1Samiɛl 14 - BII BILA

Yonatan del kunda Filistia coo a cɔwvo

¹ Paale pilɛ, mí Yonatan po Saul-lo dimul langbanɔ va ɲɛm ndɔn cɔwvon cuaa-o aa: «Hun mì n kɔɛ háá nɛɛ Filistia co icali cumullo leeloo nda-a.» Kɛ Yonatan dimul fuɲa ndɔ sɔɛi ken te.

² Fuɲa ndɔ va icali Kibea o pɛɛngulan, o yɔm krenadiee va Mikrɔn-ndo bɛngu. Vanaa va ndu kɔɔli-a va le n'van kɛmɛ leŋɔmpum.

³ Vana-solia-lasálàá va lon, po Ahitub puapilɛ I-Kabɔd-o. I-Kabɔd kon yɛ, Pineas po Helii-o velu ndu ni. Doma ifalen solia lasálàá va ndu lekɔɔ, ndu va vana-solia-lasálà Mɛlɛka-o Silo ni. Vanaa cɔwva ve sina maa Yonatan ndóò kɔɛnnun te.

⁴ Le tiiyaa nɛɛ Filistia va-a, mí Yonatan kei nɛɛ powta kpovalan la tɛnda mí la piɔvan tan tiɔn-nda. Powta lan o pilɛ diolan aa Bosɛt, o pilɔɔ aa Sennee.

⁵ Pow kpova tasoo va a ba luaŋ-ndo, kpengii Mikmas-e, o diinndɔɔ va a ba too, kpengii Keba-e.

⁶ Mí Yonatan dimul langbanɔ va ndu kon ɲɛm cɔwvon cuello-o aa: «Hun mì n sɔɔnguu vanaa dii haa tooma le-a macɛlu kpɛɛlun, bɔɔle mì Mɛlɛka mala naa mì n nɔla nda. Kani n va sɛ́lɛ́, n va sɛ́lɛ́ le, Mɛlɛka dimi pɛ le naa baŋaa, o baŋa naa.»

⁷ Mí buɛi ndɔ kon mulul ndu aa: «Ɲɛ-ɲɛ n yiyan pɛ le tosaa, i cɛl a kɔl nuu kpow, kiisan te. I co nɔm kɔɔli mɛɛ kɔl nɔmndo tùú yɛ.»

⁸ Mí Yonatan dimul ndu aa: «Mɛɛ n kɔ niko nɛɛ nda co-a, mì n fula nda o hɔl.

⁹ Te a dimul naa pɛ aa: ‹La cum naa lon háá mì n tiiya nɛɛ niaa co-a›, n lonin isisi o fonda pilɛ kon, n sɔɔnguunin nda ikɛi le.

¹⁰ Taa dimul-lɛ naa pɛ a: ‹La hel-lɔ nanu›, n kɔɛ, kani tɔɔmasele naa n sinanin maa Mɛlɛka mal nda naa o ba-o vanin kon ni.»

¹¹ O kon má kɔa nda ŋiɔn kpow, má kɔ fula Filistia o hɔl. Mí Filistia dimulan aa: «La tofa vɔ! Hebreea co fulaa o soonndan nin nɛɛ nda va a viniannda-a.»

¹² Mí vanaa kan veelu Yonatan nda buɛi ndɔɔ, má dimul nda aa: «La hun-ndɔ nanu mì n dimul niaa sɔɛi pum.» Mí Yonatan dimul buɛi ndɔɔ aa: «Hun n kɔ, sim ya kɔɔli, Mɛlɛka cii nda malɔɔ Israɛlla o ba.»

¹³ Mí Yonatan kindin a laba a á n'pelu, mó hel. Mí buɛi ndɔɔ bɛɛ hel ndu kɔɔli. Mí Filistia Yonatan va lɔwviaa-a va delio, mí buɛi ndɔɔ va nda siowvo tɛiyo ndu kɔɔli.

