1Samiɛl 19 - BII BILA

Yonatan soo le David

¹ Mí Saul cɔm Yonatan po ndɔ a vanaa bɛndua va ndu Saul o ba bɛngu-a kpow tuu ndóò nɔ le David diyɔɔ-o. Kɛ mɛɛ Yonatan ndóò kaola David taw yɛ,

² mó kɔ cɔɔmuu fuɲa ndɔ o ndu David lo, mó dimi aa: «Saul fuɲa ni co nɛilan nuwviaa le nɔm diyɔɔ. Lelan siɔdii mɛɛ ma caa taw. Kindin ma nuwviaa fonda kɛndɛ-kɛndɔɔ pum, ma kɔ vionnun ndon.

³ I liilanin fuɲa nuu yondoo nin, nɛɛ n vanin o viannanndo-a, mì sim ndu ikɛi, mì buusial ndu sɔɛi nɔmnde, haliko mi sina ɲɛ o nɔ o kɔl a nɔm-ndo, o kon mì kɔ dimul nɔm.»

⁴ Mí Yonatan dimul Saul fuɲa ndɔ sɔɔn kɛndɔn taw a David o kɔɔ, mó dimi vɛlɛ aa: «Nɔm masaa, a bɛnda ma cua hakio a David buɛi nɔm te. Kani dɛnɛ nɔm kɛndɔɔ daama o co nuwviaa ni, o tɛɛmbuu isɔɔ a nɔm te few.

⁵ O vɔngul yoomu ndɔɔ le Koliat Filistinɔɔ diyɔɔ. Ɲinkon, mí Mɛlɛka mala Israɛlla kpow má nɔla yaamɔaa ndaa. Mí nɔm pila ca dɛnɛ kon, nduyɛ ma dɔawnun ɲaale a ndu. Le yɛɛ nɛ n co yɛ niko hakio cuaa ma cii yoomu vana tɛɛmbuu isɔɔ loo? Le yɛɛ nɛ n yeema yɛ le David diyɔɔ o fondo fúúo coo?»

⁶ Mí Saul tuɛi Yonatan diom, mó mɛnan aa: «Te Mɛlɛka co yoomu, David sɔlanin piɔ́mndo le!»

⁷ O kon kɔɔli, mí Yonatan kɔ veelu David, mó downun ndu kona a sɔɔn mun kpede o kɔɔ. Mó mingi ndu Saul o ibuŋ. Mí David muungu vɛlɛ baalaa tosaa masaa Saul o labɛngunin maa paandu.

Mikal ciindiaa David

⁸ Mí cɔwvo kandun vɛlɛ, mí David kɔa le Filistia cɔlɔbaa. Mó diw nda háá mí a tɔ̀a sɔɔndian.

⁹ Paale pum, mí kɔl vɔɔn fula Mɛlɛka o ba-o hun luɛi Saul nin nɛɛ o va icali o ndu lo cɛinin-nda, bállo va ndu o ba. David ndu va bangaa lɔɔ,

¹⁰ mí Saul vuu bállo le David cukɔɔ, kɛ mí David faŋan, mí bállo kɔ baŋnun o cɛiyo. Icɔl kon, mí David pilapilan, mó kɔannun.

¹¹ Mí Saul viam vannda, má kɔ balu cɛi David-o pindo, má lɔl ndu cumullo le ndu diyɔɔ idiiyo. Kɛ mí Mikal laa ndɔ dimul ndu aa: «David sei! Taa ɲeenun cɔɛllɛn te, o vílɛ́iyo n co va siɔdii ni.»

¹² Mí Mikal tuisi ndu o dio-pɔmbɔɔ, mí David ɲaanun le milin ndɔɔ ciindiaa, mó kɔannun.

¹³ O kon kɔɔli, mí Mikal cua piɔm-tongoninndo, mó yambu ndu o David lo kpele, mó kuumbuu ndu kolaa, mó handu yáw cuinndo ndu o lebol o kpeloo bollen.

¹⁴ Tuma vanaa Saul vem kan le David biyɔɔ-a hin-ndo, mí Mikal dimul nda aa: «O co kɛndia le.»

¹⁵ Mí Saul mingi nda vɛlɛ pila, mó dimul nda aa: «La muungu mì la kɔ tofa David, mì la cua ndu a kpele ndɔɔ kpede, mì la cuu ya ndu, mì dii ndu.»

¹⁶ Mí kiilaa masaa muungu, má luɛi cɛinin, má komal piɔmndo o yambaa o kpele, yáw cuinndo va ndu o lebol o kpeloo bollen.

¹⁷ Mí Saul ɲuna Mikal aa: «Le yɛɛ nɛ n hui yɛ ya nuaa? Le yɛɛ nɛ n mal-lɛ yaamɔɔ nuu kɔnndan?» Mí Mikal mulul ndu aa: «Nuaa o dimul-la ni aa te ya mel ndu kɔnndan te o dii ya.»

David kɔɛ Rama o Samiɛl lo

¹⁸ Nuaa David looku hiɔlɔn ni mó ɲaanun. Mɛɛ o hɛlun lende, mó kɔa Rama o Samiɛl lo, mó kɔ downun ndu kona a ɲɛ-ɲɛ Saul tosa a ndu. Má kɔa Nayɔt nda Samiɛl, má kɔ cal lon.

¹⁹ Mí vannda dimul Saul aa: «Tofa vɔ, David co Nayɔt, o kobio Rama ikɛi.»

²⁰ Mí Saul viam vɛlɛ kiilaa le kɔlan David biyɔɔ. Kɛ a komal vanaa-tɛɛngaa-diom Hala-a kundaa kpilin, a va diom Hala-o tɛɛnguuo, Samiɛl va nda bollen ni. Mí kɔl Mɛlɛka-o luɛi kiilaa Saul vem kan-nda nin, mí nda bɛɛ kandu diom Hala-o tɛɛnguuo.

²¹ Mɛɛ vannda kɔ dimul Saul sɔɛi ken, mó viam vɛlɛ kiilaa celen, mí kan bɛɛ kɔ saan diom Hala-o tɛɛnguuo. Mí Saul viam vɛlɛ kiilaa celen o yàándɔɔ, mí kan bɛɛ kɔ saan diom Hala-o tɛɛnguuo.

²² O mɛɛlulan, mí Saul pila kɔa Rama. Tuma o tiiya o soon mandaa mamɛn va Seku-o-o, mó ɲuna aa: «Kuɛɛ nɛ Samiɛl nda David co yɛ?» Mí vannda mulul ndu aa: «A co Nayɔt, o kobio Rama ikɛi.»

²³ Mó bii nɛiyo le kɔlan ndon. Ndu bɛɛ lo kɔlan, mí kɔl Mɛlɛka-o luɛi ndu nin, mó va kɔlan a diom Hala-o tɛɛnguuo háá mó kɔ tiiya Nayɔt, kobio Rama ikɛi.

²⁴ Mí ndu bɛɛ solin volɔɔlan lekɔɔ maa caanda, mó muungu diom Hala-o tɛɛnguuo Samiɛl o hɔl. Mó del lɛŋ kɔɔle fondo, mó niinu ihini lon kpɛŋ, mó lɔl vɛlɛ pii. Lelan vannda dimì ni aa: «Mò va maa vana-tɛɛngaa-diom Hala-o Saul bɛɛ siŋnun ni?»