1Samiɛl 2 - BII BILA

Piɛile Anɛɛ len

¹ O kon mí Anɛɛ tosa piɛilen mó dimi aa: «Kɔl nuu co o piaa a ɲaaloo le kɛndɛi Mɛlɛka-e. Le kɛndɛi Mɛlɛka-e, siɛmbula co ya le. I nɔla nin mì mam yaamɔaa nia. I co a kɔlkɛndɔɔ, kani Mɛlɛka cii ya mala.

² Vana co o diandaa maa Mɛlɛka le, Hala naa ndu pilɛ kpé co pow kpovaa ni. Hala celen co o ndu kɔɔli le.

³ La híw sɔɔn kuundianndon dimi le, la solin ndɛ yeowlan o lasondo o sɔɔn niaan nin te. Kani Mɛlɛka co Hala sina dɛnndan kpow-vo ni, ndu kialu yamɛi dɛnnda vannda kpow ni.

⁴ Vanaa cɔvaa nɔ yoomuan-nda co kpaasiaala ndalan cɔu o yomio, kɛ mí vanaa nɔ mayoomu le-a sɔla yoomuan.

⁵ Vanaa va a pumaa-a co vallo nuwviaa le ɲɛdiaa sɔlaa, kɛ vanaa va a yiaan-nda, nda buulan ndɛ le vali le. Vanalanɔ vilu loo ndu velu cuawva nda ŋɔmmɛw, kɛ o nɔ cuawva taw-vo co lɛ violɔɔ le.

⁶ Mɛlɛka yɔngù piɔ́mndo ni, ndu koni yɔngù yoomoo ni. Ndu tuisi vana ciee-piɔ́m ni, ndu koni soli vɛlɛ vana ciee-piɔ́m ni.

⁷ Mɛlɛka siinguu vana vana bala fondoo ni, ndu koni siinguu vɛlɛ vana vana bolofaa ni, ndu tuisi vana tootoo ni, ndu koni heelu vɛlɛ vana ni.

⁸ Ndu cua vana ikɔɔ del lɛŋ-ndo mò simi ndu ni, ndu simi vɛlɛ vana ikɔɔ nda mal o sállo coo-o ni mò kɛsi nda o fondala sɔvɛlan. Kani Mɛlɛka cɔw sungbuma lelɛŋndan ni, mó kɛsi lɛŋnde kalalen lecoo.

⁹ Ndu manda vana lo o lediom coo-o ni, kɛ vanaa kɔlvesɛiya nda, o ɲumndan nin nda laasiàn ni. Kani vanacieo tiwba ɲɛ-ɲɛ sɔla a kpaaya ndɔɔ le.

¹⁰ Mɛlɛka co a hiilɛi o halataala le yaamɔaa ndɔa tɛɛmbuuo, kani ndu co yamɛi lɛŋnden kpede kiolɔɔ ni. Ndu lueì masa vanaa ndɔa yoomuan ni, mò cɔɔlu vana o hɛli-o masalen.»

¹¹ O kon kɔɔli, má mɛi Samiɛl Silo, Helii vana-solia-lasálàá o labɛngunin le Mɛlɛka baalaa tosallo, mí Ɛlkana ndu muungun o ndu lo Rama.

Laasian poaa Helii-a

¹² Vanaa fondoa poaa Helii-a va ni, ndáà nɔ siòòŋii Mɛlɛka le.

¹³ Vanaa-solia-lasálàá nda va ni, kɛ tofa vɔ mɛɛ ndáà tosal vannda yɛ: lɔ́ɔ́ lepum, te vanndo ndóò hin pɛ le sálàá solio, mì vision va ŋolɔɔ o yin, buɛi vana-solia-lasálàá ndóò sɔɔnguu a cukani ciŋun yaa-o o ba,

¹⁴ ndóò vow ndu o ɲɛi laandui va ŋolɔɔ-e nin, o va ikpɛɛnɛ, o va kɔɔfɛɛ, o va ibonyu. Ɲɛ-ɲɛ ndóò hɔw pɛ a cukani kon, ndóò soli kon, ndóò yoo vana-solia-lasálàá. Nuaa poaa Helii-a ndáà tosa a Israɛlaa va hunɔɔ o nɛɛ diandaa Silo-a kpow ni.

