa kan hakilan a nɔm-nda pɛɛn.

⁴⁰ Éé Hala nuu! Tofa, mà yaŋ nilan o piɛile ya co nɔm nden solullo o fondaa ho len.

⁴¹ Mɛlɛka, Hala nuu, cɔn niko mà hin o fonda nɔm pɛngiaa nin, nɔm pila a kesu kpemaa, o co kpaaya nɔmndo-o pɛɛn. Mɛlɛka, Hala, màá vanaa-solia-lasálàà nɔmnda cuɛinun cindaa maa lavolɔɔ, mì vanaa lo o diomnde nɔmnden coo-a dɔwnun ɲaale o dɛnɛ nɔm kɛndɔɔ nin!

⁴² Mɛlɛka, Hala nuu, kɛɛ vana nɔm n pɔla-o le. Loonun a dɛnnda kɛndɛla n tosal David, vana baala nɔmndo lan kpow.»