¹⁴ O telen bingi kon bɛngu, mí Yonatan nda buɛi ndɔɔ a diw Filistia le n'van bidiin o fonda pɔmbɔ kon coo.

¹⁵ Mí siòònde bii Filistia tɔ̀a lo o dɔ́ɔ́ngɔ́ kon nin-nda a Filistia tɔ̀a va o tàndà kon nin-nda kpede. Mí siòònde bii a va cumullo-a, mí siòònde bii vɛlɛ kuubaa ndaa cɔwva taw. Handɔɔ o kon kpow coo, mí lɛŋnden le ɲiiya, mí kɔltan la laasian vannda kpede a dɛnɛ bɛndu Hala tosa kon-ndo.

¹⁶ Kpalilaa Saul-la lo Kibea o tàndá Bɛnyamɛn-ndo nin, má ca Filistia ɲaanɔnndo ba-ba fee.

¹⁷ Mí Saul dimul vanaa ndɔa cɔwva aa: «La veelu vɔ vannda kpow, mì la cɔm nda haliko mi n sina vanaa faŋan naa tɛɛn-nda.» Má veelu vannda kpow, má ca maa Yonatan nda langbanɔ va ndu ɲɛm cɔwvon cuello-o a ve lon te.

¹⁸ Mí Saul dimul Ahiya vana-solia-lasálàá aa: «La hun a kesu kpema Mɛlɛka-o nanu.» Ɲinkon yɛ, kesu kpema Hala-o va o dɔ́ɔ́ngɔ́ Israɛlla nin.

¹⁹ Tuma Saul va sɔɛi o vana-solia-lasálàá lo-o, mí ɲɛ kidi-kidio a vóólun-vóólun bɛndoo va hiovɔɔ laci o dɔ́ɔ́ngɔ́ Filistia nin. Mí Saul dimul Ahiya aa: «Tuisi ba nɔmndo.»

²⁰ O kon, mí Saul nda vanaa va lon-nda kɔa o fonda cɔwvo va tosanndo-o. Mí ɲɛ kidi-kidio a vóólun-vóólun bɛndoo kandun Filistia tɛɛn, mí nda pila muungu diuvanndo.

²¹ Mí Hebreaa va paandu Filistia o ba bɛngu, má va cɔwvo tosaa nda ndaa latulu-a mulin, má handun Israɛlaa va Saul nda Yonatan kɔɔli-a coo.

²² Mɛɛ Israɛlaa va a viniannda o tàndá n'pembu Efraim-ndo nin-nda tuei maa Filistia ɲaanun, mí nda bɛɛ muungu nda tovɔɔ a nda cɔlɔbaa a labɛɛla kpeekpei.

²³ Nuaa Mɛlɛka mala Israɛlla paale len ni, má nɔla Filistia, má lo cɔwvo háá má kɔ hiaw Bɛt-Avɛn.

Vanaa cɔvaa Israɛlla ciindiaa Yonatan

²⁴ Ɲinkon, mí Israɛlla sanga taw, kani nuaa Saul ndóò dimul nda ni aa: «Kandɔɔ sisa háá telen ya nɔlanin yaamɔaa nia ha-o, nanu a dɔ́ɔ́ cɔɛllɛn, dangaa co le vana-vana dianin ɲɛdiaa!» Má niinu lende a yiaan kpɛŋ, vana-vana di ɲɛ-ɲɛ le.

²⁵ A lo kɔlan, mí nda kpow tiiya o bundɔɔ pum nin, lɛan ma va lon taw, mí ma tiiya lɛŋ dí.

²⁶ Vanaa cɔwva luɛyɔɔ o bundɛ kon nin, má ca lɛan man, má va taaliaa nɛɛ-nɛɛ ka, kɛ vana-vana dombi man te, kani siòònde va nda kpow le danga Saul ndóò dɔw-vo.

