1Samiɛl 17 - BII BILA

Koliat tɛɛndan vanaa cɔvaa Israɛlla

¹ Mí Filistia bɔɔŋiaa vanaa ndaa cɔwva le cɔwvo. Má cuungian Soko, o tàndá Yuda-o nin, má kila dɔ́ɔ́ngɔ́ ndaa Efɛs-Damim, Soko a Aseka tɛɛn.

² Mí Saul nda vanaa ndɔa cɔvaa Israɛlla bɛɛ a cuungian, má kila dɔ́ɔ́ngɔ́ɔ̀ o Ból Terebɛnteo nin. Má bɛɛndian le cɔwvo nda Filistia.

³ Filistia va o pembei coo kɔngɔɔ pilɔɔ, Israɛlla nda va o pembei pilɛi coo leeloo, mí bóllo va nda tɛɛn.

⁴ Mí vana cɔwvo pum fula o dɔ́ɔ́ngɔ́ Filistia nin, mó hun sim kundala tiɔnnda vanaa cɔvaa kan tɛɛn, diolan ndɔlan aa Koliat. O kobio Kat nin ndóò fula ni. Bandii ndɔɛi va le dunndo leŋɔmpum a suon piasaa lepilɛ.

⁵ Mɔsil n'daɲaa va ndu o lebol, doma cɔw va ndu lekɔɔ-o daɲan o va ni, o va lusullo le kilolan belaŋɔmpum.

⁶ Samtala n'daɲalan la va ndu o n'pelu, bál n'daɲaa va ndu o landanndo o congú.

⁷ Piaw bál ndɔɔ va celullo maa pikii nda simbulu kola lɔaa-e. Yɛŋnde bál ndɔ kon le va lusullo le kilolan tan ŋɔmmɛw. Vana ndɔ cuaa kɔ̀ɔ̀ cɔwvo va ndu kɔlan laci.

⁸ Mí Koliat sim, mó yondal vanaa cɔvaa Israɛlla aa: «Le yɛɛ niaa fula yɛ mí la sim le cɔwvo a naa? Ya Filistinɔɔ ya co ni, niaa yɛ cɛa Saul-la niaa co ni. La hɛli vɔ hau vana pilɛ o niaa tɛɛn mì vana kon hun simul-la.

⁹ Te vana kon nɔla pɛ ya, n siŋnunnin cɛa niaa, kɛ te i nɔla pɛ ndu mi dii ndu, mɛɛ niaa siŋnunnin cɛa naa ni.»

¹⁰ Mí Koliat Filistinɔ kon dimul vɛlɛ Israɛlla aa: «Hau, i kilu vanaa cɔvaa Israɛlla kpélénndo. La viom ndɔ hau vanapɔnɔ yáwlen le tiw-vo mò hinul-la a cɔwvo, mì n cɔman vanapɔnɔyɛi naa ndu.»

¹¹ Lɔ́ɔ́ Saul nda vanaa ndɔa cɔwva kpow tuei sɔɔn mun-ndo, mí siòònde bii nda taw.

David dii Koliat

¹² Nduyɛ, David po Yisai Efratiinɔ-o o va ni, Bɛtlɛhɛm o tàndá Yuda-o nin Yisai kon ndóò fula ni. Poaa nda ŋɔmaa ndóò nɔ ni. O paale Saul-ten, ndóò yuuva nin taw.

¹³ Mí poaa ndɔa yáá-a tasea kɔa o cɔwvo Saul kɔɔli, po tasoo diolan Eliab, o diinndɔɔ Abinadab, o yàándɔɔ Samma.

¹⁴ O poaa ndɔa kpow tɛɛn, David va cuaambɔɔ ni. Telen bɛndaa ndɔa yáá-a kɔɛ Saul kɔɔli o cɔwvo-o,

¹⁵ David va kɔlan o Saul-lo, o va vɛlɛ muungoo Bɛtlɛhɛm le cɔlua fuɲa ndɔ-a mandaa.

¹⁶ Háá palɛi belehiɔɔlu, Koliat Filistinɔ va kɔlan yongaa sɔɛi paalen a ɲumndan.

