2Dɛnnda lemasalan 18 - BII BILA

Akab yiinan nda Yosafat le Aramiia delɔɔ coo a cɔwvo

¹ Mí Yosafat sɔla bolofaa a biiloo taw-taw. Mó luei lefei ndu nda Akab tɛɛn.

² Vɔsilan lapum hiovɔɔ o kon kɔɔli, mí Yosafat kɔa o Akab lo Samari. Mí Akab diw saa a nawva taw le ndu a le vanaa va ndu kɔɔli-a. Mó dimul ndu le kɔlan Ramɔt va o tàndá Kalaad-o nin-ndo delɔɔ coo a cɔwvo.

³ Mí Akab masa Israɛlla ɲuna Yosafat va masaa Yuda-o aa: «Vɛ̀ɛ̀ n kɔanin naa ŋiɔn le Ramɔt co o tàndá Kalaad-o nin-ndo delɔɔ coo a cɔwvo?» Mí Yosafat mulul ndu aa: «Naa nɔm, vanaa nɔmnda a vanaa nia, n kɔanin o cɔwvo latulu.»

Vanaa-tɛɛngaa-diom Hala-a va masaa Akab o ba bɛngu-a dimi maa Akab co yaamɔaa ndɔa nɔla

⁴ O kon kɔɔli, mí Yosafat dimul masa Israɛlla aa: «Kɛ a yandi, ɲuna fɔlɔn Mɛlɛka!»

⁵ Mí masa Israɛlla cuungiaa vanaa-tɛɛngaa-diom Hala-a ndɔa, a va le n'van kɛmɛ lehiɔɔlu, mó ɲuna nda aa: «Vɛ̀ɛ̀ i kɔ del Ramɔt co o tàndá Kalaad-o nin-ndo coo a cɔwvo baa i kɔa le?» Má mulul ndu aa: «Kɔ, kani Mɛlɛka malnin kobi kon nɔm o ba.»

⁶ Kɛ mí Yosafat ɲuna aa: «Vɛ̀ɛ̀ vana-tɛɛngaa-diom Hala celen co nanu le Mɛlɛka ɲunaa le?»

⁷ Mí masa Israɛlla mulul Yosafat aa: «Vana-tɛɛngaa-diom Hala-o pum co nanu le Mɛlɛka ɲunaa, kɛ i yeema ndu le, kani o dimul-la sɔɔn kɛndɛ lɔ́ɔ́-lɔ́ɔ̀ le, fɔ sɔɔn vɔɔnndon kínɛí, Misee po Yimla-o pɛɛn.» Kɛ mí Yosafat deŋul ndu aa: «Masa suu nuaa le!»

⁸ Mí masa Israɛlla veelu vana bɛndoo o pilɛ, mó viam ndu aa: «Kɔ fɔ́ɔ́fɔ̀, ma hin a Misee po Yimla-o.»

⁹ Masa Israɛlla a Yosafat masaa Yuda va icali nda ŋiɔn kpow o kpɛŋɛla lemasala ndalan coo, o falii va o dio luɛyaa kobio Samari-e hɔl-ndɔ-e a volɔɔla lemasalan lekɔɔ, mí vanaa-tɛɛngaa-diom Hala-a kpow a va sɔɔn tosannin-ndon dimio nda o hɔl.

¹⁰ Mí Sedekia po Kenaana-o ndóò toosiaa leela n'cilinndan, mó dimi aa: «Mɛlɛka dimi maa a leelan ndan n kuindikuindinin vanaa cɔvaa Aramiia ni háá mà cii nda diw.»

¹¹ O kon mí vanaa-tɛɛngaa-diom Hala-a tɔ̀a kpow cɛl diom pilɛ kon, má dimi aa: «Kɔ cɔlɔba Ramɔt co o tàndá Kalaad-o nin-ndo, Mɛlɛka malnin nɔm kobi kon o ba, ma nɔla ndu.»

