1Samiɛl 26 - BII BILA

David kɛɛ vɛlɛ le Saul diyɔɔ

¹ Mí vannda Sif komal Saul Kibea, má ɲuna ndu aa: «Vɛ̀ɛ̀ a co pá sinaa maa David co o viannan o pembei Hakila coo, o dɛɛla niŋ latɔlɔɔ loo hɔl-ndɔ?»

² O kon mí Saul bii nɛiyo le kɔlan David nuwviaa o lɛŋnde veselɛilen Sif nin. Vanaa cɔvaa hiow cɔwvo caa Israɛlla tɛɛn-nda vàálan tan yáá va ndu kɔɔli ni.

³ Mó toosiaa dɔ́ɔ́ngɔ́ ndɔɔ o pembei Hakila coo, o nɛiyo ikɛi. David va o lɛŋnde veselɛilen nin, mó tuɛi maa Saul co ndu kuello.

⁴ Mí David viam suansuaanda le kɔlan tofaa. Mó sina maa Saul tiiya lon.

⁵ Mí David kɔa nɛɛ Saul va o dɔ́ɔ́ngɔ́-a, mó saalun nɛɛ Saul nda Abnɛr po Nɛr-o va ihini o lɔan-nda. Abnɛr kon va simlacinɔ vanaa cɔvaa Saul-la ni. Saul va o lɔan o dɔ́ɔ́ngɔ́ɔ̀ kɔllo, mí vanaa cɔwva kpow a balu hinilan sɔ́.

⁶ Mí David veelu Ahimelɛk Hitiinɔ nda Abisai po Seruya-o, pɔmbɔɔ Yoab pɛɛn, mó ɲuna nda aa: «O niaa tɛɛn, ɔ́ɔ̀ vana cɛlnin mì n kɔɛ naa ndu háá o dɔ́ɔ́ngɔ́ Saul-lo nin-ndo?» Mí Abisai muli aa: «Ya i co lakɔ nɔm kɔɔli.»

⁷ Icɔllo, mí David nda Abisai kɔa o dɔ́ɔ́ngɔ́ vanaa cɔwva nin. Saul va ihini o dɔ́ɔ́ngɔ́ɔ̀ kɔllo, bál ndɔɔ va o baŋaa lɛŋ ndu o bollen coo. Abnɛr a vanaa cɔwva va o lɔan ndu balɔɔ sɔ́.

⁸ Mí Abisai dimul David aa: «Hala cii haw yaamɔɔ nɔmndo malɔɔ nɔm o ba. Lelan cɛl mì kɔ baŋ ndu lɛŋ o lepilɔɔ a bál ndɔɔ, o lepilɔɔ kpé, i peinin lediin te few.»

⁹ Kɛ mí David mulul Abisai aa: «Dii ndu le! A sina pá maa vana-vana hol pɛ masa Mɛlɛka pɔla-o baa, vana kon sɔla sangaa?»

¹⁰ Mí David dimi aa: «Te Mɛlɛka co yoomu, ndu Mɛlɛka pila co ndu lɔɔ ni. Te o hini a ba ndɔ mo vi le, mɛɛ o sɔlanin piɔ́mndo o cɔwvo nin.

¹¹ Lelan màá Mɛlɛka cɛl lɔ́ɔ́-lɔ́ɔ̀ mì hol masa ndu Mɛlɛka pila pɔla-o baa le! N cua bál co ndu o bollen coo-o, a bɔlɔ ndɔ mamɛnndo, mì n kɔɛnnun.»

¹² O kon mí David cua bállo a bɔlɔ mamɛn va Saul o bollen coo-o, má kɔannun. Vana-vana ci le, vana-vana sina le, vana-vana tindu o lɔan te, kani nda kpow a vannun o lɔan cundun. Nduyɛ Mɛlɛka pila hivi nda o lɔma bɛnduma man ni.

¹³ Mí David taŋ o bóllo leeloo, mó kɔ sim lándán o pembei coo, dɔ́ɔ́ngɔ́ Saul-lo va levil polon.

¹⁴ Mó veelu vanaa cɔwva a Abnɛr po Nɛr-o coocoo kpélén, mó dimi aa: «Abnɛr sei! Abnɛr, vɛ a cɛl veeloo le?» Mí Abnɛr muli, mó dimi aa: «Nɔm nɛ̀ɛ́-nɛ̀ co yɛ hoo yondaa masaa o lani?»

