1Tesalonikea 3 - BII BILA

¹ O mɛɛlulan, n tiw lɛ ba cum kon yulɔɔ le. O kon mí n yiyan maa ndóò va fisa mì naa daama náà n lo Atɛn.

² O kon mí n vim niaa Timote puapilɛ naa, o co baala Hala-o tosaa naa ndaa le vannda Yoongu kɛndɛ Krista-o tiiyallo-o. Mó cɔɔlu niaa kpaayaa luei, mó luei vɛlɛ niaa yoomuan o laalan niaa nin,

³ haliko vana-vana o niaa tɛɛn vu n'dial a dɛnnda palaala vannda co naa hau tuisio coo lan te. Niaa pila sínà maa dɛnnda lan Hala kelu le naa ni.

⁴ Nduyɛ, la sínà maa lɔ́ɔ́ naa n va naa niaa-o, n va niaa dimullo maa mɛɛ mì vannda ndáà tol naa yɛlen. Nduyɛ sɔɛi ken tiiya nuaa ni, mɛɛ niaa pila sínà ndi ɲɛkɛndɛi yɛ.

⁵ Lelan, le mɛɛ yáà tiw lɛ ba cum kon yulɔɔ le yɛ, mí viam Timote le kɔlan sɔɔn ɲuuniaa a laalan niaa o kɔɔ. I va buulanndo yɔŋii ɲina vɔɔndo ndóò tɔɔndan niaa, mì vali naa ndóò siŋnun fúú.

⁶ Kɛ Timote langa komal naa fulaa o niaa lo, mó downun naa kona kɛndɔɔ a laalan niaa a á kaola niaa nɔ-o o kɔɔ, mó cɔm naa yiyan kɛndɛ niaa nɔ a naa-o a yeemɛi niaa nɔ le naa cɔu vɛlɛ-e. Naab bɛɛ yeemɛi ken co naa taw.

⁷ Lelan puapilɛa naa, o sangala naalan nin a o yɛle tolaale len nin kpow, n naŋ kɔl le laalan niaa.

⁸ Sunsun, n sɔla vɛlɛ yoomuma sɛnɛi, kani la co a yiinan sakpo o Maalii nin.

⁹ N sínà bɛɛ mɛɛ naa n mel Hala balika le niaa le, kani la yɔngu naa ɲaaloo o lakɔl ndu o hɔl.

¹⁰ Niinoo a lɔan, n co ndu ɲunaa o piɛilen nin kpeekpei le mɛɛ o cɛl naa mì n ce vɛlɛ niaa hɔlla a hɔlla, mì n siow ɲɛ lo o laalan niaa nin-ndo peelu yɛ.

¹¹ Màá Hala pila, o co Fuɲa naa-o nda Maalii naa Yeesu toosial naa nɛiyo haliko mi n kɔ komal niaa!

¹² Màá Mɛlɛka cɔɔlu niaa kaolaa tɛɛn vellaa-velle, mò cɔɔlu vɛlɛ ndu niaa a vanaa celen tɛɛn, mò va maa o naa n nɔ le niaa-o!

¹³ Màá o luei kɔlta niaalan yoomuan mì la siŋnun vanaa diandaa a vanaa nɔ isɔw le-a Hala fuɲaa o hɔl telen Maalii Yeesu hunnin a vanaa ndɔa diandaa kpow-vo!