Misee dimi diom Hala-o

¹² Mí kiilanɔ kɔɛ Misee veelu-o dimul ndu Misee aa: «Vanaa-tɛɛngaa-diom Hala-a kpow cɛlan le masaa sɔɔn kɛndɔn tɛɛngullo aa o nɔlanin cɔwvo, lelan nɔm bɛɛ kɔ ma kɔ dimul ndu diomnda kɛndɛlan maa nda.»

¹³ Kɛ mí Misee muli aa: «Te Mɛlɛka co yoomu, i dimulnin ndu ɲɛ Mɛlɛka dimulnin ya-o!»

¹⁴ Mɛɛ Misee tiiya o masaa lo, mí masaa ɲuna ndu aa: «Misee, vɛ̀ɛ̀ n kɔ del Ramɔt co o tàndá Kalaad-o nin-ndo coo a cɔwvo baa n kɔa le?» Mí Misee mulul ndu aa: «La kɔ, la nɔlanin, kani Mɛlɛka malnin kobi kon nɔm o ba.»

¹⁵ Kɛ mí masaa cɔɔlu ndu ɲuna aa: «Vɛ̀ɛ̀ kpɛ́ n mɛnalan yɛnin ya kpeekpei le ya toɲaa dimullo o diola Mɛlɛka lan?»

¹⁶ O kon mí Misee mulul ndu aa: «I ce Israɛlla kpow a sɛŋiannda o pembon coo maa saa nɔ vana mandaa le-a. Nduyɛ Mɛlɛka dimi aa: ‹Vannda ha nɔ lɛ simlacinɔ le, lelan, vana-vana muungun o ndu lo a kɔlɲuloo.›»

¹⁷ O kon mí masa Israɛlla dimul Yosafat aa: «Vɛ̀ɛ̀ i dimul nɔm te? O dimul-la sɔɛi kɛndɛ lɔ́ɔ́-lɔ́ɔ̀ le, fɔ sɔɔn vɔɔnndon.»

¹⁸ Mí Misee cua vɛlɛ sɔɛi, mó dimi aa: «Tuei-yɔ niko diom Mɛlɛka dimi-o. A toɲa, i ce Mɛlɛka icali o kpɛŋɛ ndɔ lemasaa nin o halataala, vanaa ndɔa baalaa va isisi ndu ikɛi, má balu ndu o ba kɛndɔɔ coo a o ba mɛllo coo sɔ́.

¹⁹ Mí Mɛlɛka ɲuna aa: ‹Nɛ̀ɛ́-nɛ̀ tiw yɛnin ba Akab dɛɛniaa, haliko mo kuel Ramɔt co o tàndá Kalaad-o nin-ndo a cɔwvo, mò kɔ vu lon?› Kɛ mí vana-vana muli muli ndɔ.

²⁰ O kon, mí yiyanndo pum fula, mó sim Mɛlɛka o hɔl, mó dimi aa: ‹Ya dɛɛniaanin ndu ni.› Kɛ mí Mɛlɛka ɲuna yiyan kon aa: ‹Vɛɛ nɛ n tosa yɛnin?›

²¹ Mí yiyan kalaa muli aa: ‹I co lakɔ, mì kɔ siŋnun yiyan lacòòvaa, mì còòlan la luɛi vanaa-tɛɛngaa-diom Hala-a masaa kpow o lasondo.› O kon mí Mɛlɛka mulul ndu aa: ‹Mɛɛ a nɔlanin ndu dɛɛniaa lekɛ́ndɛi, fula ma kɔɛ, ma kɔ tosa mɛɛ n dimi nuaa yɛ!›

²² Lelan Mɛlɛka luei yiyan lacòòvaa vanaa-tɛɛngaa-diom Hala-a nɔmnda kpow nin nuaa ni. Kani o cii nin kiolɔɔ le nɔm dɛnɛ palaa tuisio coo».

