1Samiɛl 28 - BII BILA

¹ O telen kon, mí Filistia mɔɔsiaa vanaa ndaa cɔwva nɛɛ pilɛ le kɔlan Israɛlla delɔɔ coo a cɔwvo. Mí Akis dimul David aa: «Sina pɛngu maa niaa langbaa nɔmnda liilanin ya o cɔwvo ho ni.»

² Mí David mulul Akis aa: «Bala tiɔn! Nɔm pila bɛɛ canin ɲɛ ya tosanin-ndo.» O kon kɔɔli, mí Akis dimul vɛlɛ David aa: «Mbɔ̀ mɛɛ nɔm vanin ya kandaa lɔ́ɔ́-lɔ́ɔ̀ ni.»

Saul kɔɛ yavaa vomɔɔ Ɛin-Dɔr

³ Lɔ́ɔ́ Samiɛl vi-o, mí Israɛlla kpow a tosa biisi ndɔɔ, má kumbu ndu Rama o kobi ndɔɔ nin. O kon kɔɔli, mí Saul kɛɛ vanaa soolaa n'vanvílɛ́iya a vanaa viamaa yavaa o masale ndɔlen nin.

⁴ Paale pum, mí vanaa cɔvaa Filistia cuungian, má kɔ kila dɔ́ɔ́ngɔ́ɔ̀ Sunɛm. Mí Saul bɛɛ bɔɔŋiaa vanaa cɔvaa Israɛlla, má kɔ kila dɔ́ɔ́ngɔ́ɔ̀ o pembei Kilboa ikɛi.

⁵ Mɛɛ Saul ce vanaa cɔvaa Filistia o dɔ́ɔ́ngɔ́ ndaa nin, mí siòònde bii ndu taw, mí kɔllo laasian ndu nin kpede.

⁶ Mó ɲuna Mɛlɛka, kɛ Mɛlɛka mulul ndu le, o mulul ndu o lɔma sɔlaa nin te, o mulul ndu o urim nin te, o suu o vanaa-tɛɛngaa-diom Hala lo le ndu sɔɛi ken dimul te few.

⁷ Mí Saul dimul buɛyaa ndɔa aa: «La nuwvial-la vanalanɔ suukàn a vanvílɛ́iya-o, haliko mi kɔɛ o ndu lo le yavaa.» Má dimul ndu aa: «O pilɛ co Ɛin-Dɔr.»

⁸ Mí Saul vownun volɔɔla vanaa nɔla ndu sina nin te lan, mó cua buɛyaa ndɔa piaandua a ŋiɔn le ndu liilaa Ɛin-Dɔr. Má tiiya icɔllo o cua kon ndo. Mó dimul ndu aa: «I yeema ma soo o vana vílɛ́iyo pum ndo, ma solul-la vana ya cɔmnin nɔm kon-ndo ceen.»

⁹ Mí cua kon ɲuna ndu aa: «Kɛ nɔm pila sina ɲɛ Saul tosa-o válán: o cii dɛnɛ soolaa n'vanvílɛ́iyo a dɛnɛ viamaa yavaa kuuna o lɛŋnden nden nin. Le kɔlɔ yɛɛ nɛ n yeema yɛ niko le ya yaŋɔɔlen hendullo haliko mi sɔla piɔ́mndo?»

¹⁰ Mí Saul mɛnalan ndu o diola Mɛlɛka lan aa: «Te Mɛlɛka co yoomu, a sɔlanin dɛnɛ vɔɔn kɛ́-kɛ̀ o sɔɛi he nin te!»

¹¹ O kon mí cuaa ɲuna ndu aa: «Ɔ́ɔ̀ vana n yeema mì solul nɔm-ndo?» Mí Saul muli aa: «Solul-la Samiɛl.»

¹² Cuaa cɔu dɔ́ɔ́ Samiɛl, mó yonda kpélén, mó ɲuna Saul aa: «Le yɛɛ n handu yɛ sɔɛi ya o lebol nuaa, nɔm Saul?»

