1Samiɛl 4 - BII BILA

Filistia poonda kesu kpemaa

¹ Mí Israɛlla kpow a tuɛi a sɔɛi Samiɛl-le o kɔɔ. Paale pum, mí Israɛlla cuungian Ebɛn-Esɛr (kon co dimio ni aa «Pow mala vana-o») le bɔŋanndo a cɔwvo nda Filistia. Mí Filistia nda kila dɔ́ɔ́ngɔ́ ndaa Afɛk.

² Mí Filistia bɛɛndian le Israɛlla cɔlɔbaa. Cɔwvo tuuloo tei, mí Filistia nɔla Israɛlla. Má diw nda o fó-fó kon háá le n'van vàála hiɔɔlu.

³ Lɔ́ɔ́ vanaa lo yoomu-a muungu o dɔ́ɔ́ngɔ́ɔ̀ nin-ndo, mí kaasoŋaa kɔlkalua Israɛlla va ɲuunianndo aa: «Le kɔlɔ yɛɛ nɛ Mɛlɛka cɛl-lɛ mí Filistia diw naa hau nuaa? Hee ndi, n kɔnnun ndɔ Silo mì n kɔ cuannun kesu kpema Mɛlɛka-o, mò hun va naa tɛɛn, mò baŋa naa yaamɔaa naa o ba.»

⁴ Má viam vannda Silo le kɔlan hunɔɔ a kesu kpema Mɛlɛka-Nɔ-Kpaayaa-Kpow-vo-o, o co icali o mɛlɛkaa kanda ɲɛm Hala-on-nda tɛɛn-ndo pɛɛn. Poaa ŋiɔŋaa Helii-a, Hɔfni nda Pineas a va o kesu kpema Hala-o ikɛi lon.

⁵ Mɛɛ kesu kpema Mɛlɛka-o tiiyaa dɔ́ɔ́ o dɔ́ɔ́ngɔ́ɔ̀ nin, mí vanaa cɔvaa Israɛlla saan deŋio kpélén háá mí lɛŋnden le ɲiiya.

⁶ Filistia tueyɔɔ yoondiaala bɛndula lan, má ɲuna aa: «Ko ivɔkɔ-vɔkɔɛi yɛɛ co yɛ hee o dɔ́ɔ́ngɔ́ Israɛlla nin?» Lɔ́ɔ́ nda sina maa kesu kpema Mɛlɛka-o tiiya o dɔ́ɔ́ngɔ́ɔ̀ nin ni-o,

⁷ mí siòònde bii nda Filistia kan taw, má va dimio aa: «Hala tiiya o dɔ́ɔ́ngɔ́ ndaa nin.» Má dimi vɛlɛ aa: «Mbɔ̀ naa n kɔndu dɛnɛ fɔ́! Kani o co nuaa le ɲɔɔ va tosanndo lon vaalio le.

⁸ A toɲa, n kɔndu dɛnɛ a vannda dɛ! Nɛ̀ɛ́-nɛ̀ soli yɛnin naa Hala kpaaya bɛndu tuisi kon Esiptea sangala súú-súù ka coo o lɛŋnde veselɛilen nin-ndo o ba?

⁹ Lelan naa Filistia, fɔ mì n sim yili, mì n tosa vanapɔnɔyɛi. N kɔ cɔlɔban Hebreea a yoomuan. Yɔŋii naa n siŋnun cɛa ndaa mɛɛ nda va paandu cɛa naa yɛ.»

¹⁰ Mí Filistia tiŋ Israɛlla a cɔwvo, má nɔla nda, mí vana-vana ɲaanun o cɛi-kola-toandaa ndɔɔ nin, mí ɲɔɔ yɔŋnun dɛnɛ palaa bɛndoo pila le nda. Vanaa cɔwva vaalan beleyaa a sɔla piɔ́mndo Israɛlla tɛɛn ni.

¹¹ Mí Filistia poonda kesu kpema Hala-o, mí poaa ŋiɔŋaa Helii-a, Hɔfni nda Pineas bɛɛ a sɔla piɔ́mndo.

