1Samiɛl 7 - BII BILA

¹ Mí Kiriat-Yearimnda kɔ cua kesu Mɛlɛka-o, má hel a ndu o Abinadab lo cɛinin, o pembei coo. O kon kɔɔli, má pɔla Eleasar, po Abinadab-o, má siinguu ndu vana mandaa kesu kalaa.

Israɛlla nɔla Filistia

² Viovɔɔ pila kesu kpemaa viow Kiriat-Yearim ni, o cii lon le vɔsilan bidiin. O kon kɔɔli, mí Israɛlla kpow kandu cɛɛŋɔnndo le muungoo Mɛlɛka o ibuŋ.

³ Mí Samiɛl dimul nda aa: «Te o va pɛ a kɔlta niaalan kpede niaa yeema le muungoo Mɛlɛka o ibuŋ ni, mɛɛ la mal piɔmaa Astarteea sooloo few-few, mì la tiindan Mɛlɛka, mì la biilu ndu ndu pilɛ kpé. O baŋanin niaa Filistia o ba.»

⁴ O Mí Israɛlla puusiaa sooluula Baalla a la Astarteea, má muungu Mɛlɛka ndu pilɛ kpé biiloo.

⁵ Mí Samiɛl dimul nda vɛlɛ aa: «Niaa kpow, la kɔ cuungian Mispa, mì piɛi Mɛlɛka le niaa.»

⁶ Mí Israɛlla cuungian Mispa. Má kɔandu mɛnndan, má cuuŋuu man lɛŋ Mɛlɛka o hɔl, má bii sumndo paale len. O kon kɔɔli, má sɔlɔlan hakila ndáà cua a Mɛlɛka lan. Mispa lon Samiɛl siŋnun simlacinɔ Israɛlla ni.

⁷ Mɛɛ Filistia tuei maa Israɛlla va a cuungiannda Mispa, mí simlacia ndaa tuu le kɔlan nda delɔɔ coo a cɔwvo. Israɛlla tueyɔɔ ken, mí siòònde bii nda a Filistia.

⁸ Má dimul Samiɛl aa: «Mal naa le. Piɛi Mɛlɛka Hala naa le naa le, haliko mo baŋa naa, mì n fula Filistia o ba bɛngu.»

⁹ Mí Samiɛl bii saa téndé va vɔ vɔɛiyo-o, mó solul Mɛlɛka ndu sálà loamaa. Mó piɛi Mɛlɛka le Israɛlla, mí Mɛlɛka mulul ndu.

¹⁰ Telen Samiɛl va sálàá solio-o kínɛí Filistia hin le Israɛlla delɔɔ coo ni. Kɛ mí Mɛlɛka tosa mí taŋnden le piɔndi kpakan! Mí vanaa cɔvaa Filistia yɔŋnun laasi-laasi, mí Israɛlla nɔla nda.

¹¹ Mí vanaa cɔvaa Israɛlla toaw Filistia, má diw nda cɔnɔnndo Mispa kɔlan tiiyaa háá Bɛt-Kar a ba too.

¹² Mí Samiɛl cua powvo pum, mó baŋ ndu Mispa a fonda nda veelu aa Ciŋnde-o tɛɛn, mó ke ndu diolan aa: «Pow mala vana-o». Mó dimi aa: «Kani háá hau, Mɛlɛka koni co naa malaa ni.»

¹³ Mí siɛmbulan la bii Filistia. Kɔl del-lɛ nda le muungoo o lɛŋnde Israɛl-ten nin te. O palɛi Samiɛl va yoomu-e kpow nin, Mɛlɛka tosa lamamɔɔ a Filistia le.

¹⁴ Mí kobilan a yondola Filistia ndáà hɛlu Israɛlla o ba lan la muungu Israɛlla o ba. Lá va o lɛŋnde va Ekrɔn a Kat tɛɛn-nden nin-ndan pɛɛn. Mí kɔlɲuloo muungu Israɛlla nda Amoriia tɛɛn.

¹⁵ Mí Samiɛl lo simlacilen tosaa Israɛlla coo háá mó vu.

¹⁶ Vɔsi oo vɔsi, ndóò cɛn pɛ, ndóò kɔɛ Betɛl, Kilkal a Mispa le keiyo yaman kiolɔɔ,

¹⁷ malan ndóò muungu o ndu lo Rama. Lon calta ndɔlan la va ni, lon ndóò kialu yaman cuavaa Israɛlla tɛɛn ni, lon koni ndóò tangul vɛlɛ fonda-loamaa-lasálàá le Mɛlɛka ni.