¹⁵ Lɔ́ɔ́ lepum yɛ, telen pá ndáà hun loam cuɛima cɔlu solin sálàá-an, buɛi vana-solia-lasálàá ndóò hin, ndóò dimul vana co sálàá solio-o aa: «Ke ya visiei mì tuɛi le vana-solia-lasálàá, kani o cɛlnin visin nɔmndon n'yavan te, fɔ n'kiyɛiyon.»

¹⁶ Te vana kon ndóò mulul ndu pɛ aa: «Cum-ndɔ mì vana lom fɔlɔn visin macuɛiyon, o kon a cua niko o hɛnan nɔm-ndo», buɛi kon ndóò mulul ndu aa: «Ɛ-ɛ, sisa n bɛnda ma ke ya ni, te o co kon te, i cua a paa-kala.»

¹⁷ Nuaa poaa Helii-a va hakilan kɔndɔɔ taw a Mɛlɛka ni. Kani ndáà ke Mɛlɛka lebɛɛ a sálàla vannda va ndu solullo lan te.

¹⁸ Kɛ Samiɛl ndu, o lo o pɔmbɔ, mó va baala ndɔɔ tosaa Mɛlɛka o hɔl, doma ifalen solia lasálà nda toosiaa a kola keesoo-o va ndu lekɔɔ.

Helii dɔw yungu Samiɛl-lo duaa

¹⁹ Vɔsi oo vɔsi, te kalaa Samiɛl ndóò cɛn pɛ kɔlan Silo nda pɔnɔ ndɔ le Mɛlɛka sálàá solullo, ndóò sɔɔluu doma pɔmbɔɔ, ndóò yoo po ndɔɔ.

²⁰ Nduyɛ, Helii va Ɛlkana nda laa ndɔ duaa dɔvɔɔ aa: «Màá Mɛlɛka ke niaa cuavaa celen niaa lanɔɔ ho o fonda Samiɛl-lo, o ó yɔngu le vali ndɔɔ-o pɛɛn!» Ndóò cii pɛ nda duaa dɔvɔɔ lende, ndáà muungu o nda lo.

²¹ Mí Mɛlɛka yiyan Anɛɛ coo, mó vialu vɛlɛ poaa nda yáá, a cuavaa laandua nda ŋiɔn. O telen kon bɛngu, Samiɛl va hindɔɔ o baala Mɛlɛka-o nin.

Helii soo poaa ndɔa

²² Helii ndóò yuuva nin taw, mó tuɛi ɲɛ poaa ndɔa va tosaa a Israɛlla-o, mó tuɛi vɛlɛ maa a va hinilan a vanlaandua va hunɔɔ baalaa tosaa o Cɛi-Hala-o sondoo-a.

²³ Mó dimul nda aa: «Vannda kpow a co sɔɛi a dɛnnda vɔɔnnda niaa co tosaa lan o kɔɔ. Le yɛɛ nɛ niaa co yɛ tosaa lende?

²⁴ Poaa nia, la pɛngi dɛ! Ɲɛ ya co tueyɔɔ a niaa o kɔɔ-o niŋ te, la co tosaa mí vanaa Mɛlɛka-a va kasio delɔɔ.

²⁵ Te vanacieo cua pɛ hakio a vanaciee celen, Hala kelu yamɛi ndɔɛi. Kɛ te vanacieo cua pɛ hakio a Mɛlɛka, nɛ̀ɛ́-nɛ̀ soaa yɛ le ndu?» Kɛ a yeŋ fuɲa nda lani le. Kani Mɛlɛka ndóò cii nin tuu le piɔ́m ndaa.

²⁶ Samiɛl-lɛ, o va hiovɔɔ laci tuŋ a hindɔɔ, mó va vanndacieea a Mɛlɛka hɛnanndo.