Helii vana-solia-lasálàá sɔla piɔ́mndo

¹² Paale len, mí vanndo pum, fulaa o polale Bɛnyamɛn-nden nin o hialun o yondo cɔwvo nin, mó tiiya háá Silo a kiltan paale pilɛle len. Volɔɔla sɛɛsiɛilan la va ndu lekɔɔ, loolio va ndu o lebol.

¹³ Mɛɛ o tiiya, mó komal Helii icali cumndo o ɲɛ ndɔ calaa coo o nɛiyo lekɔɔ, kani o va buulanndo taw le kesu kpema Hala-o. Mí langbanɔ kon tiiya ciee, mó kɔ dɔawnun kona, mí vannda kuŋ miɔ̀ɔ̀ a caŋndan.

¹⁴ Lɔ́ɔ́ Helii tuei yeela lan-ndo, mó ɲuna aa: «Vóólun-vóólun yɛɛ nɛ soaa yɛ hoo?» Mí langbanɔ kon kɔa dɔ́ɔ́ cɔ́-cɔ́, mó kɔ dimul ndu ɲɛ yɔŋnun-ndo.

¹⁵ Tuma kon, Helii ndóò nɔ nin vɔsilan belaŋɔmahiɔɔlu a laŋɔmaa. Pundaa va nin ndu o hɔl, ndóò ci lɛ le.

¹⁶ Mí vana kon dimul ndu aa: «O cɔwvo ya co fulaa ho nuaa ni. Hau-hau ya hɛlun ni, mí sɔndan.» Mí Helii ɲuna ndu aa: «Ponndo, vɛ̀ɛ̀ lavàà lon?»

¹⁷ Mí langbanɔɔ mulul ndu aa: «Israɛlla ɲaanun Filistia. Vanaa naa cɔwva vi taw. Hali poaa nɔmaa ŋiɔnda, Hɔfni nda Pineas, a sɔla piɔ́mndo. Handɔɔ o kon coo, Filistia kɔɛnnun vɛlɛ a kesu kpema Hala-o.»

¹⁸ Helii tueyɔɔ dɔ́ɔ́ sɔɛi kesu kpema Hala-o, mó kialun nɛɛ o va icali o ɲɛ ndɔ calaa coo-a, mó del macali o Cɛi-Mɛlɛka-o ikɛi, mó pial mundoo, mó vu. Kani ndóò lusulun nin le yuuvɛi ndóò yuuva nin taw-ve. Vɔsilan belehiɔɔlu Helii sim Israɛlla laci ni.

¹⁹ Lanɔɔ Pineas, po Helii-o va a foli miaa, o va nin le violɔɔ. Mɛɛ o tuei maa Filistia cii kesu kpema Hala-o poonda, mó tuɛi vɛlɛ maa pɔnɔ ndɔ bɛndu nda pɔnɔ ndɔ bɛɛ a vi, mó cal n'conya, mó vialu. Kani pulei ndíì biŋin ndu ni.

²⁰ Tuma o cɛn piɔ́mndo-o, mí vanlaandua va ndu ikɛi-ya dimul ndu aa: «Siòòŋii bii nɔm te. A velu hɔ́ɔ́ piaandoo!» Kɛ o muli ɲɛ-ɲɛ le, o vow bɛɛ ken sondo le.

²¹ Viovɔɔ ka-ka, mó dimi aa: «Le tùú biilu Hala-o faŋan Israɛl-lo, i ke hɔ́ɔ́ ho diolan aa I-Kabɔd.» Kon co dimio ni aa «Biiloo cuu.» Le kɔnnda ndáà kɔɛnnun a kesu kpema Hala-o lan a le piɔ́m pɔnɔ ndɔ bɛndoo nda pɔnɔ ndɔ sɔla-o ndóò yɔngu diola lan lende ni.

²² Le kɔnnda yaamɔɔa kɔɛnnun a kesu kpema Hala-o lan o dimi ni maa biiloo faŋan Israɛl.