2Dɛnnda lemasalan 10 - BII BILA

SƆƆN MASAA YUDA (10—36) Israɛlla bɔɔŋian Sikɛm le masaa suilio: Sɛyanndo yɔŋnun

¹ Mí Roboam kɔa Sikɛm, kani Sikɛm lon Israɛlla kpow ndáà kɔɛ le ndu suilio masaa ni.

² O telen kon, Yeroboam po Nebat-o va Esipte, nɛɛ ndóò ɲaanun masaa Salomɔn-nda. Ndóò tueyɔɔ a bɔɔŋian kon o kɔɔ, mó mal Esipte, mó kɔa.

³ Má viam vannda le kɔlan ndu veeloo. Mí Yeroboam nda Israɛlla kpow a tiiya o Roboam ndo, má dimul ndu aa:

⁴ «Biyɔɔ lecɛo tuŋ fuɲa nɔm va naa ni. Lelan n co nɔm tɛɛlɔn mì nɔm dɔɔnial naa cɛle co naa len coo len, mì n tosal nɔm baalaa.»

⁵ Mó dimul nda aa: «Bala tiɔn! La kɔ, palɛi yaa i hiow pɛ la muungu nanu.» O kon mí vannda kɔannun.

⁶ Mí masaa Roboam koma ɲuna kaasoŋaa kɔlkalua va Salomɔn fuɲa ndɔ ikɛi telen o va yoomu-o-a aa: «Sila yɛɛ niaa nɔ yɛ le ya le vannda ha mulullo?»

⁷ Má mulul ndu aa: «Hau, taa siŋnun pɛ vana baala vannda ha, taa tosa pɛ ɲɛ nda dimi-o, taa dimul nda pɛ sɔɔn kɛndɔn, mɛɛ vanaa kalaa co hunɔɔ siŋnɔn buɛyaa nɔmnda le lɔ́ɔ́-lɔ́ɔ̀.»

⁸ Kɛ mí Roboam kɛɛ sila kaasoŋaa kɔlkalua yɔngu ndu-o, mó kɔ ɲuna langbaa felengia va lambi ndɔɔ ma va ndu ikɛi-ya.

⁹ Mó dimul nda aa: «Vannda ha ɲuna ya le volɔɔ lusulaa fuɲa nuu handu nda o lebol-lo dɔɔniaa. Sila yɛ̀ɛ̀ niaa co yɛ ya yɔngu haliko mi kɔ mulul nda?»

¹⁰ Mí langbaa felengia va kan lambi ndɔɔ-a mulul ndu aa: «Mulul vanaa dimul nɔm kan maa fuɲa nɔm bii nda biyɔɔ lecɛo, kɛ nɔm yɔnyɔla nda-a aa: ‹Suei nii pɔmbɔɛi hiow ba fuɲa nuu celullo.

¹¹ Lelan, te volɔɔ lusulaa fuɲa nuu ndóò siilu niaa paandu ni, o laan nin, volɔɔ niaa nɔla cua loo ya co niaa siiluu ni. Te a sionnden fuɲa nuu va niaa paandu lɔɔ ni, ya i co niaa hunɔɔ soŋɔ̀ɔ̀ a kɔlule kpeendaalen.›»

¹² Paale yàándɔlen, mí Yeroboam nda vannda kpow a muungu o Roboam ndo mɛɛ ndu masaa ndóò dimul nda yɛ.

¹³ Ndáà kɔlan, o kɔ mulul nda diomnde kɛndɛ le, kani o bii sila kaasoŋaa kɔlkalua yɔngu ndu-o le.

¹⁴ Mó mulul nda mɛɛ langbaa felengia nda va lambi pilɔɔ-a ndáà sila ndu yɛ aa: «Te volɔɔ lusulaa fuɲa nuu ndóò siilu niaa paandu ni, o laan nin, volɔɔ niaa nɔla cua loo ya co niaa siiluu ni. Te a sionnden fuɲa nuu va niaa paandu lɔɔ ni, ya i co niaa hunɔɔ soŋɔ̀ɔ̀ a kɔlule kpeendaalen.»

¹⁵ Nuaa masaa kɛɛ ɲɛ vannda ndáà ɲuna ndu-o ni, kani Hala pila cɛl ken kpow ni, haliko mi sɔɛi Mɛlɛka ndóò dimul Ahiya fula Silo le Yeroboam po Nebat-o tɛɛngullo-e ndíì peelun.

Masalen Israɛl le piɔvan tɛɛn

¹⁶ Mɛɛ Israɛlla kpow a ce maa masaa ve nda lani yaŋɔɔ le, má mulul ndu aa: «Yɛɛ co yɛ naa tɛɛn naa David-aa? N nɔ kɛ́ latulu naa po Yisai-yo-aa le! Sei! Naa Israɛlla, n muungun o la naa lo cɛinin. Nɔm po David-o ho, a ce cɛi nɔmndo, koma tosa mɛɛ n yeema yɛ.» O kon mí Israɛlla kpow a muungun o la nda lo.

¹⁷ Fɔ Israɛlaa va icali o kobila va o tàndá Yuda-o nin-ndan-nda coo Roboam tosa masalen ni.

¹⁸ O kon mí masaa Roboam viam Hadoram va baala lepɔtɔllo bollen-ndo. Kɛ mí Israɛlla kɔ vii ndu a powtan, mó vu. O kon mí masaa Roboam hel o ɲɛ ndɔ ɲaanan soa nan-ndo coo, mó ɲaanun Yerusalɛm.

¹⁹ Nuaa Israɛlla tosa seesiɛi a yungu David-o ni, nduyɛ háá paalen nden a co vɔ lecoo.