1Samiɛl 16 - BII BILA

Mɛlɛka suili David masaa

¹ Mí Mɛlɛka ɲuna Samiɛl aa: «Ma lo caŋndo le Saul háá lɔ́ɔ́ kuɛɛ nɛ? Ya pila cii ndu kɛɛ, o ve lɛnin masa Israɛlla coo le lɔ́ɔ́-lɔ́ɔ̀ le. Cua lee macuɛi nɔmndo ma pei cuɛiyan lenin, ma kɔɛ o Yisai Bɛtlɛhɛmnɔ lo. Kani o poaa ndɔa tɛɛn ya hɛli masa ya yeema-o ni.»

² Mí Samiɛl ɲuna aa: «Vɛ̀ɛ̀ ya looku yɛnin lakɔ? Te Saul tuei pɛ maa i kɔɛ lon, o dii ya.» Mí Mɛlɛka dimi aa: «Te a va pɛ kɔlan, a bii naw téndóó, a kɔɛ a ndu, a kɔ dimi aa: ‹Mɛlɛka ya hin sálàá solul ni›.

³ O kon, a veelu Yisai le sálà kon. I dimulnin nɔm ɲɛ n bɛnda le tosaa-o, mì cɔm nɔm vana n pɔlanin le baala nuu-o.»

⁴ O kon mí Samiɛl tosa mɛɛ Mɛlɛka dimul ndu yɛ, mó kɔa Bɛtlɛhɛm. Kaasoŋaa kɔlkalua va o kobi kon nin-nda cɔu ndu hunɔɔ, má hun ndu bɔŋaa a buulanndo. Má dimul ndu aa: «Màá hunɔɔ nɔmndo va sɔɛi kɔlɲulu fɔ́!»

⁵ Mí Samiɛl muli aa: «O co sɔɛi vɔɔn te. Sálàá ya hin Mɛlɛka solul ni. Niaa bɛɛ la co a veelaa. La dindin, mì la sɔɔnguu ya ikɛi le sálàá.» Mí Samiɛl dimul vɛlɛ Yisai nda poaa ndɔa maa a dindin le sɔɔnguuo le sálà kon.

⁶ Tuma nda tiiya-o, mí Samiɛl del Eliab lehɔl, mó dimi o kɔl nin aa: «Hoo ndu kɛsɛ-kɛsɛ, ndu Mɛlɛka hɛli ni.»

⁷ Kɛ mí Mɛlɛka dimul Samiɛl aa: «Ɛ-ɛ, tofa ndu le tùú o naŋ hɔlla mó caa simndan-ndo le, o co ndu le ya hɛli le. Kani ya-ya, yiyan nuu co maa yiyan vanaciee le. Diallon kínɛí vanacieo ndu tofa ni, kɛ ya ya, ɲɛ co o kɔllo nin di-o ya ca ni.»

⁸ Mí Yisai veelu Abinadab, mó cɔm Samiɛl ndu. Mí Samiɛl dimi aa: «O co vɛlɛ hoo le Mɛlɛka hɛli le.»

⁹ Mí Yisai cɔm vɛlɛ Samiɛl Samma, mí Samiɛl dimi aa: «O co hoo le Mɛlɛka hɛli le few!»

¹⁰ Mí Yisai cɔm Samiɛl poaa ndɔa ŋɔmmɛw-va kpede, kɛ mí Samiɛl dimi aa: «Mɛlɛka hɛli o kɛ́-kɛ̀ o nda tɛɛn te.»

¹¹ O mɛɛlulan, mí Samiɛl ɲuna Yisai aa: «Vɛ̀ɛ̀ o celen co lɛ kɔɔli o poaa nɔmnda tɛɛn te?» Mí Yisai mulul ndu aa: «O pilɛ co yondo, ndu co lumndo ni. O yɛɛ cɔlua diólan.» Mí Samiɛl dimul Yisai aa: «Viom vanndo mo kɔ veelu ndu, kani mɛɛ mo va nanu malan naa n dia ɲɛdiaa sálàá ho.»

¹² Mí Yisai viam vanndo ndu veelu. Vana siaŋaa David va ni, ndóò naŋ hɔlla taw, ndóò caa vɛlɛ simndan. Mɛɛ o tiiya dɔ́ɔ́, mí Mɛlɛka dimul Samiɛl aa: «Hoo ya hɛli le siŋnɔnndo masaa ni. Cɔn ma pɔla ndu.»

¹³ Mí Samiɛl cua lee macuɛiyo, mó tala cuɛima va lenin-ndan David o lebol bɛndaa ndɔa o hɔl. Kandɔɔ paale len, mí kɔl Mɛlɛka-o toal David coo. Mɛɛ Samiɛl cii tosa lende, mó can, mó muungun Rama.

David kandu baalaa Saul o ba

¹⁴ Mí kɔl Mɛlɛka-o faŋan Saul nin. Mí kɔl vɔɔndo pum fula Mɛlɛka o ba, mó luɛi ndu nin, mó va ndu saangiaa taw.

¹⁵ Mí buɛyaa Saul-la dimul ndu Saul aa: «Hala tosa ni mí kɔl vɔɔndo luɛi nɔm nin, kɔl kon co nɔm saangiaa ho ni.

¹⁶ Taa cɛl pɛ n nuwvial nɔm vana caa bangaa lɔɔ-o, o kon, te kɔl vɔɔn kon hinul nin nɔm pɛ, vana kon lɔɔ bangaa, kɔllo ɲulul nɔm tiŋ.»

¹⁷ Fɔ́ɔ́fɔ̀, mí Saul dimul buɛyaa ndɔa aa: «Ava, mɛɛ la kɔ nuwvial-la vana vaa lende, vana caa bangaa lɔɔ ɲɛkɛndɛ-kɛndɛ-o, mì la cuu ya ndu.»

¹⁸ Mí buɛiyo pilɛ cua sɔɛi, mó dimi aa: «I sina langbanɔɔ pum, po Yisai Bɛtlɛhɛmnɔ-o, vana ɲɛ-caa kɛndɛ-kɛndɛ o co ni, vana dialun kalaa a kuubanɔ cɔwvo o co vɛlɛ ni. O caa sɔɛi, o naŋ hɔlla, hiovɔɔ o kon coo, Mɛlɛka co ndu ikɛi.»

¹⁹ O kon, mí Saul viam kiilaa o Yisai lo le ndu kɔlan dimullo aa o yòó ndu masaa Saul David po ndɔ co cɔlua mandaa-o.

²⁰ Mí Yisai soli sofɛlɔɔ, mó dovi ɲɛdiaa, mɔiyan hemndo o pilɛ a cuin téndóó o pilɛ ndu o kɔɔ. Mó yɔngu David po ndɔ volɔɔla lan kpow le Saul yòó.

²¹ Mɛɛ David tiiya o Saul lo, mí ɲɔɔ hɛnan Saul taw a ndu. Mó siinguu ndu vana ndɔ cuaa ɲɛm cɔwvo.

²² O kon kɔɔli, mí Saul vim Yisai kiilaa le ndu dimullo maa o yeema mì David lo ndu Saul o ba bɛngu le hɛnan o hɛnan ndu taw-vo.

²³ Kandɔɔ ɲinkon, te Hala ndóò luei dɔ́ɔ́ pɛ Saul kɔl vɔɔndo nin, David ndóò cua bangaa, ndóò lɔɔ. O kon, Saul ndóò sɔla kɔllo ɲulullo o pɔm-pɔmbɔ háá mì kɔl vɔɔn kon ndóò fula ndu nin.