¹³ Mí masaa dimul cua kon aa: «Buulan te! Dimul-la ɲɛ n ce-o.» Mí cuaa dimul ndu aa: «Halaa pum ya co cɔu fulaa o lɛŋnden bɛngu ni.»

¹⁴ Mí Saul ɲuna cuaa aa: «Maa yɛɛ n co yɛ ndu cɔu?» Mó dimi aa: «Fal yuuvɛiyo pum ya co cɔu fulaa o simbulaa o doma bɛndoo nin ni.» Mí Saul sina fɔ́ɔ́fɔ̀ maa Samiɛl ni. Mó tundun, mó baŋ vulan, mó tiiya lɛŋ dí.

¹⁵ Mí Samiɛl ɲuna Saul aa: «Le yɛɛ nɛ n kpeeŋiaa yɛ ya, mà soli ya ceen?» Mí Saul muli aa: «A buulanndo pila ya co nuaa ni, kani Filistia hinul-la a cɔwvo. Nduyɛ Hala mulul-la kɔɔ, o co lɛ ya mulul te, o va a vana-tɛɛngaa-diom Hala-a o kɔɔ, o va o lɔma sɔlaa nin. Lelan ya veelu nɔm ni, mà cɔm ya ɲɛ ya bɛnda le tosaa-o.»

¹⁶ Mí Samiɛl dimi aa: «Nɔm pila co sinaa tɛ́ɛ́ maa Mɛlɛka pila mulul nɔm kɔɔ, mó siŋnun yaamɔɔ nɔmndo, le kɔlɔ yɛɛ n hin yɛ niko ya ɲunaa?

¹⁷ Sɔɛi Mɛlɛka-i yáà dimul nɔm lɔ́ɔ́ kon-nde peelun nuaa ni. Mɛlɛka cii masalen poonda nɔm o ba, mó yɔngu David.

¹⁸ Le tùú n kɛɛ diom Mɛlɛka-o biyɔɔ, má kɛɛ le Amalɛkea diwvo-o o tisa nɔm hau kɔɔli nuaa ni.

¹⁹ Mɛlɛka co niaa malɔɔ Filistia o ba niaa vanaa nɔmnda. Siɔdii, nɔm pila a poaa nɔmnda, la vanin ya ikɛi ciee-piɔ́m, mì Filistia nɔla vanaa nɔmaa cɔwva, má bii nda.»

²⁰ Mɛɛ Saul tuei sɔɔn Samiɛl dimi mún-ndon, mó del lɛŋ, mó sandu sakpo, mí siòòŋii bii ndu taw-taw. Handɔɔ o kon coo, yoomule ve lɛ ndu o n'dial te, kani ndóò niinu nin kpɛŋ mó lɔl pii ndóò di ɲɛdiaa le.

²¹ Mɛɛ cua n'vanvílɛ́i kon sɔɔnguu Saul kalaa ikɛi, mó ca maa o va buulanndo taw. O kon, mó dimul ndu aa: «Masaa, ya buɛi nɔmndo, i bii diom nɔmndo, mí pisi yoomu nuu le ɲɛ n dimul-la-o tosaa.

²² Lelan nɔm bɛɛ, yandi cɛl sɔɛi ya co nɔm dimul-le. Cɛl mì ke nɔm ɲɛdiaa ɲɛ-pɔmbɔ ma de. O kon ma sɔla yoomuan telen pá ma bii nɛiyo le muungoo.»

²³ Kɛ mí Saul kɛɛ, mó dimi aa: «I co ɲɛ-ɲɛ dio le.» Kɛ mí buɛyaa ndɔa a cua kon, o va kon vana n'vanvílɛ́iyo-o a lo ndu dɛɛniaa háá mó cɛl. Mó can lɛŋ, mó cal o kpeloo coo.

²⁴ Fɔ́ɔ́fɔ̀, mí cuaa bii naw téndé celulaa, mó dii ndu. Mó cua kpeyanndo, mó linda, mó toaŋ bulula o vow lɛvɛn nin te lan.

²⁵ Mó yɔngu Saul ɲɛdiaa kon nda buɛyaa ndɔa. Mɛɛ nda cii dio, má bii nɛiyo icɔl kon, má muungu.