1Samiɛl 9 - BII BILA

Saul kɔɛ sofɛlɛa fuɲa ndɔ-a nuwviaa

¹ Langbanɔ pilɛ va o tàndá Bɛnyamɛn-ndo nin, diolan Kis, fuɲa ndɔ diolan Abiɛl, Serɔr va fuɲa ndɔ mamaa ni, Bekora ndóò velu fuɲa ndɔ mama kon ni, Bekora kon ndu Afia óò velu ndu ni. O polale Bɛnyamɛn-nden nin ndóò fula ni. Vana tɔ́ɔ́ bɛndoo o va ni.

² Kis ndóò nɔ poo pum diolan Saul, langbanɔ felengi naŋ hɔlla taw-vo o va ni. Vanáà hiw ndu naŋɔɔ o Israɛlla tɛɛn te, ndóò sim pɛ, ndóò hiow vannda kpow bollen bandei.

³ Paale pilɛ, mí sofɛlɛa laandua Kis-a lo. Mí Kis dimul Saul po ndɔ aa: «Veelu vana baalaa pilɛ mì la kɔ nuwviaa cɔlua ha.»

⁴ Má kei fɔlɔn o tàndá n'pembu Efraim-ndo nin, má kɔa o lɛŋnde Salisa len nin, kɛ a seelun nda le. Má kei o lɛŋnde Saalim-den nin, lon bɛɛ a komal nda le. O kon kɔɔli, má kei o tàndá Bɛnyamɛn-ndo nin, kɛ lon vɛlɛ bɛɛ a seelun nda le.

⁵ Tùú nda tiiya o tàndá Suf-o nin-ndo, mí Saul dimul buɛi ndɔ va ndu liilaa-o aa: «N mɛɛlu nanu mì n muungun, yɔŋii Pua buulan vɛlɛ le naa mò pɔɛɛnun a dɛnɛ sofɛlɛa laandua ha.»

⁶ Mí buɛi kon mulul ndu aa: «Vana-tɛɛngaa-diom Hala-o pum co o kobio ho nin, o fula tɔ́ɔ́ taw. Ɲɛ-ɲɛ o dimi pɛ, mɛɛ mo tosan lekɛ́ndɛi. N kɔ vɔ hau o ndu lo, bɔɔle mo cɔm naa nɛi naa n bɛnda mì n kɔɛ coo-o.»

⁷ Mí Saul mulul buɛi ndɔ kon aa: «Te n kɔɛ pɛ, yɛɛ nɛ naa n yoo yɛnin vana-tɛɛngaa-diom Hala kon? Kani n nɔ lɛhau ɲɛdiaa o ba le. N nɔ vɛlɛ ɲɛ celen te, yɛɛ kpeekpei naa n ke yɛnin ndu?»

⁸ Mí buɛiyo mulul Saul aa: «I nɔ volii támái i pilɛ, ndi ya yɔngunin ndu ni, mò cɔm naa nɛi naa n bɛnda le kɔlan coo-o.»

⁹ Paandu, o lɛŋnde Israɛl-ten nin, te vannda ndáà yeema pɛ le Hala isɔɔ ɲuna, nuaa ndáà dimi ni aa: «N kɔnnun o vana sina sɔɔn viannanndon-ndo lo.» Vana-tɛɛngaa-diom Hala-o paalen nden hau ndáà veelu lɔ́ɔ́ kon ni aa vana sina sɔɔn viannanndon-ndo.

¹⁰ Mí Saul dimul buɛi ndɔɔ aa: «A dimi toɲa, n kɔ vɔ lon.» Má can kɔlan o kobi vana-tɛɛngaa-diom Hala-o va kon nin-ndo nin.

¹¹ Mɛɛ nda va kɔlan, má bɔŋan nda felengia laandua pum, a va kɔlan mɛnndan kɔndɔɔ. Má ɲuna nda aa: «Vɛ̀ɛ̀ vana sina hoo sɔɔn viannanndon-ndo co pá ciee?»

¹² Mí felengia laandua kan mulul nda aa: «Oi, ndu bɛɛ langa tiiya ciee sunsun, kani hau o hin le sálà lelɛŋndo solio o fonda-loamaa-lasálàá coo o naa lo ciee nanu ni. La cua niko pelon cɔ́-cɔ́.

¹³ La tiiya dɔ́ɔ́ pɛ ciee, la co ndu cɔ. La cua niko kɔlan, mì la suukan a ndu lɔ́ɔ́ pá o hel o fonda-loamaa-lasálàá le ɲɛdiaa dioo. Kani ndu bɛnda ni mo dɔw sálàá duaa lɔ́ɔ́ pá mì vanaa nda veelu-a de ndu.»

