1Timote 3 - BII BILA

Silalan le simlacia vanaa laalannda

¹ Sɔɛi toɲɛi co hee ni: te vana pum yeema pɛ le simlacilen sɔlaa vanaa laalannda tɛɛn, mɛɛ baala sɔvɛɔ o yeema lende ni.

² Simlacinɔ vanaa laalannda bɛnda mò va vana yaalan too, o bɛnda mò nɔ lanɔɔ ndu pilɛ kpé, mo va vana tosa sɔɔn tùúlen-ndo, vana taasio, vana bii kɔl ndɔɔ-o, mo va vana caa mialla biyɔɔ-o, mo tiwba pɛɛkoo,

³ o yɔngún mɔiyan te, o va vana lacɔlɔba le, kɛ mò va vana cii sɔngɔlan-ndo a vana kɔlɲuloo. O va vana nɔ hɔlte ɲɛ-sɔlaa-o le.

⁴ O bɛnda mò va vana caa yungule ndɔlen biyɔɔ-o, vana cuavaa ndɔa tuei diom mà bii sɔɛi ndɔɛi-yo.

⁵ Kani te vanndo cee yungule ndɔlen biyɔɔ le, vɛ̀ɛ̀ o tiw yɛnin ba mo caa vanaa Hala-a biyɔɔ?

⁶ O va vana laalan sɛnɛi-yo le, yɔŋii yongaa piɔ ndu nin, mò sɔla yaalaa maa mɛɛ ɲina vɔɔndo sɔla yaalaa yɛ.

⁷ Mɛɛ mì vanaa ceenda tɛnda seile ndɔle kɛndɛlen, yɔŋii o tambu tɔ́ɔ́ mo haw o yaŋɔɔle ɲina vɔɔndo.

Le vanaa baalaa Hala-a co simlacia malaa o vallo nin vanaa laalannda tɛɛn-nda

⁸ Lende vɛlɛ koni, vanaa baalaa co vannda malaa o kunda vanaa laalannda tɛɛn-nda bɛnda mà va vanaa kennùn bɛɛlen-nda, ma va vanaa toɲaa. A yɔngun mɔiyan te, a va vanaa nuwviaa tɔnɔ lakafa-a le,

⁹ mà va vanaa bii sɔɛi toɲa kpeekpeiye a laalanndo a á yiyan kɛndɔɔ-a.

¹⁰ Mɛɛ mì vana tɔɔndan nda fɔlɔn, te vana seelun ɲɛ-ɲɛ o kon kɔɔli le, a tosa niko vallo le vanaa laalannda malaa.

¹¹ Laandaa ndaa bɛɛ bɛnda mà va vanaa lebɛɛa, a va vanaa balu a caanda o lasondo-a le, mà va vanaa tosa dɛnndan tùúlen-nda, á lo o lediom coo o dɛnndan kpow nin-nda.

¹² Vana co vanaa laalannda malaa-o bɛnda mò nɔ lanɔɔ ndu pilɛ kpé, mo va vana caa cuavaa ndɔa a yungule ndɔlen biyɔɔ-o.

¹³ Kani bɛɛlen pila vanaa co baalaa tosaa ɲɛkɛndɛi-ya a sɔla caaŋaa ndaa vanaa laalannda tɛɛn ni, ma soo vɛlɛ vakpa a tiindanndo le laalan naa n nɔ o Yeesu Krista nin-ndo.

Sɔɛi viannaŋii bɛndu-bɛnduei

¹⁴ I co nɔm sɔɔn mun sɛvallo, kani i va yiyanndo maa i co lakɔ niaa yilɔɔ lediinndoo,

¹⁵ kɛ te i yala lakɔ le, sɛbɔɔ ho malanin nɔm pɔɔ le sinaa mɛɛ vannda bɛnda mà va kelaa o Cɛi-Hala-o nin yɛ, vanaa laalaŋaa Hala nɔ yoomoo o ba-o-a pɛɛn, nduyɛ nda co sungbulen a tiindan toɲaa ni.

¹⁶ A toɲa, sɔɛi viannannde he i co i bɔɔ le laalan naa: Yeesu cɔmnun maa vanaciee, mí Hala Kɔl-Diandaa ke ndu di, mó cɔmnun mɛlɛkaa, mí vannda kɔ dimi sɔɛi ndɔɛi vanaa-mangalaa-isɔɔa tɛɛn, mí vannda laalan ndu o ceendo coo, mó helnun o halataala o biiloo nin.