²⁷ Kɛ Yonatan sina maa fuɲa ndɔ ndóò luei sendío le vannda kpow le. Mó siɛndi sionnde va ndu o ba len, mó vow len o vàá malɛɔ nin, mó deembuu. Mí hɔlla ningila ndu dɔ́ɔ́ ɲɛkɛndɛ-kɛndɛ.

²⁸ Mí vanndo pum dimul ndu aa: «Sei! Fuɲa nɔm cii naa mɛna aa dangaa co le vana dianin hau ɲɛdiaa-o. Lelan vannda kpow co a sangɛiya nuaa yɔkɔɔ ni.»

²⁹ Mí Yonatan dimi aa: «Dɛnɛ palaa kpu Pua tuisi vannda coo nuaa ni. Bau kabi ya deembuu nihau lɛan man ɲɛ-pɔmbɔ, la tofa vɔ mɛɛ ya sɔla yoomuan yɛ.

³⁰ Te ndóò va niko pɛ mì vanaa cɔwva kpow ndáà de ɲɛm ndáà bii yaamɔaa ndaa o ba-on, n va mɔnɛ soli a Filistia hiovɔɔ mɛɛ naa n diw nda nuaa yɛ.»

³¹ Paale len, mí Israɛlla cua Filistia diwvo Mikmas, má kɔ tiiya háá Ayalɔn. Kɛ mí nda pila sanga yɔkɔɔ.

³² Ndáà fulaa lon, má kɔ del o ɲɛm ndáà bii yaamɔɔa o ba-on coo. Má bii saa, navaa kalla a navaa téndéa, má diw nda. A soli nda makòó le, má dia nda o foofo nda dii nda kon-ndo coo a koovan lende.

³³ Má kɔ dimul Saul aa: «Vannda cua hakio a Mɛlɛka, a de cɔlua nda diw-va o fonda nda kelu nda bololan-ndo.» Mí Saul dimi aa: «La tosa dɛnɛ kɛndɛ a Mɛlɛka le dɛ! La pimbul pow bɛndoo sisa mì la hiŋ a ndu nanu.»

³⁴ Mó dimi vɛlɛ o kon kɔɔli aa: «La balu sɔɛi he yondaa, mì la dimul vannda maa vana-vana hun a naw ndɔɔ, te kon te saa téndé ndɔɔ, mò kelu ndu bololan nanu. O kon, la dio nin bɛɛ visin mun, la cue lɛ haki a Mɛlɛka le vision dio a koovan te.» Icɔl kon, mí vana-vana hun a naw ndɔɔ o ba le ndu diyɔɔ o fonda kon.

³⁵ Mí Saul toosiaa fonda-loamaa-lasálàá le Mɛlɛka. Fonda-loamaa-lasálà tase o toosiaa le Mɛlɛka-o va kon ni.

³⁶ O kon kɔɔli, mí Saul dimi aa: «N kɔnnun cɔɛllɛn mì n kɔ tolnun Filistia coo háá mi paalen le sɛ, mì n diwnun nda, n mɛinùn vana-vana yoomu le. O kon, mi n cuannun ɲɛm ndan.» Mí vanaa cɔwva mulul ndu aa: «Mɛ̀ɛ́-mɛ̀ɛ́ n dimi pɛ, n tosa lende.» Kɛ mí vana-solia-lasálàá dimi aa: «N ɲunan-ndɔ fɔlɔn Hala.»

³⁷ Mí Saul ɲuna Hala aa: «Vɛ̀ɛ̀ o bɛnda mì kuel Filistia? Vɛ̀ɛ̀ a malnin pá nda naa Israɛlla o ba?» Kɛ o mulul ndu ɲinkon te.

³⁸ Le hee, mi Saul veelu simlacia Israɛlla kpow, mó dimul nda aa: «La kpɛngbɛla vɔ sɔɛi he mì la sina haki tosan hau-vo.

³⁹ Te Mɛlɛka co yoomu, Mɛlɛka co vana ciindiaa Israɛlla-o pɛɛn, vana-vana sɔɛi ken bii pɛ, o bɛnda mò vi, hali Yonatan po ni sɔɛi ken bii ni!» Kɛ o vanaa cɔvaa kan kpow tɛɛn, vana-vana mulul ndu le.