¹⁷ Paale pilɛ, mí Yisai dimul David po ndɔ aa: «Cua bɔlɔ kulun toaŋaa ho a bululan ndan tɔ́, ma yoo bɛndaa nɔmnda cɔ́-cɔ́ o dɔ́ɔ́ngɔ́.

¹⁸ Cua vɛlɛ cuɛima nɔnɔan man kpungban tɔ́, ma yoo simlacinɔ cɔw co kunda ndaa bollen-ndo. Mà kɔ tofa te bɛndaa nɔmnda co kɛndɛ. O kon, a bii ɲɔɔ pum nda o ba le tɔɔmaseloo, a hun cɔm ya tɔɔmasele kon.

¹⁹ A co nda Saul-aa a vanaa cɔvaa Israɛlla kpow latulu nɛɛ nda co cɔwvo nda Filistia o Ból terebɛnteo nin-nda.»

²⁰ Diimandɔɔ idiiyo púŋ, mí David can, mó tosa mɛɛ Yisai dimul ndu yɛ. Mó mel vana mandaa n'cɔlu celen saa ndɔa. Mó cua niko ɲɛm ndóò bɛnda le cuaa-on, mó kɔannun mɛɛ Yisai fuɲa ndɔ ndóò dimul ndu yɛ. Tuma vanaa cɔwva va fulaa o dɔ́ɔ́ngɔ́, má va yondaa le bɛɛndianndo le cɔwvo-o kpafii o tiiya ni.

²¹ Israɛlla va a simulannda nda Filistia le cɔwvo.

²² Mɛɛ David tiiya lon, mó tuisi volɔɔlan, mó yɔngu vana mandaa lavolɔɔ volɔɔla ndɔlan, mó hiaw a kiltan nɛɛ vanaa cɔwva va-a. Ndóò tiiyaa dɔ́ɔ́, mó yil bɛndaa ndɔa, mó ɲuna nda lavàà lon.

²³ O lo suukanndo nda bɛndaa ndɔa, mí Koliat Filistinɔ fulá Kat-o fula lɛ ɲinkon yongaa sɔɛi nda o hɔl mɛɛ ndóò dema tosa yɛ. O kon, mí David tuɛi sɔɔn yongan mun.

²⁴ Mɛɛ Israɛlla ce lɛ langbanɔɔ kon ɲinkon, mí siòònde bii nda kpow, má ɲaanun.

²⁵ Mí vana-vana o Israɛlla tɛɛn va dimio aa: «Àá mɔnɛi! La ce mɛɛ langbanɔɔ ho co naa hunɔɔ tɛɛndanndo yɛ? Vana tiwnin ba hoo diyɔɔ-o ndu, masaa kenin bɔɔ vana kon bolofaa, o yɔngunin ndu vɛlɛ cua ndɔɔ o nɔ̀u nin. Yungu vana kon bɛɛ sɔlanin bɔɔ tɔnɔla bɔɔ-bɔɔ o lɛŋnde Israɛl-ten nin!»

²⁶ Mí David ɲuna vanaa cɔvaa va ndu ikɛi-ya aa: «Vɔngɔ yɛɛ nɛ nda dɔaw yɛnin vana diinin Filistinɔɔ ho, mò soli Israɛlla mɔnɛi-yo? Yɛɛ nɛ Filistinɔ dii ho tooma loo co yɛ, mó hun sim vanaa cɔvaa Hala yoomaa yeowlan?»

²⁷ Mí vannda mingi sondo, má cɔm David vɔ̀ngɔ́ kelun le vana diinin Koliat-o yɔngoo-o.

²⁸ Kɛ Eliab bɛ ndɔ tueyɔɔ David suukanndo nda vanaa cɔwva, mó tambu kɔl a ndu, mó ɲuna ndu aa: «Yɛɛ nɛ n hin yɛ tosa nanu? Nɛ̀ɛ́-nɛ̀ n mel-lɛ saa a cuinnda yondoo nin? I sina kuundian nɔmndo a cɔmnɔn co nɔm o kɔl-lo válán. Le cɔu mɛɛ cɔwvo co tosanndo yɛ n hun tiiya nanu nuaa dí ni.»

