1Timote 5 - BII BILA

Mɛɛ vana tosa a vanaa laalannda yɛ

¹ Sɔaa bɛndu yuuvɛiyo a paa-kala le, kɛ soo ndu o lani mɛɛ n sɔaa fuɲa nɔm o lani yɛ. Cɔ langbanɔ felengoo maa puapilɛ nɔmndo,

² mà ce vanlaandua kaasonnda maa kala nɔm, mà ce vanlaandua felengia maa yeemaa nɔmnda, mà dendu nda o hɔl o nɛilan kpow coo.

³ Ke vanlaandua piaandaa ndaa vi-a bɛɛlen, a co nda pilɛ lekɛ́ndɛi-ya.

⁴ Kɛ te vanalanɔ pɔnɔ ndɔ vi-o nɔ pɛ cuawva, te kon te mò nɔ cuavaa-imamaa, cuavaa kan bɛnda mà tosa dɛnndan mɛɛ laalan ndaa co yɛ. O kon, a mingi ɲɛ fuɲaa ndaa mamaa tosal nda-o. Kani kon hɛnan Mɛlɛka ni.

⁵ Vanalanɔ pɔnɔ ndɔ vi mò va ndu pilɛ-o, o tiindan Hala-o, paalen a ɲumndan, o co Hala biuvɔnndo piɛiyo le malaa sɔlaa.

⁶ Kɛ vanalanɔ pɔnɔ ndɔ vi mò va yeemɛi ndɔɛi ndu pila-e tosaa-o, maa vana vílɛ́i koni ndu co nin ni, hali o va bɛɛ yoomu.

⁷ Silala n nɔ le nda yɔngoo lan la co lan ni, yɔŋii vannda yaala nda.

⁸ Te vanndo mulul vanaa ndɔa hɔlla le, kɛ taama-taama yungu ndɔɔ, mɛɛ o mal laalanndo, vana vaa lende hiow levɔw a vana laalan too.

⁹ Le diola vanalanɔ pɔnɔ ndɔ vi-o sɛvaa o diola vanlaandua piaandaa vi-a coo, mɛɛ mò nɔ vɔsilan kandɔɔ belaŋɔmpum. Handɔɔ o kon coo, mò va vana kei vanapɔnɔɔ ndu pilɛ o ba o nɔu-vo,

¹⁰ mò nɔ tɔ́ɔ́ kɛndɔɔ le dɛnnda kɛndɛla ndɔlan, mò va vana caa cuavaa ndɔa biyɔɔ-o, mò va vana caa mialla biyɔɔ-o, mò va vanaa diandaa pelon pulɔɔ, mò va vanaa sangaa co coo-a malaa, mò kindin le dɛnnda kɛndɛlan kpow tosaa.

¹¹ Kɛ cɛ̀l le vanlaandua felengia piaandaa ndaa vi-a diolan sɛvaa le, kani taa yiyan pɛ le calle piaandua celen o ba o nɔu, a mulul Krista kɔɔ.

¹² O kon yɛ, yaalaa nda sɔlanin ni, le tùú nda tɛɛmbuu kpema tase nda yii-o o.

¹³ Handɔɔ o kon coo, a luɛi siɛlɛiyo, a cɛn keiyo balɔɔ cɛilan nin. Handɔɔ vɛlɛ o siɛlɛi kon coo, a siŋnun vanaa tombolaa a vanaa vow sondolan o sɔɔn pilan nin-nda, a muungu sɔɔn nda bɛnda le dimi loon dimio.

¹⁴ Lelan, i yeema mì cuavaa laandua felengia piaandaa ndaa vi-a cal o nɔla celen, mà sɔla cuawva, mà bii yungule ndalen, yɔŋii yaamɔɔa sɔla nɛiyo le sɔɔn vɔɔnndon dimio a naa o kɔɔ.

¹⁵ Kani a pum a cii nin nɛi toɲaa malɔɔ, má del Setana kɔɔli.

¹⁶ Kɛ te vanalanɔ laalanndo nɔ pɛ vanlaandua piaandaa ndaa vi-a o vanayan ndɔn nin, o bɛnda mò mala nda. O handu vanaa Krista-aa sɔɛi ken coo le, haliko mi vanaa Krista-a kan mala vanaa piaandaa ndaa vi mà lo nda pilɛ-a.

¹⁷ Kaasoŋaa kɔlkalua co sɔɔn vanaa laalannda simndan laci ɲɛkɛndɛi-ya a nɔ bɛɛlen sala tiɔn, kɛ taama-taama a co diom Hala-o dimio mà va ndu vannda pɛɛkoo-a.

¹⁸ Kani sɛbɛ Hala-o dimi aa: «O bɛnda mì la yii naw co maalon nɛiyo-o sondoo le.» O co vɛlɛ o sɛvaa aa: «Vana vallo bɛnda mò sɔla sala ndɔɔ.»

¹⁹ Cɛ̀l mì vannda yaala bɛndu kɔlkaloo o sɔɔn nin te, te o co mì vanaa ŋiɔn te kon te vanaa yaa tɛnda seile len te.

²⁰ Soo vanaa co dɛnnda lahakilan tosaa-a vannda kpow o hɔl, o kon mì vanaa tɔ̀a yɔŋ siòònde.

²¹ I co nɔm ɲuna Hala o hɔl, Yeesu Krista a mɛlɛkaa sɔla hɛlio-a kpow o hɔl, mà bii silalan ndan, hiyan vana-vana le, tosa ɲɛ-ɲɛ a lakafa le.

²² Keleŋa baa handɔɔ vanndo coo le, luei balan o yɔŋ vɔɔn caanda nin te. Nɔm pila mandan mà va o diandaa.

²³ Kol lɛ mɛnndan daama le, kɛ kol mɔiyan ɲɛ-pɔmbɔ le dembe co nɔm nɛiyo-o a le nààla co nɔm palaa lɔ́ɔ́-lɔ́ɔ̀ lan.

²⁴ Vanaa pum a co, lɔ́ɔ́ pá mì hakila ndalan la kelun iyama, la cɔmnun vakpa. A pum yɛ, a cii nin fɔlɔn ndan iyama kiolɔɔ, malan la koma cɔmnun.

²⁵ Lende koni, dɛnnda kɛndɛlan bɛɛ, cɔmnɔmndo la cɔmnun ni vakpa, la co yɛ la kɛndɛ le, lan bɛɛ la lo la vianaa le.