1Samiɛl 29 - BII BILA

Filistia tow David má faŋa ndu o nda lo

¹ Mí Filistia bɔɔŋiaa vanaa ndaa cɔwva kpow Afɛk, mí Israɛlla nda kɔ kila dɔ́ɔ́ngɔ́ɔ̀ o soon mamɛnndo Yisreɛl kɔngɔ.

² Simlacia Filistia va kɔlan kundala n'van kɛmɛ-kɛmɛlan a kundala n'van vàá-vàálan laci. Mí David nda langbaa ndɔa a masaa Akis va hunɔɔ nda kɔɔli.

³ Mí simlacia Filistia ɲuna aa: «Hebreaa kuɛɛ nɛ co yɛ haa?» Mí Akis mulul nda aa: «David ni, ó va buɛi Saul masaa Israɛl-lo pɛɛn. O co nin vɔsila bɔɔ-bɔɔ a palɛi bɔɔ-bɔɔ o co ya o ba bɛngu. Kɛ kandɔɔ o paale o faŋan vana ndɔ bɛndoo kɔɔli len, hun bii a hau, i ci ɲɛ-ɲɛ vɔɔn o kela ndɔɔ nin te.»

⁴ Mí simlacia Filistia tuulu kɔllo a Akis, má dimul ndu aa: «Tow langbanɔɔ ho mò muungu o kobi n ke ndu le calle nin-ndo nin. N bɛnda mì n kɔɛ naa ndaa o cɔwvo le, yɔŋii o kɔ mulin naa cɔlɔba. Kani vɛ̀ɛ̀ vana ndɔ bɛndoo kɔ hini yɛnin kɔl a ndu, te o vɔngul vanaa naa cɔwva ndu o ba le?

⁵ Ó co David hoo le vanlaandua ndáà solul condon a yolan, má va dimio aa: ‹Saul dii yaamɔɔa vaalan, Kɛ David ndu dii yaamɔɔa vaalan tɔ́-tɔ́ o vaalan tɔ́-tɔ́ nin› te?»

⁶ O kon mí Akis veelu David, mó dimul ndu aa: «O diola Mɛlɛka co yoomu-o lan, i laalan nɔm. Yáà yeema mì nɔm óò tosa cɔwvo ho naa niaa, kani kandɔɔ paale n hin o ya lo len, háá hau, i ci nɔm dɛnɛ vɔɔn kɛ́-kɛ̀ tosaa le. Kɛ a hɛnan simlacia Filistia le.

⁷ Lelan, muungun a kɔlɲuloo o nɔm ndo, yɔŋii n tɛɛmbuu nda kɔltan.»

⁸ Mí David ɲuna ndu aa: «Masaa, sɔɛi yɛɛ nɛ ya tɛɛmbuu yɛ? Yɛɛ ya yɔŋ yɛ nɔm, kandɔɔ o paale ya kandu nɔm baalaa o ba bɛngu len háá hau? Le yɛɛ nda kuuna yɛ ya kɔlan yaamɔaa vana ni bɛndoo cɔlɔbaa, yaamɔaa nɔm masa pɛɛn?»

⁹ Mí Akis mulul David aa: «I co sinaa tɛ́ɛ́ maa a tɛɛmbuu isɔɔ le, a hɛnan ya maa mɛlɛkanɔ Hala. Kɛ simlacia vanaa cɔvaa Filistia dimi aa nɔm kɔa naa kɔɔli le cɔwvo tosaa le.

¹⁰ Lelan siɔdii púŋ, ɲɔɔ tenga dɔ́ɔ́ pɛ, la cɛn, la kɔɛnnun niaa langbaa vana nɔm bɛndoo, a liila nɔm-nda pɛɛn.»

¹¹ Diimandɔɔ idiiyo púŋ, mí David nda langbaa ndɔa can, má muungu o lɛŋnde Filistia nin. Mí Filistia, nda heelu Yisreɛl.