1Samiɛl 27 - BII BILA

David kɔ vionnun vɛlɛ Filistia tɛɛn

¹ Mí David pila dimi o kɔl ndɔɔ nin aa: «O va paale pum, Saul co ya diyɔɔ. Lelan o co fisa mì hɛlun ndu, mì kɔɛnnun o lɛŋnde Filistia nin. Te o ve lɛ ya cɔ o lɛŋnde Israɛl-ten nin te, o tuw lɛnin ya le.»

² Le hee, mí David can nda vanaa cɔvaa kɛmɛ leŋɔmpumaa va ndu kɔɔli-a, má kɔa o Akis masaa Kat lo, po Maɔk-o pɛɛn.

³ Mí nda kpow a kɔ cal Kat, o Akis lo, vana-vana a yungu ndɔɔ. Mí David kɔa a laandaa ndɔa ŋiɔnda lon, Ahinoam Yisrɛeliinɔ a Abikail, lanɔɔ fɔ̀nɔ̀ Nabal Karmɛlnɔ.

⁴ Saul tueyɔɔ nin David tɔ́ɔ́ Kat, o kuel lɛ ndu le.

⁵ Paale pum, mí David dimul Akis aa: «Yandi masaa, mɛɛ n ce ya ɲia yɛ, cɛl mí kɔ cal yondoo nin, o sɔndɔkɔlɔɔ pum nin, kani vana nɔm baalaa ya co ni, o bɛnda mì n cal o kobi lemasaa nin naa ŋiɔn latulu le.»

⁶ Paale len, mí Akis ke David kobio Siklak. Lelan kobi kon co vɔ masaa Yuda o ba bɛngu háá paalen nden ni.

⁷ Vɔsio pilɛ a paangon mún hiɔɔlu David tosa o lɛŋnde Filistia nin ni.

⁸ Telen David nda langbaa ndɔa va kon Siklak-o, a va kɔlan Kesuriia, Kirsiia a Amalɛkea delɔɔ coo a cɔwvo. Kabi paandu yɛ, vanaa kan kpow vannun icali o tàndà kon nin ni, kandɔɔ Sur kɔlan tiiyaa háá o lɛŋnde Esipte len.

⁹ Mí David diw vanaa o va delɔɔ coo a cɔwvo o lɛŋnde len nin-nda kpow, o ve vana-vana mɛi yoomu le, vanapɔnɔ ni vanalanɔ ni. O va vɛlɛ cɔlua pɔmbɔa a cɔlua bɛndua kpow poondiaa, mò muungun o Akis lo: saa, nawva, sofɛlɛa, ɲɔɔmɛɛa a volɔɔla cuɛinanndan.

¹⁰ Lɔ́ɔ́-lɔ́ɔ̀ Akis ndóò ɲuna pɛ David aa: «Ɔ́ɔ̀ vanaa niaa del hau coo a cɔwvo-a?» David ndóò mulul ndu aa: «Vanaa co o tàndá Yuda-o nin a ba too-a naa n del coo ni.» Te kon te ndóò mulul ndu aa: «Yerameliaa co a ba too o lɛŋnde len nin-nda naa n del coo ni.» Te kon te ndóò mulul ndu vɛlɛ aa: «Vanaa co o lɛŋnde Keniia nin a ba too-a naa n del coo ni.»

¹¹ Hali vanapɔnɔɔ o pilɛ, te kon te vanalanɔɔ o pilɛ David ve mɛi yoomu le muungoo a ndu Kat le, kani o va yiyanndo maa vana kon va nda lakɔ lɔlɔɔ mì ndóò dimi aa: «Nuaa David co tosaa ni.» Lende David va tosaa telen o va o lɛŋnde Filistia nin-ndo ni.

¹² Le hee Akis ndóò laalan David taw ni, kani o va dimio o kɔl ndɔɔ nin aa: «Daama David cuu Israɛlaa ndɔa cunulɔn nuaa ni. Lelan o vanin buɛi nuu le lɔ́ɔ́-lɔ́ɔ̀.»