2Dɛnnda lemasalan 2 - BII BILA

¹ Mí Salomɔn cua vanpiaandua vaalan belaŋɔmmɛw le volɔɔlan vilio, vaalan belaŋɔmaa le powtan siɔlɔɔ o pembon coo a vanpiaandua vàála yaa kɛmɛ leŋɔmpum le nda hɔlla landɔɔ coo.

² Mó viam kiilaa le Hiram, masaa Tir dimullo aa: «Tosal-la mɛɛ n tosal David fuɲa ni yɛ. Bau mí nɔm óò yɔngu ndu yɔmii sɛɛdrei le cɛi ndɔ ndu pila-o tangullo.

³ Tofa vɔ, i co Cɛiyo simio o diola Mɛlɛka Hala nuu, le Cɛi kon siinguuo teengen le ndu, le ansan lomɔɔ ndu o hɔl, le bulula sálàla co le Mɛlɛka lan vaa kɛsio lɔ́ɔ́-lɔ́ɔ̀ ndu o hɔl a le sálàla loamaala idiilan a sálàla icɔl-tan solio, le sálàla palɛi pɛngiaalan, sálàla paangun sɛnɛilan a le sálàla kafola Mɛlɛka Hala naa solio mɛɛ tɔŋndo yiilun Israɛlla le tosaa fɛɛn a fɛɛn yɛ.

⁴ Cɛi-Hala ya co hunɔɔ tangul-lo bɛnda mò nɔ ɲamaa, kani Hala naa hiow vaa o bɔɔ a halaa celennda kpow ni.

⁵ Kɛ nɛ̀ɛ́ tiw yɛ ba le ndu cɛiyo tengullo? Kani halataala co bɛɛ o bɔɔ nuaa taw, Hala nɔla sulɔɔ lon te, vana súú yɛɛ ya co yɛ le ndu cɛiyo tengullo? Fondaa daama ya co ndu tengul le ndu sálàla loamaalan solullo ni.

⁶ Lelan, vim ya vana caa sianion, volion, daɲan a cilinndon baalaa-o, o caa kolala keeselan yinɔɔ siaŋaa vólotótoo, yinɔɔ siaŋaa sɔɔtɔtɔɔ a yinɔɔ makaa-o, mò caa vɛlɛ tuuliaalan kɛmikɛmiaa-o, haliko mo tosa baalaa nda langbaa nia caa baalaa-a latulu, á co ya ikɛi Yerusalɛm o tàndá Yuda-o nin-nda, a David fuɲa ni ndóò hɛli-a pɛɛn.

⁷ Yɔŋ ya vɛlɛ yɔmii sɛɛdrei, yɔmii siprɛsiei a yɔmii santal-le, i fula o pembei Liban-nde, kani i sina maa vanaa kialaa iyɔmaa nɔmnda caa yɔmii co Liban lon-nde kiolɔɔ. Buɛyaa nia kɔanin le buɛyaa nɔmnda baala kon malaa.

⁸ Cuungial-la yɔmnde taw, kani Cɛi ya co hunɔɔ tangul-lo vanin o bɛndu, mo nɔ vɛlɛ ɲamaa taw.

⁹ I yɔngunin buɛyaa nɔmaa co yɔmnde kioŋndo ma va ndi kilio-a kpeyan n'mallo kilolan vàála ŋɔmpum, ɔrse kilolan vàála ŋɔmpum, mɔiyan litililan vaalan kɛmɛ leŋɔmaa a cuɛiyan litililan vaalan kɛmɛ leŋɔmaa.»

¹⁰ Mí Hiram, masaa Tir mulul Salomɔn aa: «Le tùú Mɛlɛka kaola vanaa ndɔa-o o siinguu nɔm masa ndaa ni.»

¹¹ Mó dimi vɛlɛ aa: «Biiloo co le Mɛlɛka Hala Israɛlla, o soli halataalaa a lɛŋnden-ndo, kani o yɔngu masaa David po kɔlkaloo, ó nɔ taasio a dɛnɛ sinaa-o, ó tangulnin Cɛi-Hala-o le Mɛlɛka a cɛi lemasaa le ndu pila-o.

¹² I co nɔm vanapɔnɔ kɔlkalu caa baalaa taw-vo vim, Hiram-Abi pɛɛn,

¹³ Tir fuɲa ndɔ fula ni, kɛ o polale Dan-nden nin kala ndɔ fula ni. O caa sianion, volion, daɲan, cilinndon, powtan a yɔmnde baalaa taw, o caa vɛlɛ kolala keeselan yinɔɔ siaŋa vólotótoo, yinɔɔ siaŋa sɔɔtɔtɔɔ, yinɔɔ makaa. Tuula súú-súù vana yɔngu ndu pɛ le kɛmikɛmiaa, o caa. O tosanin baalaa nda vanaa nɔmaa baalaa a vanaa baalaa vana ni bɛndoo David ndóò hɛli-a latulu. David fuɲa nɔm pɛɛn.

¹⁴ Lelan, vana ni bɛndoo, cuu niko buɛyaa nɔmnda maalon, ɔrse, cuɛima oliviean a mɔima n dimi-an.

¹⁵ O kon, mì naa naa n kelu yɔmnde Liban mɛɛ n yeema yɛ, mì n yoo nɔm ndi kpɔŋndan keiyo o mɛmma ihɛllan coo háá Yopé. Yɔmii ken tiiya pɛ lon, nɔm vili ndi niko Yerusalɛm.»

¹⁶ Mí Salomɔn cɔm mialaa va o lɛŋnde Israɛl-ten nin-nda kpow, a David fuɲa ndɔ ndóò sɛva diolan-nda pɛɛn. Má bɛnda faw vannda vaalan kɛmɛ beleŋuɛɛnu a layàá a n'van kɛmɛ leŋɔmpum (153 600).

¹⁷ Mó hɛli vannda vaalan belaŋɔmmɛw (70 000) le volɔɔlan vilio, vannda vaalan belaŋɔmaa (80 000) le powtan siɔlɔɔ o pembei coo, a vannda vàála yaa a kɛmɛ leŋɔmpum (3 600) le vanaa baalaa hɔlla landɔɔ coo.