²⁹ Mí David ɲuna ndu aa: «Dɛnɛ vɔɔn yɛɛ nɛ ya tosa yɛ? Mo va le sɔɛi ya soo hee daama-e ni?»

³⁰ O kon mí David faŋan nɛɛ bɛ ndɔ va kan-nda, mó kɔ ɲuna vana celen sɔɛi pilɛi ken. Mí ndu bɛɛ mulul ndu muli pilɛ kon.

³¹ Mí vannda kpow a tuɛi sɔɔn David dimi-on, má kɔ downun Saul kona, mí ndu Saul viam dɔ́ɔ́ vanndo David kɔɔli.

³² Mí David dimul Saul aa: «Vana-vana vu n'dial le Filistinɔɔ ho le. Ya, i co lakɔ ndu cɔlɔba.»

³³ Mí Saul mulul David aa: «A nɔla Filistinɔɔ ho simullo le, kani a co vɔ o bɔɔ le. Kɛ ndu ndu, o lo felengi mó kandu cɔwvo.»

³⁴ Mí David mulul Saul aa: «Tuma ya vana nɔm baalaa va saa fuɲa nuu mandaa-o, te yàlàá, te kon te kɔ́lɔ́vúloo ndóò hin pɛ le saa pilɛ biyɔɔ,

³⁵ yáà ɲaanun ndu kɔɔli, yáà lɔɔ ndu, yáà hɛlu ndu cɔlu o bii-o o sondo. Te ndóò mulin pɛ le ya kpuvaa, yáà bii ndu kɛsei, yáà lo ndu lɔɔ háá ndóò vi.

³⁶ Nuaa buɛi nɔmndo ndóò diw yàlàá a kɔ́lɔ́vúlua ni. Lende koni ya tosanin a Filistinɔ dii hoo toma loo ni, le yei o yei vanaa cɔvaa Hala yoomaa-o.»

³⁷ Mí David dimi vɛlɛ aa: «Mɛlɛka kanda ya lɔ́ɔ́ kon, yɛmbɛn yàlàá a yɛmbɛn kɔ́lɔ́vúloo n nɔla ya loo, kandanin vɛlɛ ya. Nduyɛ Filistinɔɔ ho bɛɛ nɔlanin ya le.» O kon, mí Saul dimul ndu aa: «Mɛɛ kɔ! Màá Mɛlɛka va nɔm ikɛi!»

³⁸ O kon, mí Saul dovi David a volɔɔla ndɔla cɔwla ndu pila lan, mó vow ndu mɔsil n'daɲaa, mó vow ndu vɛlɛ doma cɔw n'daɲaa.

³⁹ Mí David sayian vɛlɛ mɔɛi cɔvii Saul-le o doma n'daɲa ndɔ kon coo. Mó tuundan le kɔlan, kɛ o tiwba le. Kani ndóò dema ɲɛla vaa lende vownɔn te. O kon mó dimi aa: «I nɔla kɔlan a lan lekɔɔ le, kani i dema lan vownɔn te.» Mó soli lan.

⁴⁰ Mó cua sionnde ndɔlen, mó kɔa o pee pɔmbɔɔ kɔllo, mó cɔwviaa powta kpɔlɔkaalan tan ŋuɛɛnu, mó vow lan o bɔlɔ ndɔ mandaa n'cɔloo nin, mó bii fáàndaa o ba, mó kuel Koliat Filistinɔ.

⁴¹ Mí Koliat bɛɛ va David hinullo. Vana ndɔ cuaa kɔ̀ɔ̀ cɔwvo va ndu kɔlan laci.

⁴² Koliat mɛɛndanndo David, mó tɛɛndan ndu, kani felengi pɔmbɔ-pɔmbɔ o va vɔ ni, yáwvo va ndu o ningilaa ningili, hɔlla va vɔ ndu a kɛndɛ válán.

⁴³ Mí Koliat deŋul ndu aa: «Mò va maa tunndo ya co le ya hinullo a siondei ni?» Mó dɔaw David danga o halaa Filistia lo,

⁴⁴ mó dimul vɛlɛ ndu aa: «Tiiya vɔ nanu, i co yovaa co balɔɔ coocoo-a a visia yondoa dialun nɔmndon yɔngu, má dɔwnun balo a mun!»