²³ Fɔ́ɔ́fɔ̀, mí Sedekia po Kenaana-o sɔɔnguu, mó lɔaa Misee kpaŋnde, mó ɲuna aa: «Vɛ̀ɛ̀ kpeekpei yiyan Mɛlɛka-o fula yɛ ya nin le nɔm sɔɔn mun dimullo?»

²⁴ Mí Misee mulul ndu aa: «A biinin sɔɔn mun bila telen n vanin vinivininndo o cɛilan nin-ndo.»

²⁵ Mí masa Israɛlla dimi aa: «La bii Misee mì la kɔɛ a ndu o Amon simlacinɔ kobio a o Yoas po masaa lo,

²⁶ mì la kɔ dimul nda aa ya laa a kinda langbanɔɔ ho o kaasoo, mà va ndu buloo a mɛnndan daama yɔngoo, háá telen ya fulanin o cɔwvo, mì muungu nanu kɛndia a o kɔlɲuloo nin-ndo!»

²⁷ O kon mí Misee mɛnalan ndu aa: «Taa muungu pɛ nanu kɛndia a o kɔlɲuloo nin few, mɛɛ o co Mɛlɛka le vem ya nɔm sɔɔn mun tɛɛngullo le!» Mí Misee dimul vɛlɛ vannda aa: «Niaa vannda súúlan kpow la yaŋnun mì la va lesei!»

Masaa Akab sɔla piɔ́mndo o cɔwvo

²⁸ O kon, mí masa Israɛlla nda Yosafat masaa Yuda a can le kɔlan Ramɔt va o tàndá Kalaad-o nin-ndo delɔɔ coo a cɔwvo.

²⁹ Mí masa Israɛlla dimul Yosafat aa: «I co kaandian mì ven hɔlla, mì kɔɛ le cɔwvo. Kɛ nɔm nɔm cuɛinun volɔɔla nɔmnda lemasalan». Mí masa Israɛlla kaandian le kɔlan o cɔwvo.

³⁰ Kɛ nduyɛ, masaa Aram ndóò cii nin simlacia vanaa ɲaanun ɲɛla ndɔla cɔwla soa nan-ndan-nda dimul aa: «Niaa niaa cɔlɔba vanaa cɔvaa Israɛlla le, la cɔlɔba vɛlɛ simlacinɔ vanaa ndaa cɔwva le, kɛ la cɔlɔba masa Israɛlla kínɛí.»

³¹ Tuma simlacia vanaa cɔvaa ɲaanun a ɲɛla ɲaanannda soa nan-ndan-nda a ce Yosafat-o, má dimi aa: «A toɲa masa Israɛlla co hoo ni.» Má balu ndu le ndu delɔɔ coo. Kɛ mí Yosafat mɛli yeelan, mí Mɛlɛka mala ndu, mó mingi nda hɔlla nɛɛ celen.

³² Simlacia vanaa ɲaanun o ɲɛla ɲaanannda soa nan-ndan coo-a sinaa maa o ve Akab masa Israɛlla le, má faŋan ndu kɔɔli, má kɔannun.

³³ Kɛ mɛɛ langbanɔɔ pum vuu kpaasiaa ndɔɔ o vana sinan dɛnɛ loo nin, mí kɔɛi kɔ bii masa Israɛlla o pɛngɛn doma cɔw va ndu lekɔɔ-o tɛɛn. O kon mí masaa dimul vana va ɲɛ ɲaanan ndɔ soa nan-ndo kɔlan laci-o aa: «Mulin ma faŋa ya o cɔwvo ho nin nanu, kani a yɔŋul la.»

³⁴ Cɔwvo ndóò kendu paale len taw, mí masa Israɛlla kɔ niinu isisi kpɛŋ o ɲɛ ɲaanan ndɔ soa nan-ndo nin le cɔwvo nda Aramiia, mí kooma bolin ndɔɔ ma lo tolɔɔ o ɲɛ ɲaanan kon nin háá icɔllo, mó vu.