1Piɛr 4 - BII BILA

Yoomula mangalan-ndan

¹ Lelan, le mɛɛ Krista sanga o falon nin yɛ, niaa bɛɛ ken va niaa o lakɔl, kani vana sanga pɛ o falon nin, ndu sɛyan a hakio,

² haliko o va lɛ yoomu a yeemɛi n'faluei le, kɛ o hɛnan Hala-o nin le telen tɔ̀ lo ndu le tosaa o falon nin-ndo.

³ Kani dɛnnda kɛ́-kɛ̀ niaa tosa o paandoo nin, o hɛnan vanaa sina Hala le-a nin niaa yɔŋ kon ni, kela laasi-laasio, yeemɛi n'faluei, bahiuvaa le mɔiyan kolɔɔ a dɛnndan nin, bɔŋiannda kolaa mamɔilan, a mààla biilaa n'piɔmndan.

⁴ Kɔndɔfillo bii nda ni, le niaa kɛɔ cɔu delɔɔ nda kɔɔli o laasi-laasi nda kon nin, mà muungu niaa congulan:

⁵ a dɔawnunnin kona o vana kialunin vanaa co yoomu-a a vanvílɛ́iya iyama-o lo.

⁶ Lelan bɛɛ kpeekpei sɔɛi Hala-e dimulun vanvílɛ́iya ni, haliko vanndacieea kiolu nda bɛɛ iyama o yoomu ivanacieeyaa nin, ma va yoomu o kpaaya Kɔl-Diandaa nin.

Mɛɛ vannda bɛnda mà nɔnnan hɔlten coo yɛ

⁷ Mɛɛlula ɲɛ-ɲɛ la co nin kpɛɛlun. Lelan, la kiondu kɔltan mì la va lahɔl le piɛilen.

⁸ I tasei ya co niaa dimul-le, la kaolian vellaa-velle ɲɛkɛndɛi, kani kaolaa kumbu hakila bɔɔ-bɔɔ.

⁹ La va vanaa bii mialla-a vellaa-velle, o va a sɔɔn pɔmbɔ le.

¹⁰ Vana-vana tosa mì caanda sɔla malaa o ke o sɔla Hala o ba-o nin. O kon mì la siŋnun vanaa caa ɲɔɔn mandaa-a, ɲɛm Hala ke niaa-on.

¹¹ Te vanndo va pɛ sɔɛi, o soo le diomnda Hala lan tɛɛnguuo. Vana nɔ pɛ keo le dɛnɔɔ pum tosaa, o tosa ndu a kpaaya Hala yɔngu vana-o, haliko mi Hala sɔla biiloo o dɛnndan kpow nin o diola Yeesu Krista lan. O biiloo a kpaayaa co le ndu le fɛɛn a fɛɛn-ndo. Amiina!

Le sangaa maa Krista

¹² Caaŋaa nia hɛnan ya-a, la dɔawnun kɔndɔfili le sanga tóndó leyin co niaa coo-o maa dɛnɛ bɛnda le tosan too le.

¹³ Kɛ la dɔwnun ɲaale le sangala Krista lan sɔlaa, haliko mi la naŋ kɔl, telen biilu ndɔɔ fulanin ceen-ndo.

¹⁴ Te la sɔla pɛ sangaa le diola Krista lan, dɛnɛ kɛndɔɔ o co le niaa ni, kani Kɔl biilaa, Kɔl Hala-o co niaa coo.

¹⁵ Vana-vana o niaa tɛɛn sanga le tùú o co vana diuvaa n'vanndo-o le, le tùú o co vuiyo-o le, le tùú o co vana tosaa dɛnnda vɔɔndo-o te kon te vana vow sondoo o sɔɔn pilan nin-ndo le,

¹⁶ kɛ te vanndo sanga pɛ le tùú o co vana Krista-o-o, siɛmbula bii ndu le ken te. Ɲɛ o bɛnda le tosaa-o co Hala biiloo le diola lan ni.

¹⁷ Kani o telen kon, yamɛi kandunnin kiolɔnndo a Cɛi-Hala-o o kɔɔ. Nduyɛ, te yamɛi kandun pɛ a naa, vɛ̀ɛ̀ mɛɛlula vanaa cɛl sɔɛi Hala-e le-a va yɛnin?

¹⁸ Maa mɛɛ Sɛbɛ Hala-o dimi yɛ aa: «Te i yɔŋnun sɔɛi bɛɛn-bɛɛn le vana sandaa cindaa sɔlaa le, vɛ̀ɛ̀ la va yɛnin a vana lahaki sina Hala loo?»

¹⁹ Lelan, vanaa co sangaa sɔlaa o hɛnan Hala-o tosaa-a nin-nda nda mɛi kɔlta ndalan vana cɔw ɲɔɔn-ndo o ba, o faŋan o diomnde ndɔlen coo loo, mà hiow laci a dɛnɛ kɛndɔɔ tosaa.