⁴⁵ Mí David mulul Koliat aa: «Nɔm co ya hinullo a mɔɛi cɔwve, a kɔɛi a á bállo. Kɛ ya, i co nɔm kuel o diola Mɛlɛka-Nɔ-Kpaayaa-Kpow-vo lan, Hala vanaa cɔwva Israɛl, o n yei-yo pɛɛn.

⁴⁶ Hau, Mɛlɛka co nɔm malɔɔ ya o ba, mì dii nɔm, mì kelu nɔm bollen. Paalen nden hau, mɛɛ mì yɔngu vɛlɛ yovaa co balɔɔ coocoo-a a visia yondoa vanaa cɔvaa Filistia a vílɛ́iya. O kon, mì vannda kpow a sina maa Hala co Israɛl.

⁴⁷ O laan vannda ha kpow a co sina ni maa o co a mɔɛi cɔw, te kon te a bál te Mɛlɛka baŋa vana le. Mɛlɛka co naa mala mì n nɔla niaa, kani ndu Mɛlɛka nɔ cɔwvo o ba ni.»

⁴⁸ Telen Koliat va David hinullo-o, mí David ɲaanun kudu-kudu, mó toal nɛɛ cɔwvo va tosanndo-a, mó kuel Koliat.

⁴⁹ Mí David vownun baa o bɔlɔ, mó soli powvo o pilɛ, mó vuu ndu a fáànda ndɔɔ, mí pow kon kɔ bii Koliat o tendei kpafii, mó sɔɔŋa ndu o itendu. Mí Koliat del o kuumbuan o kɔl coo.

⁵⁰ Nuaa David dii Koliat a pow fáàndaa ni, mɔɛi cɔvii ve ndu o ba le.

⁵¹ Mí David ɲaanun cɔ́-cɔ́ nɛɛ Koliat va-a, mó soli mɔɛi cɔvii Koliat kon o boo ndɔɔ nin, mó kialu ndu bollen a ndi. Filistia cɔu maa kuubanɔ nda cɔwvo vi, má sɔɔndian.

⁵² Mí vanaa cɔvaa Israɛlla a haa Yuda a yonda yonda cɔwvo, má ɲaanun Filistia kɔɔli háá o bóllo landɔnndo, Kat a Ekrɔn ciee-lekɔɔ. Filistia vílɛ́iya va ihini lɛ́ɛ́siɛn o nɛi Saaraim-ndo.

⁵³ Mí Israɛlla pɛngi kiltan nda kɔɔli, má muungu o dɔ́ɔ́ngɔ́ Filistia nin le ɲɛm ndan cɔwviaa.

⁵⁴ Mí David cua bolle Koliat len, mó kɔa a len Yerusalɛm. Mó manda ɲɛm cɔvun Filistinɔ kon o cɛi-kola-toandaa ndɔɔ nin.

Yonatan yiinan canyɛi nda David

⁵⁵ Tuma Saul ndóò ce David Koliat kuello-o, mó ɲuna Abnɛr va simlacinɔ vanaa cɔwva-o aa: «Abnɛr sei! Nɛ̀ɛ́-nɛ̀ kpeekpei velu yɛ poombɔ felengoo ho?» Mí Abnɛr mulul ndu aa: «Masaa a toɲa, i sínà le.»

⁵⁶ O kon mí masaa dimul ndu aa: «Kindin ma sina vana velu ndu-o.»

⁵⁷ Lelan, telen David cii Koliat diyɔɔ mó muungu o dɔ́ɔ́ngɔ́ɔ̀ nin-ndo, mí Abnɛr kɔ veelu ndu, má kɔa nda ndu o Saul lo. Bolle Koliat Filistinɔ len le va vɔ David o ba.

⁵⁸ Mí Saul ɲuna David aa: «Ponndo sei! Nɛ̀ɛ́-nɛ̀ velu yɛ nɔm?» Mí David mulul ndu aa: «Po buɛi nɔmndo ya co ni, Yisai fula Bɛtlɛhɛm-ndo pɛɛn.»