2Dɛnnda lemasalan 1 - BII BILA

DƐNƐ SALOMƆN MASAA ISRAƐL-LO (1—9)

¹ Mí Salomɔn po David-o simi masale ndɔlen yili, kani Mɛlɛka Hala ndɔɔ va ndu ikɛi, mó siinguu ndu masa tɔ́ɔ́ bɛndoo.

Salomɔn piɛi Hala le ndu kɔl taasio yɔngoo

² Mí Salomɔn veelu Israɛlla kpow, simlacia kundala vanaa cɔvaa n'van vàá-vàálan, simlacia kundala n'van kɛmɛ-kɛmɛlan, vanaa kialaa n'yamaa, vanaa va bolii lapangɛi-ya a simlacia Israɛl,

³ mó kɔa a nda kpow o Fonda-Diandaa va Kabaɔn-ndo, kani lon cɛi-kola-toandaa-labɔɔŋian Hala-o va ni, ó Moise vana baala Mɛlɛka-o ndóò toosiaa o lɛŋnde veselɛilen nin-ndo pɛɛn.

⁴ Mí David cua kesu kpema Hala-o Kiriat-Yearim, mó kɔ kɛsi ndu o fonda ndóò toosiaa o cɛi-kola-toandaa bɛngu-o. Kani ndóò cii nin cɛi kon tangul Yerusalɛm le kesu kalaa.

⁵ Kɛ fonda-loamaa-lasálà n'daɲa Bɛtsalɛl, po Uri-o, po imama Hur-o ndóò toosiaa-o va Kabaɔn ndon, o Calta Mɛlɛka lan hɔl-ndɔ. O kon, mí Salomɔn a vanaa ndáà kɔɛ ndu kɔɔli-a kpow a piɛi Mɛlɛka.

⁶ Mí Salomɔn hel o fonda-loamaa-lasálà n'daɲaa coo, ó va Mɛlɛka o hɔl-ndɔ o cɛi-kola-toandaa-labɔɔŋianndo nin-ndo, mó soli sálàla loamaalan vàá pilɛ.

⁷ Icɔl kon, mí Hala cɔmnun Salomɔn, mó dimul ndu aa: «Ɲuna ya ɲɛ n yeema mì yɔngu nɔm-ndo.»

⁸ Mí Salomɔn mulul Hala aa: «A tosal David fuɲa ni dɛnɛ kɛndɔɔ taw, ma siinguu ya vɛlɛ masaa o fonda ndɔɔ.

⁹ Lelan, peelu kpema nɔm óò yiilul ndu-o, kani a siinguu ya masaa vanaa sɛ́lɛ́ bɛndua ha coo, á co haa sɛ́lɔ́ɔ́ maa cundoo lɛŋ-nda.

¹⁰ Ke ya niko kɔlkaloo a sinapɛngoo, haliko mi caa kelaa vannda ha o hɔl. Kani te o co kon te, vana-vana tiwba mò tosa masalen vanaa nɔmaa sɛ́lɛ́ bɛndua ha coo le.»

¹¹ Mí Hala dimul Salomɔn aa: «A ɲuna le siŋnɔnndo vana bolofaa bɛndu le, a ɲuna ɲɛ-sɔlaa bɛndu te kon te tɔ́ɔ́ bɛndu le, a ɲuna le yaamɔaa nɔmnda vuo le, a ɲuna le si vilɛiyo sɔlaa le, kɛ ma ɲuna kɔlkaloo a taasio le mɛɛ n tiwba ma tosa masalen vanaa nia coo yɛ, a ya siinguu nɔm masaa coo-a, kani yiyan co nɔm o kɔl kpeekpei-yo co kon ni.

¹² Lelan, i ke nɔm kɔlkaloo a sinapɛngoo. I ke nɔm vɛlɛ bolofaa taw, ɲɛ-sɔlaa a biiloo, hiovɔɔ masaa tosa masalen nɔm tase-a a masaa vanin nɔm kɔɔli-a coo.»

¹³ O kon, mí Salomɔn faŋan o Fonda-Diandaa Kabaɔn nɛɛ cɛi-kola-toandaa-labɔɔŋianndo va-a, mó muungu Yerusalɛm. Mó kɔ va masalen tosaa Israɛl.

Kpaayaa a bolofaa Salomɔn-ndo

¹⁴ Mí Salomɔn cuungiaa ɲɛla ɲaanannda soa nan-ndan a soa. Mí la bɛnda faw-faw vàá pilɛ kɛmɛ lehiɔɔlu a vanaa ɲaanun o soa coo-a vannda vaalan tɔ́ a latiɔn. Mó mandan lapum ikɛi Yerusalɛm, mó piɔw latɔ̀lan o kobila ndóò toosiaa le lan mandaa lan nin.

¹⁵ Mí masaa tosa mí volion a sianion n kui maa lapow, mí yɔmii sɛɛdrei kui maa buumbui va o dɛɛlalan nin-nde.

¹⁶ Esipte soa va Salomɔn o ba-a ndáà fula ni, lon yulaa ndáà kɔa nda piondɔɔ le masaa ni.

¹⁷ Ɲɛ ɲaanan soa nan-ndo o pilɛ volin latámán kɛmɛ leŋɔmpum, sow o pilɛ volin latámán kɛmɛ beleŋuɛɛnu, lende yulaa ndáà kɔa kan Esipte-a va ɲɛm mun piondɔɔ ni. A va vɛlɛ masaa Hitiia a masaa Aramiia ɲɛm mun yoo.

Salomɔm bɛɛndian le Cɛi-Hala-o tangullo

¹⁸ Mí Salomɔn kialun o kɔl le Cɛiyo tangullo o diola Mɛlɛka lan a le cɛi lemasaa tangullo le ndu pila.