⁴⁰ Mó dimi vɛlɛ aa: «Niaa Israɛlaa tɔ̀a kpow, la sim-ndɔ nɛɛ pilɛ, mì n sim naa Yonatan po ni baa pilɔɔ.» O kon mí vanaa cɔwva mulul ndu aa: «Mɛ̀ɛ́-mɛ̀ɛ́ n tosa pɛ, o naŋ.»

⁴¹ Mí Saul piɛi Mɛlɛka, mó dimi aa: «Hala Israɛlla, cɔm naa toɲaa.» Mí sɔɛi bii Saul nda Yonatan po ndɔ, tɛɛmbuu vana-vana celen cinnun-ndɛ lenin te.

⁴² Mí Saul dimi aa: «La mel naa siondei naa Yonatan le vana kpeekpei del kasi-o sinaa.» Mí sionnden le bii Yonatan.

⁴³ O kon mí Saul dimul Yonatan aa: «Cɔm ya ɲɛ n tosa-o.» Mí Yonatan mulul ndu aa: «Sionnde va ya o ba len ya vow hɔllo o lɛan nin ni, mí deembuu. Te i va vu pɛ, i vu!»

⁴⁴ Mí Saul mɛnan aa: «Nɔm Yonatan, taa sɔla piɔ́mndo le, mɛɛ Hala tuisí sanga hiow sangalan kpow-vo ya coo!»

⁴⁵ Kɛ mí vannda kpow dimul ndu Saul aa: «Yéè mì Yonatan vi? Kámáá ndu le baŋa naa hau baŋa bɛndoo ho le? Te Mɛlɛka co yoomu, hali yiinnde ndɔlen ten pilɛ bɛɛ le delnin lɛŋ te! Kani Hala va ndu ikɛi o dɛnɛ bɛndu o tosa hoo hau-vo nin.» Nuaa vannda baŋa Yonatan ni, o sɔla lɛ ɲinkon piɔ́mndo le.

⁴⁶ Mí Saul pɛngi Filistia tovɔɔ, mí Filistia kan muungu o nda lo.

Masale Saul-ten

⁴⁷ Saul sulɔɔ masa o lɛŋnde Israɛl-ten coo, mó cɔlɔba yaamɔaa va o tàndà kon nin-nda: Moabua, Amɔnnda, Edɔmnda, masaa yɛ́-yɛ́a Soba a Filistia. Nɛɛ-nɛɛ ndóò mulin pɛ a cɔwvo, ndóò nɔla vanaa va lon-nda.

⁴⁸ Paale pum, mó cɔm kpaaya ndɔɔ o cɔlɔba o cɔlɔba Amalɛkea mó nɔla nda-o nin. Mó baŋa Israɛlla vanaa va kan lɛŋnde ndalen pungaa-a o ba.

⁴⁹ Poaa Saul velu-a va haa ni: Yonatan, Yisvi a Makisua. Hɔ́aa laandua o velu-a va Merab nda Mikal pɔmbɔ ndɔ ni.

⁵⁰ Diola lanɔɔ Saul-tan la va ni aa Ahinoam, Ahimaas ndóò velu ndu ni. Kuubanɔ va vanaa ndɔa cɔwva kpede bollen-ndo va Abnɛr ni, po Nɛr-o pɛɛn. Nɛr kon yɛ puapilɛ fuɲaa Saul-lo o va ni.

⁵¹ Kis fuɲaa Saul, nda Nɛr fuɲaa Abnɛr, poaa Abiɛl-la nda va ni.

⁵² Saul cii masale ndɔlen lende, cɔwla kàlà-kálàlan tuŋ la va ndu tɛɛn nda Filistia ni. Lelan, te ndóò ce dɔ́ɔ́ pɛ vana mayoomoo, te kon te vana dialun fulaa, ndóò nannun ndu o ibuŋ.