2Dɛnnda lemasalan 16 - BII BILA

Cɔw yɔŋnun Asa nda Baesa tɛɛn-ndo

¹ Paale pilɛ, o vɔsi beleyaa a o ŋɔmpumndɔɔ o masale Asa len bɛngu, mí Baesa va masaa Israɛl-lo del tàndá Yuda-o coo a cɔwvo, mó kɔ kungulan Rama. Asa nda Yudaa ve lɛ kela bɛɛn-bɛɛn kpengii ken te.

² Mí Asa cua volion a sianion o cɛi mandaa bolofaala Cɛi-Hala-o nin, a o cɛi ndɔ lemasaa nin, mó viam vanaa bɛndua va ndu o ba bɛngu-a a mun Damas, o Bɛn-Hadad va masaa Aram-ndo lo le ndu dimullo

³ maa o yeema mì kpemaa va nda tɛɛn nda ndu, maa mɛɛ o va fuɲa ndaa mamaa tɛɛn yɛ. Lelan o ke ndu volion a sianin mun ni, haliko mo kɔ tɛɛmbuu kpema va ndu tɛɛn nda Baesa va masa Israɛlla-o, haliko mo faŋa vanaa ndɔa cɔwva o lɛŋnde ndɔlen nin.

⁴ Mí Bɛn-Hadad cɛl diom masaa Asa dimul ndu-o. Mó viam simlacia vanaa ndɔa cɔwva, má kɔ del kobila va o lɛŋnde Israɛl-ten nin-ndan coo a cɔwvo. Má nɔla Iyon, Dan, Abɛl-Mayim, kobila ndáà kɛsi baloo a ɲɛm cɔwvon nin o tàndá Nɛftali-o nin-ndan.

⁵ Lɔ́ɔ́ Baesa tuei sɔɛi ken-ndo, mó faŋa vanaa cɔwva Rama, mó muungu, mó kɔ cal Tirsa.

⁶ O kon mí masaa Asa veelu Yudaa kpow le kɔlan powtan a pɛngɛn Baesa ndóò cuungiaa Rama le tangullo-on vilio, le tangul celen Keba a Mispa.

Asa mal Hanani, vana-tɛɛngaa-diom Hala-o o kaasoo

⁷ Mí Hanani, vana-tɛɛngaa-diom Hala-o kɔa o Asa, masaa Yuda lo, mó dimul ndu aa: «Le tùú n kɛɛ le Mɛlɛka Hala nɔmndo tiindanndo, má tiindan masaa Aram-ndo, vanaa cɔvaa ndu masaa Aram hɛlun nɔm ni.

⁸ Yiyan ndɔ, vanaa cɔvaa Etiopiia a vanaa cɔvaa Libiia ndáà nɔ yoomuan taw, ɲɛla ɲaanannda soa nan-ndan a vanaa ɲaanun o soa coo-a a va sɛ́lɛ́ taw, kɛ a kon kpede, mí Mɛlɛka mal nda nɔm o ba, kani ndu nɔm óò tiindan ni.

⁹ Kani Mɛlɛka co hɔlten keelaa o lɛŋnden kpow coo le vanaa kaola ndu a kɔlta ndalan kpow-va malaa. Maa diɔm n tosa dɛnndan o sɔɛi he nin ni. Lelan, kandɔɔ sisa háá le fɛɛn a fɛɛn nin, cɔwlan la cuunin nɔm coo le.»

¹⁰ Mí Asa tambu kɔl taw a vana-tɛɛngaa-diom Hala-o le sɔɔn o dimi mun-ndon. Mó bii ndu, mó mal ndu o kaasoo. Mó saangiaa vannda pum taw o telen kon bɛngu.

Mɛɛlula masale Asa len

¹¹ Sɔɔn tɔ̀un Asa-on kpow, kandɔɔ háá o mɛɛlulan, n co n'sɛvan o sɛbɛ Masaa Yuda a masaa Israɛl nin.

¹² O vɔsi beleyaa a o ŋɔmahiɔɔlundɔɔ nin, o masale ndɔlen nin, mí nàà n'pelu vɔɔn-vɔɔndo bii ndu, mó sanga taw-taw. Kɛ hali a nàà kàlà-kálà kon, o ɲuna Mɛlɛka le mala sɔla le, mó mulin mandea kelaa kɔɔli.

¹³ Vɔsi Asa suili vɔsilan belehiɔɔlu a ò pilɛ o masalen-ndo, mó vu.

¹⁴ Má kumbu ndu o sɛi ndóò tuwnun o Kobi David-o nin-ndo nin. Má yambu ndu o fonda vanaa toosiaa ansan-nda ndáà kɛsi lasikɔlɔ súú-súù ka-o coo. Má loam ansan taw-taw le ndu bɛɛle keo.