Saul komal Samiɛl

¹⁴ Ndáà tiiyaa ciee, má bɔŋan nda Samiɛl-aa, o va kɔlan o fonda-loamaa-lasálàá.

¹⁵ Nduyɛ, lɔ́ɔ́ pá mí Saul ciikan nda Samiɛl, Mɛlɛka ndóò cii nin Samiɛl dimul aa:

¹⁶ «Siɔdii a telen vaa nuaa kpafii, i cɔmnin nɔm langbanɔɔ pum, fulaa o polale Bɛnyamɛn-nden nin. Ndu n pɔlanin le siŋnɔnndo masaa vanaa nia coo ni, Israɛlla pɛɛn. Ndu baŋanin nda Filistia o ba ni. Kani i yiyan caŋnda vanaa nia co ya o lani le nda malaa lan.»

¹⁷ Lelan, mɛɛ Samiɛl ce dɔ́ɔ́ Saul, mí Mɛlɛka dimul ndu aa: «Langbanɔ ya dimul nɔm sɔɛi ndɔɛi-yo co hoo ni. Ndu tosanin masalen vanaa nia coo ni.»

¹⁸ Mí Saul bɔŋan nda Samiɛl o dio cieo sondoo, mó dimul Samiɛl aa: «A yandi, cɔm ya ó vana sina sɔɔn viannanndon-ndo lo bɛɛ.»

¹⁹ Mí Samiɛl mulul ndu aa: «Ya co vana sina sɔɔn viannanndon-ndo ni. La hiow n kɔnnun o fonda-loamaa-lasálàá, mì n kɔ dionnun hau ɲɛdiaa latulu. O kon siɔdii púŋ, telen ya ciinin nɔm sɔɔn cɔm-ndo, la muungun.

²⁰ Búúlàn-ndɛ le sofɛlɛa nɔmaa lo o co nihau palɛi ndii yáá-a le, kani vannda saalun nda. Nɛ̀ɛ́-nɛ̀ nɔ yɛ ɲɛm sɔvɛn co o lɛŋnde Israɛl-ten nin-ndon kpow? Vɛ̀ɛ̀ o co nɔm pila a yungu fuɲa nɔm-ndo le?»

²¹ Mí Saul mulul ndu aa: «Kpo fallo! Nɔm pila sina maa polale Bɛnyamɛn-nden le hiow dɔɔnanndo o cuavaa Israɛlla tɛɛn. Handɔɔ o kon coo, yungule fuɲa nuu le hiow vɛlɛ dɔɔnanndo o polale len coo. Yɛɛ vem yɛ nɔm sɔɛi vaa nuaa ya dimullo?»

²² Mí Samiɛl luei Saul nda buɛi ndɔɔ cɛinin, mó kɔ kɛsi nda vanaa va a veelaa le sɔɛi ken-nda laci, a va le n'van beleyaa.

²³ Mí Samiɛl dimul vana yávàà ɲɛdiaa aa: «Hun niko a visii yáà yɔngu nɔm le kɛsio pɔɔ-e.»

²⁴ Mí vana yávàà ɲɛdiaa kɔ cua lɔloo a kɔ̀ŋɔ̀ɔ́, mó hun kɛsi Saul o labɛngunin. Mí Samiɛl dimul Saul aa: «Tofa vɔ ɲɛ naa n mel nɔm-ndo, la sɔɔnguu mì la de niaa vanaa ya veelu-a.» Mí Saul dia ɲinkon latulu nda Samiɛl.

²⁵ O kon kɔɔli, má faŋan o fonda-loamaa-lasálàá, má muungu ciee. Mí Samiɛl suukan nda Saul o cɛiyo sɛmtɛ.

Saul sɔla pɔlaa le siŋnɔnndo masaa

²⁶ Diimandɔɔ, mí Saul nda buɛi ndɔɔ a pena cɔnɔn. Ɲɔɔ teengaa dɔ́ɔ́, mí Samiɛl veelu Saul o cɛiyo sɛmtɛ, mó dimul ndu aa: «N kɔ, mì hivi nɔm nɛiyo.» Mí Saul can nda Samiɛl, má fula o bɛ́ɛ̀, má bii nɛiyo.

²⁷ Lɔ́ɔ́ nda tiiya o kobio mɛɛlulan-ndo, mí Samiɛl dimul Saul aa: «Dimul buɛi nɔmndo mò kɔɛ pɔɔ.» Mí buɛiyo kɔannun polon. O kon, mí Samiɛl dimul Saul aa: «Nɔm pila sim niko, mì dimul nɔm diom Hala soo-o.»