1Tesalonikea 5 - BII BILA

¹ Puapilɛa naa, hali mì n sɛval lɛ bɛɛ niaa a palɛi a á telenndan o kɔɔ le,

² kani niaa pila sìna ɲɛkɛndɛi maa paale Maalii hunin-nden le vanin ko maa paale vuiyo hinul vana icɔl-ten.

³ Telen vannda vanin dimio aa: «Kɔlɲuloo tiw, n co nila ɲulo-o», o telen kon kpeekpei dɛnɛ palaa voolunin nda maa mɛɛ telen vialaa voolu vanalanɔɔ nuaa yɛ ni, a helunnin te.

⁴ Kɛ puapilɛa naa, niaa niaa, la co o maɲum nin te, paale len le voolunin niaa maa mɛɛ vuiyo voolu vana nuaa yɛ le.

⁵ Niaa kpow, ɲɛ-tengaa a paalen niaa co ni. La co maɲum te, te kon te ɲumma bɛnduan.

⁶ Lelan, n lɔlnùn maa vanaa tɔ̀a le. Kɛ n vannùn lahɔl yékén mì n vannùn vanaa bii kɔlta ndalan-nda.

⁷ Kani icɔl vanaa lɔlaa lɔl ni, icɔl vɛlɛ koni vanaa kolaa kol ni.

⁸ Kɛ naa co le paalen-nda, n biinùn kɔlta naalan. N nɔnnùn laalanndo a kaolaa mɛɛ vana vownun mɔsil cɔwvo nuaa yɛ, mì n nɔnnùn tiindanndo le cindaa mɛɛ vana vownun mɔsil cɔwvo nuaa yɛ.

⁹ Kani Hala kɛsi naa le naa kɔl ndɔ tuwvo tuisio coo le, kɛ mì n sɔla cindaa Maalii naa Yeesu Krista kɔɔli.

¹⁰ O fonda naa o vi ni, haliko mi n va yoomu lɔ́ɔ́ o hunnin-ndo.

¹¹ Lelan, la lueinan yoomuan mì la va kɔltan kennanndo vellaa-velle mɛɛ niaa co tosaa sunsun yɛ.

Congɔnndan a yilɔɔlan

¹² Puapilɛa naa, n co niaa tɛɛlɔn, la ke vanaa co niaa baalaa tɛɛn-nda bɛɛlen, vanaa Hala vem le niaa simndan laci ma vá niaa pɛɛkoo-a pɛɛn.

¹³ La ke nda bɛɛlen mì la kaola nda le baala nda co tosaa-o. Kɔlɲuloo vá niaa pilaa tɛɛn.

¹⁴ N co niaa tɛɛlɔn puapilɛa naa, la kanalan vanaa siɛlɛiya, la luei vanaa nɔ siòònde-a yoomuan, la mala vanaa co o sangaa nin-nda mì la biwnun a vana-vana.

¹⁵ La kindín, vana-vana mìngì dɛnɛ vɔɔndo a dɛnɛ vɔɔndo le, kɛ la vá dɛnɛ kɛndɔɔ tosaa niaa pilaa tɛɛn lɔ́ɔ́-lɔ́ɔ̀, mì la vá ndu vɛlɛ tosaa a vanaa celen.

¹⁶ La vá a ɲaaloo lɔ́ɔ́-lɔ́ɔ̀,

¹⁷ la vá piɛilen lɔ́ɔ́-lɔ́ɔ̀,

¹⁸ la vá Hala balikaa mello o dɛnndan kpow nin. Hɛnan Hala-o co kon le niaa o Yeesu Krista nin ni.

¹⁹ La ɲumì Kɔl-Diandaa co niaa nin-ndo le,

²⁰ la pɛɛsà sɔɔn vanaa-tɛɛngaa-diom Hala-a le,

²¹ kɛ la dɔw dɛnndan kpow taasi, mì la bii dɛnnda naŋ-ndan kpáŋ.

²² La mandán le dɛnnda vɔɔnndan kpow.

²³ Màá Hala yɔngù vana kɔlɲuloo-o tosa mì la va vanaa ndɔa lɔ́ɔ́-lɔ́ɔ̀! Màá o mandà yiyan niaa, yoomu niaa a kɔɔle niaalen, mì la va vanaa yaalan te-a lɔ́ɔ́ Maalii Yeesu Krista hunnin-ndo!

²⁴ Vana veelu niaa-o tosanin kon, kani vana lo o lediom coo-o o co ni.

²⁵ Puapilɛa naa, la piɛi Hala le naa.

²⁶ La yil naa puapilɛa naa lapi mì la kɔɔmian nda.

²⁷ I co niaa tɛɛlɔn, la dimi sɛbɔɔ ho puapilɛa naa kpow o hɔl.

²⁸ Màá kɛndɛi Maalii naa Yeesu Krista-e i va niaa coo!