1Tesalonikea 4 - BII BILA

Silalan le kelaa o nɛila hɛnan Hala lan coo

¹ Le sɔɛi ciiyo puapilɛa nia, n cɔm niaa mɛɛ vana kela mà hɛnan Hala yɛ. Nduyɛ la co nin kelaa o nɛila lan coo. Kɛ sunsun, n co niaa ɲuna mì n tɛɛlun niaa o diola Maalii Yeesu lan, la cɔɔlu nɛila lan biyɔɔ.

² Kani la sínà pɛɛkula naa n yɔngu niaa fulaa Maalii Yeesu o ba lan.

³ Ɲɛ Hala yeema-o co ni mì la va vanaa diandaa, mì la mal dɛnnda suundɛilan,

⁴ mì vana-vana o niaa tɛɛn bii dialun ndɔn, mò kennun bɛɛlen.

⁵ La malnun yeemɛi vɔɔnde o ba maa vanaa sìna Hala le-a le.

⁶ Vana-vana pílàn puapilɛ ndɔɔ tana le, vana-vana tɛɛmbuu puapilɛ ndɔɔ labɛɛ o sɔɛi he nin te. Maa mɛɛ naa n dimul niaa sɔɛi ken kpéŋ-kpéŋ yɛ, Mɛlɛka tuisinin vannda sangaa coo le hakila vaa lende.

⁷ Kani Hala veelu naa le kela o dɛnɛ nɔɔlɛi nin te, kɛ le kelaa o dindinndo nin.

⁸ Lelan, vana-vana kɛɛ pɛ pɛɛkoo ho, o co vanaciee le o kɛɛ le, kɛ Hala, o co niaa Kɔl-Diandaa ndɔɔ keo-vo o kɛɛ lende ni.

⁹ Hali mì n sɛval bɛɛ niaa a kaola bɛnda mò va vanaa laalannda tɛɛn-ndo o kɔɔ le, kani niaa pila sɔla pɛɛkoo Hala o ba maa la kaolian vellaa-velle.

¹⁰ Ɛ̀ɛ̀ nduyɛ, lende niaa co kelaa a puapilɛa nia Maseduan kpow ni. Nduyɛ puapilɛa naa, n co niaa vɛlɛ sila, la hiow bɛɛ o kon coo.

¹¹ La kindin mì la nɔ kɔlɲuloo, mì la muli hɔlla o makola niaalan, mì niaa pila kelu lalle o baala niaa nin mɛɛ naa n dimul niaa yɛ.

¹² O kon, vanaa co vanaa laalan te-a kenin niaa bɛɛlen, la venin o ba vana bɛngu le.

Le hunɔɔ Maalii-o

¹³ Puapilɛa naa, n yeema mì la sínà toɲaa le vanaa vi-a, yɔŋii mɔnɛi bii niaa maa vanaa celen, a nɔ tiindan te-a.

¹⁴ N laalan maa Yeesu vi mó tendul. Lende koni, n laalan vɛlɛ maa Hala minginin vanaa laalan má vu-a yoomu nda Yeesu-a latulu.

¹⁵ Nduyɛ, ɲɛ naa n co niaa dimul fulaa o sɔɛi Maalii-e nin-ndo co hoo ni. Naa vanaa vanin yoomu lɔ́ɔ́ Maalii hunin-ndo-a, n hiwnin vanaa vi-a laci le.

¹⁶ Kani telenndo tiiya pɛ, n tuɛinin diomndo fulaa o halataala, mì n tuei bulu Hala-o diom, o kon mì Maalii pila tol. Vanaa vi o diola Yeesu lan-nda fɔlɔn a tendulnin ni.

¹⁷ O kon kɔɔli, naa vanaa va vɔnin yoomu-a n kɔanin naa ndaa latulu o yumbuyumboo nin, mì n kɔ bɔŋa Maalii o hoeiye nin. O kon n vanin naa Maalii-aa lɔ́ɔ́-lɔ́ɔ̀.

¹⁸ Lelan, la vá yoomuan lueinanndo vellaa-velle a diomndan ndan.