2Dɛnnda lemasalan 3 - BII BILA

Salomɔn vem Hiram Cɛi-Hala-o tangullo

¹ Mí Salomɔn kandu Cɛi-Mɛlɛka-o tangullo Yerusalɛm, o pembei Moria coo, nɛɛ Mɛlɛka ndóò cɔmnun David fuɲa ndɔ-a. O fonda David ndóò toosiaa o kpele lɔaa n'mal Ɔrnan Yebusiinɔ-o nin-ndo nin.

² Vɔsi Salomɔn suili vɔsilan lahiɔɔlu o masalen-ndo, paangii diinndɔɛi va malɔ lediin, mó kandu Cɛi-Hala-o tangullo.

³ Tuula Salomɔn tuu le Cɛi-Hala-o tangullo lan la yɔŋnun ndan ni: bandei dunndo belaŋɔmpum, buo dunndo bidiin.

⁴ Dio luɛyaa va o Cɛi-Hala kon sondoo-o va bandei dunndo bidiin mɛɛ Cɛi-Hala kalaa ndóò nɔ buo yɛ, helɔɔ dunndo kɛmɛ a bidiin. Mí Salomɔn yikpa ndu leninndo kpow a sianin diandan.

⁵ Mó yikpa cɛi lenin bɛndoo a pɛngɛn siprɛsion, mó holiholi sianin diandan o pɛngɛn mun, mó kɛmikɛmiaa tuuliaala mavawlan a tuuliaala n'yɔlɔlan lecoo.

⁶ Mó toosiaa tuuliaala kɛndɛ-kɛndɛlan o cɛi lenin kon nin a powta báà kàlàlan. Sianin nda yikpa ndu-on yɛ, Parvaim nda va fulaa a mun ni.

⁷ Mó yikpa sungbuan, kèédeon, ciin cɛiyon a diola luɛyaala cɛi lenin kon a sianion, mó tuuliaa mɛlɛkaa kanda ɲɛm Hala-on-nda o cììn cɛiyon coo.

⁸ Mó cɔaw vɛlɛ Fonda Diandaa-Diandaa. O va bandei dunndo bidiin mɛɛ Cɛi-Hala-o va buo yɛ, buo dunndo bidiin. Mó yikpa ndu lenin a sianin diandan, sianin mun n va lusullo kilolan vaalan bidiin.

⁹ Pɔɔndɔn n'sianin nda tosa cɛi kon baalaa-on n va lusullo kalamulan kɛmɛ leŋuɛɛnu. Mó yikpa vɛlɛ coocoo cɛila leninndan a sianion.

¹⁰ Mó teengiaa cilinndon, mó cɔaw mɛlɛkaa kanda ɲɛm Hala-on-nda nda ŋiɔn, mó yikpa nda a sianion, mó kɛsi nda o Fonda Diandaa-Diandaa nin.

^11-13 Mɛlɛkaa ŋiɔŋa kan a vannan isisi ikɛi kpɛɛlun, má muli bolle a kpengii dio luɛyaa. O kɛ́-kɛ̀ ndóò nɔ kumbanndan latiɔn, la va lapɛngɛlaalan bandei dunndo bidiin. Mí kumban mɛlɛkanɔɔ o pilɛ ciŋan a cìì cɛi lenin kon ipilɛ, mí kumban o pillo ciŋan a kumban o pilɔɔ. Fonda kumbannda ndala hiɔɔlulan láà pɛngɛlan coo-o va bandei dunndo leŋuɛɛnu.

¹⁴ Mó lɔa kola keesoo, mó yin ndu a kaan, a ɲɛ siaŋaa vólotótoo a á ɲɛ siaŋa sɔɔtɔtɔɔ, mó kɛmikɛmiaa mɛlɛkaa kanda ɲɛm Hala-on-nda lecoo.

Sungbuma n'daɲan a fonda-loamaa-lasálàá

¹⁵ Mó cɔaw sungbuan man miɔn, helɔɔ dunndo beleyaa a leŋuɛɛnu, mó simi man o Cɛi-Hala-o hɔl-ndɔ. O lesungbu oo lesungbu bollen, mó kɛsi kpufɛɔ pum maa mɔsil lemasa, o va helɔɔ dunndo leŋuɛɛnu.

¹⁶ Mó toosiaa yɔlɔn pɔm-pɔmbɔn, mó kɛsi mun o sungbuan bolle. O kon kɔɔli, mó tuuliaa krenadeon taw, mó tomboliaa mun o yɔlɔn mun.

¹⁷ Mó simi sungbuan o cɛi kalaa hɔl-ndɔ, sungbule taselen o ba kɛndɔɔ coo, le diinndɔlen o ba mɛllo coo. Mó ke sungbule va o ba kɛndɔɔ coo len diolan aa Yakin (kon co dimio ni aa «Hala luei yoomuan ni»), mó ke len o ba mɛllo coo diolan aa Boas (kon co dimio ni aa «Kpaayaa co o Hala nin»).