Dɛnɛ palaa dimin le Helii nda yungu ndɔɔ-o

²⁷ Mí vana-tɛɛngaa-diom Hala-o pum komal Helii, mó dimul ndu aa: «Nuaa Mɛlɛka dimi ni aa: ‹A sina maa mí yáà cɔmnun fuɲaa nɔmaa mamaa lɔ́ɔ́ nda va o cɛlen nin masaa Esipte o ba-o.

²⁸ A sina maa o yungula yɛ́-yɛ́la Israɛlla tɛɛn kpow, fuɲa nɔm imamaa Aarɔn yáà hɛli ni, mó va vana-solia-lasálà nuu, haliko mi ndóò va sálàlan solio o fonda-loamaa-lasálà nuu coo le ansan lomɔɔ a le ya ɲunaa o sɔɔn nin. Nda poaa ndɔa yáà ke vɛlɛ ɲɛm Israɛlla va sálàlan solio-on n'pum ni.

²⁹ Kɛ le yɛɛ nɛ niaa co yɛ sálàlan a ɲɛm-kén ya dimi le solio o Cɛi-Diandaa nuu nin-ndon tɛɛmbuuo? Vɛ̀ɛ̀ poaa nɔmnda n hiow bɛɛlen ke a ya? Le yɛɛ niaa co yɛ visin kɛndɛ-kɛndɛn macuɛin Israɛlaa nia co ya sálàlan solullo-on dioo?›

³⁰ Lelan, Mɛlɛka Hala Israɛlla dimi aa: ‹A toɲa, mí yáà tuu le yungu fuɲa nɔm-ndo a polale nɔmnden siinguuo vanaa-solia-lasálàá le lɔ́ɔ́-lɔ́ɔ̀. Kɛ sisa, a cii dimi kpendekele maa o ve lɛnin lende le. Kani vanaa ke ya bɛɛlen-nda ya bɛɛ ke bɛɛlen ni, kɛ i tuisinin vanaa co ya yii luɛyɔɔ le-a siɛmbulan.

³¹ O lo nin telen bingi, mì kaasoŋaa co o polale nɔmnden nin a o polale fuɲa nɔm-nden nin-nda kpede a sɔla piɔ́mndo. O kon, vana yuuvɛi ve lɛnin niaa tɛɛn te.

³² A canin vana celen baalaa o cɛi-kola-toandaa diandaa nuu nin, mì ɲɛ-ɲɛ fee muungu o kɛndɛ le Israɛlla. Kɛ nduyɛ le fɛɛn a fɛɛn nin, vana-vana yuuva lɛnin o yungu nɔmndo nin te.

³³ Kɛ, i mɛinin vana pilɛ o polale nɔmnden nin, mò lo o fonda-loamaa-lasálà nuu ikɛi, haliko mi mɔnɛi bii ndu, mò ŋɔɔcian. O telen kon, vanaa nɔmaa tɔ̀a kpow a sɔlanin piɔ́mndo o felengiyɛi nin.

³⁴ A canin tɔɔmasele sɔɔn mun a ɲɛ yɔŋnunnin poaa nɔmaa ŋiɔnda-o, Hɔfni nda Pineas pɛɛn. Nda ŋiɔn kpow, a sɔlanin piɔ́mndo o paale pilɛ len nin.

³⁵ O kon kɔɔli, i hɛlinin vana-solia-lasálà sandaa biinin diom nuu-o, ó tosanin hɛnan nuu-o pɛɛn. I yɔngunin ndu poaa, mí poaa kan siŋnun vanaa-solia-lasálàá masa ya hɛlinin-ndo ikɛi le fɛɛn a fɛɛn.

³⁶ Nduyɛ, vana lonin kon yoomu o polale nɔmnden nin-ndo baŋnin vulan vana-solia-lasálàá o labɛngunin le volii támái, te kon te le buloo pilɛ sɔlaa, mò dimul ndu aa: Yandi, ke ya vali ya nɔla tosaa vanaa-solia-lasálàá ikɛi mì dɔwnun balo-o.›»