1Samiɛl 22 - BII BILA

David siŋnun simlacinɔɔ kunda vanaa cɔwva pum coo

¹ O kon kɔɔli, mí David faŋan Kat lon, mó kɔ viannun o buululan Adulam nin. Mɛɛ bɛndaa ndɔa a yungu ndɔɔ kpow a tuei sɔɛi ken, má kɔa ndu kɔɔli lon.

² Handɔɔ o kon coo, mí vanaa va o sangalan nin-nda, vanaa kueelan la va coo-a a vanaa va a kɔlta tambɛilan-nda kpow a sɔɔnguu ndu ikɛi, a va le n'van kɛmɛ lehiɔɔlu. Mí David siŋnun simlacinɔ ndaa.

³ Mí David faŋan Adulam, mó kɔa Mispe o lɛŋnde Moab len nin. Mó kɔ dimul masaa Moab aa: «Cɛl mì fuɲa nuu nda kala nuu hun cal o nɔm ndo háá mì sina ɲɛ Hala tosanin a ya-o.»

⁴ Mí David kɔa a nda o masaa Moab lo bɛɛ, má lo lon háá mí telen David va o vionnɔnndo nin-ndo cuu.

⁵ Paale pum, mí Kad vana-tɛɛngaa-diom Hala-o dimul David aa: «Lo o vionnɔnndo nin te, cɔn mà muungu o tàndá Yuda-o nin.» O kon mí David can, mó kɔ kila caltan o bundɔɔ Herɛt nin.

Saul diw vanaa-solia-lasálàá va Nɔb-a

⁶ Mí masaa tuɛi David nda vanaa va balɔɔ ndu kɔɔli-a tɔ́ɔ́. Tuma kon, masaa Saul va icali Kibea, o pembei coo o yɔm tamariio bɛngu. Bál ndɔɔ va ndu o ba, buɛyaa ndɔa kpow va ndu isisi ikɛi.

⁷ Mí Saul dimul buɛyaa ndɔa kan aa: «Niaa vanaa fula o polale Bɛnyamɛn-nden nin-nda, la yaŋ nilan! La nɔ o kɔl maa po Yisai-yo tiwba mo ke niaa kpow yondola valtan a nakɔla n'rɛsɛnndan? Niaa ca ko aa mò siinguu vana-vana simlacinɔɔ le n'van vàá pilɛ te kon te n'van kɛmɛ o niaa tɛɛn? Kɛì-kɛì bɛɛ!

⁸ I sina maa niaa kpow yii ya dúmbú ni? La sina maa kpema icanyaa co po nuu nda po Yisai-yo tɛɛn, kɛ vana-vana dimul-la le. La co sinaa maa po nuu hiow buɛi nuu kɔɔli le ya cɔlɔbaa mɛɛ i co hau tosanndo nuaa yɛ, kɛ vana-vana buulan le ya mó hun dow ya ndi bali le.»

⁹ Mí Doɛk Edɔmnɔ va vana pilɛ o buɛyaa Saul-la tɛɛn-ndo dimi aa: «Paale pilɛ, mí ca po Yisai-yo hunɔɔ Nɔb ciee o Ahimelɛk po Ahitub-o lo.

¹⁰ Mí Ahimelɛk ɲuna Mɛlɛka le ndu, mó ke ndu ɲɛm dian, mó yɔngu ndu vɛlɛ mɔɛi cɔvii Koliat Filistinɔ-e.»

¹¹ O kon mí masaa Saul viam vannda má kɔ veelu Ahimelɛk vana-solia-lasálàá, ó va po Ahitub-o-o, má veelu vɛlɛ vanaa va vanaa-solia-lasálàá o yungu ndɔɔ nin má va icali Nɔb-a kpow. Mí nda kpede kɔa veelu masaa.

¹² Mí Saul dimi aa: «Nɔm po Ahitub-o, yaŋ-ndɔ nilan!» Mí Ahimelɛk vana-solia-lasálàá muli aa: «Vana bɛndoo, má cè ya.»

¹³ Mí Saul ɲuna ndu aa: «Le kɔlɔ yɛɛ nɛ niaa yii yɛ ya dúmbú niaa po Yisai-yo? Le yɛɛ nɛ n ke yɛ ndu baloo a mɔɛi cɔwve, má ɲuna vɛlɛ Hala le ndu, haliko mo simul-la, mò miingul-la yaŋɔɔlan? Nduyɛ lende kpeekpei o tosa lɛhau ni.»

¹⁴ Mí Ahimelɛk mulul ndu aa: «Kɛ masaa, o vanaa nɔmaa baalaa tɛɛn kpow, ɔ́ɔ̀ vana sandu maa David-o? Lefu nɔm o co ni, nɔm masaa pɛɛn, ndu co vanaa co nɔm kandaa-a bollen ni. Vannda ke vɛlɛ ndu bɛɛlen taw o cɛi lemasaa nin.

¹⁵ Vɛ̀ɛ̀ o laan koni ya ɲuna Mɛlɛka le ndu ni? O co ko o laan te. Yandi masaa, handu ya isɔɔ o lebol te! Handu vɛlɛ vana-vana o yungu nuu nin isɔɔ o lebol te. Kani ya vana nɔm baalaa, i sina isɔɔ a dɛnɛ kon kpow o kɔɔ le.»

¹⁶ Mí masaa dimul Ahimelɛk aa: «Nɔm Ahimelɛk, diwvo ya co niaa ni kpow niaa yungu nɔmndo.»

¹⁷ Mí masaa dimul vanaa va ndu kandaa-a aa: «La bii vanaa-solia-lasálàá Mɛlɛka-a ha, mì la diw nda. Kani nda bɛɛ va sinaa maa o ɲaanɔnndo nin David va ni, a dimul-la le, má muungu ndu malaa.» Kɛ buɛyaa ndɔa kan cɛl ma hol vanaa-solia-lasálàá Mɛlɛka-a baa le.

¹⁸ Le hee, mí masaa dimul Doɛk Edɔmnɔ aa: «Poo sei, cɔn mà diw vanaa-solia-lasálàá ha!» Doɛk cɛn nin ni, mó diw nda. N'van belaŋɔmaa a vanaa ŋuɛɛnu o dii ɲinkon ni, domala ifalennda solia lasálàlan la va nda kpow lekɔɔ.

¹⁹ Mí Saul diw vanaa va Nɔb-a kpow, kobi vanaa-solia-lasálàà kan pɛɛn. Mó diw vanpiaandua a vanlaandua, cuaambɔa a cɛlɛkpɛa, mó diw vɛlɛ nawva, sofɛlɛa, saa a cuinaa va lon-nda kpede.

²⁰ Fɔ Abiatar, po Ahimelɛk-o, po imama Ahitub-o, ndu pilɛ kpé hɛlun ni, mó ɲaanun nɛɛ David va-a.

²¹ Mí Abiatar kɔ dimul David maa Saul cii vanaa-solia-lasálàá Mɛlɛka-a kpow diw.

²² Mí David mulul ndu aa: «Kabi ɲinkon, mí sina maa Doɛk Edɔmnɔ co lakɔ ya lɔlɔɔ o Saul-lo, kani ndu bɛɛ va ɲinkon Nɔb. Le ya nda diw yungu nɔmndo kpow ni.

²³ Lelan kɔa lɛhau nɛɛ-nɛɛ le, lo nanu. Siòòŋii bii vɛlɛ nɔm le ɲɛ-ɲɛ le. Yaamɔɔ pilɔɔ kpé co naa tovɔɔ ni, cal-la ikɛi, ɲɛ-ɲɛ co nɔm yɔŋnɔn te.»