1Timote 1 - BII BILA

Yilɔɔlan

¹ Ya Pol kiilanɔ Yeesu Krista-o, o Hala Vana naa Ciindiaa nda Yeesu Krista Vana naa n tiindan-ndo vem-ndo, ya co sɛbɔɔ ho sɛvaa ni.

² Le Timote, po ni kpeekpeiyo o laalanndo nin. Màá sɔla kɛndɛi, ɲííye tuinɔnndo a kɔlɲuloo fulaa Hala Fuɲaa a Maalii naa Yeesu Krista o ba!

Kaannde lacòòvalen

³ Lɔ́ɔ́ ya va kɔlan Maseduan-ndo, mí sila nɔm le lou Efɛs, haliko ma kpaa vanaa pum, mà pɛngi pɛɛkula lacòòvalan yɔngoo.

⁴ Dimul nda maa a mal talelan a diola fuɲaa-mamaa nɔ lamɛɛlule lan dimio o polalen. Kon hun a sɛɛngianndan ni, o hivi baala Hala-o laci o laalanndo nin te.

⁵ Kɔlɔ sila kon co kaola kpeekpei co o kɔllo nin-ndo ni, yiyan kɛndɔɔ a laalan toɲaa.

⁶ Vanaa pum a mal nɛila lan, mà luɛinun tombola fondoo.

⁷ A yeema mà cɔm maa vanaa bɛndua sínà tɔŋ Hala-o-a nda co ni, kɛ a co sɔɔn nda pila co dimio-on bila biyɔɔ le, a co vɛlɛ n nda co dimio a tiindanndo-on bila biyɔɔ le.

⁸ N sínà maa tɔŋndo naŋ, te vana kela pɛ lecoo mɛɛ o co yɛ.

⁹ N sínà vɛlɛ maa o co le vanaa co dɛnɛ sandaa tosaa-a le tɔŋndo co le, kɛ le vanaa yɔŋ vɔɔnda a vanaa nila kalua, le vanaa sínà Hala le-a a le vanaa lahakia, le vanaa ke Hala a ɲɛm dendu Hala o hɔl-lon lebɛɛ le-a, le vanaa diw fuɲaa ndaa, te kon te kalaa nda-a, le vanaa diuvaa n'vannda,

¹⁰ le vanaa tosaa dɛnnda nɔɔlɛiya a vanaa co laasianndo-a, le vanaa co yulale n'cɛlen-nda, le vanaa co còòlan dimio-a, le vanaa co mɛɛniannda lacòòvalan-nda a le vanaa-vanaa co pɛɛku toɲaa simullo.

¹¹ Pɛɛku kalaa co o Yoongu kɛndɔɔ nin, ó yɔngùn ya fulaa Hala biiloo bɛnda-o o ba-o.

Pol mel Mɛlɛka balika le kɛndɛi o tosal ndu-e

¹² I mel Maalii naa Yeesu Krista balika, ó luei ya yoomuan le baala ndɔɔ tosaa-o. I mel ndu balika le laalan o laalan ya, mó hɛli ya le baala ndɔɔ tosaa-o.

¹³ Ya va paandu sɔɔn tanan dimio a ndu o kɔɔ-o, ya va ndu yɛlen tollo mí i va ndu yeowlan-ndo pɛɛn. Kɛ Hala tuinun ya iɲíí, kani o sínà lepɛŋndo nin a o laalan lepɛŋndo nin ya va kon tosaa ni.

¹⁴ Maalii naa pei ya kɛndɛi ndɔɛi nin ca, mó ke ya laalanndo a kaola naa n sɔla Yeesu Krista o ba-o.

¹⁵ Sɔɛi toɲɛi co hee ni, i vannda kpow a bɛnda mì n cɛl-le: Yeesu Krista hin o ceendo coo le vanaa lahakia ciindiaa. Ya co vana lahaki tasoo o nda tɛɛn ni.

¹⁶ Kɛ lelan Hala tuinun ya iɲíí ni. Yeesu Krista ndóò yeema mí ndóò cɔm biuvɔn ndɔ nɔ lamɛɛlu loo o ya vana lahaki bɛndoo nin, haliko mi biuvɔn kon va tɔɔmaseloo le vanaa ndáà hun laalannin ndu, mì ndáà sɔla yoomu fɛɛn-fɛɛn ndo-a.

¹⁷ Màá Hala Masa co le fɛɛn a fɛɛn-ndo, o vi loo, o co Hala ndu pilɛ kpé-o va bɛɛlen sɔlaa a biiloo lɔ́ɔ́-lɔ́ɔ̀! Amiina!

¹⁸ Po nuu Timote, i co nɔm sɔɔn mun pɛɛkoo mɛɛ sɔɔn siɔdii laci-on n dimin paandu a nɔm o kɔɔ yɛ, haliko ma cɔlɔba cɔlɔba kɛndɔɔ,

¹⁹ mà lo o laalanndo coo, mà nɔ yiyan kɛndɔɔ! Vanaa pum a tui yiyannda kɔlta ndalan diom te, ɛɛ nduyɛ, má mal laalanndo.

²⁰ Vanaa kan a pum a co haa ni: Himene a Alɛksandre, a ya mal Setana o ba-a, haliko a pɛɛku lɛ vannda le sɔɔn tana dimio a Hala o kɔɔ le.