¹⁵ Mí David ɲuna ndu aa: «Abnɛr, vɛ̀ɛ̀ vanapɔnɔɔ o tiiyàà kpɔdɔ le n co le? Ɔ́ɔ̀ kuubanɔ cɔw sulan a nɔm o lɛŋnde Israɛl-ten nin-ndo? Kɛ le yɛɛ nɛ a kanda vana nɔm bɛndoo le, masaa pɛɛn? Mí vanndo pum hun le masa kon diyɔɔ, masa co kon vana nɔm bɛndoo-o pɛɛn.

¹⁶ Dɛnɛ n tosa kon-ndo niŋ te. Lelan te Mɛlɛka co yoomu, fɔ mì niaa kpow la sɔla piɔ́mndo! Kani la kanda vana nia bɛndoo le, masa Mɛlɛka pɔla-o pɛɛn. La tofa vɔ masaa o bollen coo. Ɔ́ɔ̀ bállo a bɔlɔ ndɔ mamɛnndo?»

¹⁷ O kon mí Saul sina David diomndo, mó ɲuna aa: «Vɛ̀ɛ̀ nɔm David po ni co sɔɛi nuaa ni nɛ?» Mí David muli aa: «Oi, ya ni masaa, vana ni bɛndoo.»

¹⁸ Mí David ɲuna vɛlɛ aa: «Vana ni bɛndoo, vɛ ma va ya tovɔɔ ho? Yɛɛ nɛ ya tosa yɛ? Ɔ́ɔ̀ ɲɛ ya tɛɛmbuu-o?

¹⁹ Masaa, vana ni bɛndoo, yaŋ-ndɔ nilan, ma tuei ɲɛ ya vana nɔm baalaa co dimi-o. Te Mɛlɛka vem nɔm hee ya tosallo ni, màá sálà ya co ndu solul-lo ɲulul ndu kɔllo! Kɛ te vanndacieea vem nɔm hee tosaa ni, màá Mɛlɛka dɔw nda danga! Kani vannda co ya hau tovɔɔ mà va ya kuunaa calle o lɛŋnde Mɛlɛka ke vanaa ndɔa kɛ́ɔ len nin, kon co dimio ni maa ya kɔ sooluu halaa celennda.

²⁰ Kpòkóó! Màá kooma nian ma tala lɛŋ Mɛlɛka levil te fɔ́! Kani masa Israɛlla luɛi yondo le ya kpangbaɲaala fondoo ho nuwviaa a cɔwvo mɛɛ vana kɔa vɔlɔɔ tovɔɔ o pembon coo nuaa yɛ.»

²¹ O kon kɔɔli, mí Saul dimi aa: «Àá David po ni! I cua hakio. Muungu nanu. I tosal-lɛnin nɔm dɛnɛ vɔɔn te few. Kani yoomu nuu siŋnun hau ɲɛ sɔvɛɔ nɔm o hɔl. I tosa bɔɔ dɛnndan maa diɔm, i tosa bɔɔ dɛnɛ vɔɔn bɛndu!»

²² Mí David dimi aa: «Má cè bál masaa nanu! Buɛi nɔmndo pilɛ hun mò cua ndu.

²³ Màá Mɛlɛka kiolu yamɛi naa tɛɛn mò sala vana-vana mɛɛ sandii ndɔɛi a laalan ndɔɔ co yɛ! Mɛlɛka ndóò cii lɛhau nɔm malɔɔ ya o ba, kɛ i cɛl le nɔm diyɔɔ le, kani masa Mɛlɛka pɔla-o n co ni.

²⁴ Nduyɛ mɛɛ ya ce hau yoomu nɔmndo ɲɛ sɔvɛɔ nuaa yɛ, màá Mɛlɛka cɔ yoomu nuu ɲɛ sɔvɛ lende, mò baŋa ya le sangalan kpow!»

²⁵ O kon mí Saul dimul David aa: «David po ni, màá Mɛlɛka dɔw nɔm duaa mì ɲɛ-ɲɛ n co tosaa naŋ nɔm o ba!» Ken cuvɔɔ, mí David kɔannun, mí Saul ndu muungu o ndu lo.