2Dɛnnda lemasalan 19 - BII BILA

Yosafat kɛsi vanaa kialaa n'yamaa Yuda

¹ Mɛɛ Yosafat va masaa Yuda-o muungu a kɔlɲuloo o ndu lo Yerusalɛm,

² mí Yehu vana-tɛɛngaa-diom Hala-o, po Hanani-o kɔa ndu bɔŋaa, mó ɲuna ndu aa: «Le yɛɛ nɛ n mala yɛ vana vɔɔndo ho? Vanaa Mɛlɛka nɛɛnun-nda nɔm kaola ni? Kɔltuw Mɛlɛka-o toalnin nɔm coo le ɲɛ n tosa hoo-o.

³ Nduyɛ, nɔm óò tosa dɛnɛ kɛndɔɔ, kani má loam sooluulan o lɛŋnde nɔmnden nin, má kela vɛlɛ o nɛila Hala lan coo a kɔl nɔmndo kpow.»

⁴ Yerusalɛm ciee Yosafat va icali ni. Mó kei o lɛŋnden nin, kandɔɔ Bɛɛr-Seba háá o tàndá n'pembu Efraim-ndo nin, le Israɛlla dimullo ma muungu Mɛlɛka o ibuŋ, Hala fuɲaa ndaa mamaa pɛɛn.

⁵ Mó kɛsi vanaa kialaa n'yamaa o kobila mayoomula yɛ́-yɛ́la va o tàndá Yuda-o nin-ndan nin.

⁶ Mó dimul nda aa: «La tosa baalaa mɛɛ o bɛnda yɛ, kani o co le n'vanndaciee le niaa kialunin yaman te, kɛ le Mɛlɛka niaa. Telen oo telen niaa va pɛ yamɛi kiolɔɔ, ndu pila vanin niaa ikɛi.

⁷ Lelan, la ke ndu bɛɛlen mì la caa taw. Kani Mɛlɛka Hala naa mel sandii lepɛŋnde haki le, o mel vannda hiyanndo handɔɔ tɛɛn haki le, o mel vɛlɛ vannda ɲɔɔn poondiaa o laba le luɛyɔɔninndo haki le.»

⁸ Yerusalɛm ciee bɛɛ, mí Yosafat suili leviia, vanaa-solia-lasálàá a vanaa va bolii lapangɛi Israɛlla tɛɛn-nda pum le yaman kiolɔɔ o diola Mɛlɛka lan a le sɔɔn bɛɛndiaa vannda tɛɛn.

⁹ Mó dimul nda aa: «La ke Mɛlɛka bɛɛlen mì la tosa dɛnndan a toɲaa a kɔlta niaalan kpow.

¹⁰ Telen oo telen puapilɛa niaa co o kobilan nin-nda komal niaa pɛ a sɔɛi, o va sɔɛi diyaa vanaciee, o va sɔɛi tɛɛmbua tana, te kon te tɔŋ, o va sɔɛi naamu, o bɛnda mì la cɔm nda toɲaa, yɔŋii nda del kasi a Mɛlɛka, mò tambu kɔl a niaa a á puapilɛa niaa kan. Lende niaa bɛnda le tosaa ni, o kon sɔɛi venin niaa kuee le.

¹¹ Amaria, bolle vanaa-solia-lasálàá cɔmnin niaa dɛnnda lekaanndan kpow, mì Sebadia po Ismaɛl-lo, o co simlacinɔ polale Yuda len-ndo cɔm niaa dɛnnda lemasalan. Leviaa vanin niaa coo maa n'simlaci. La lueí yoomuan mì la tosa baalaa. Màá Mɛlɛka va vanaa co dɛnɛ kɛndɔɔ tosaa-a ikɛi!»