1Piɛr 3 - BII BILA

Calii pɔnɔɔ a lanɔɔ

¹ Niaa vanlaandua bɛɛ, vana-vana tuisin pɔnɔ ndɔ o labɛngunin, o kon hali mì a pum o nda tɛɛn a laalan sɔɛi Hala-e le, mà sɔlan le kela laandua ndaa, o ve a isɔɔ le,

² telen nda canin kela niaa diandaa a kela niaa lebɛɛo-o.

³ Naŋɔɔ niaa va o kɔɔ daama le: lavɔɔ, kelan sianion a volɔɔla sɔvɛlan,

⁴ kɛ la naŋ naŋɔɔ kɔllo, la nɔ kɔlɲuloo a kɔlkɛndɔɔ, cuɛinɔn kɔl tembu loo co kon ni, o Hala ce ɲɛ sɔvɛ bɛndoo-o.

⁵ Cuɛinɔn súú vaa lende vanlaandua diandaa ndáà kɛsi kɔllo Hala coo-a ndáà nɔ sindɛ ni, má tuisin piandaa ndaa o labɛngunin,

⁶ maa mɛɛ Sara ndóò bii sɔɛi Abraham-nde mó va ndu veeloo aa vana ni bɛndoo yɛ. Cuavaa ndaa imamaa niaa co ni, le tùú niaa co dɛnnda kɛndɛlan tosaa-o, te la tosa pɛ dɛnɛ kɛndɔɔ, mì siòòŋii bii niaa a ɲɛ-ɲɛ le.

⁷ Niaa piaandua bɛɛ, o calii niɛi nin niaa laandua niaa, la sínà maa vanaa yenge-yengea vanlaandua co ni. La ke nda bɛɛlen, kani niaa ndaa loonin kɛndɛi yoomoo ni, haliko ɲɛ-ɲɛ tosa mì piɛile niaalen le haw le.

Sangaa le dɛnɛ sandaa tosaa

⁸ O mɛɛlulan, la nɔ yiyan pilɔɔ a ɲííye. Kaolaa va o piaa niaa o lakɔl le puapilɛa niaa, la nɔ kɛndɛi a tuisinndo.

⁹ La mingì maa dɛnɛ vɔɔndo le, la mingì yeiyo le. Kɛ o niaa bɛnda le tosaa-o co duaa dɔvɔɔ ni, kani le ken niaa sɔla veeloo ni, haliko mi la loo duaa.

¹⁰ Kani o co o sɛvaa-o co hoo ni aa: «Vana yeema pɛ le yoomoo kaolaa, mò yeema le palɛi dɛnɛ kɛndɛi cɔu, ndu bɛnda mò manda diɛɛmule ndɔlen le dɛnɛ vɔɔndo, mò manda cɔcɔn ndɔn le còòlan.»

¹¹ O bɛnda mò kpakpala dɛnɛ vɔɔndo, mò tosa o kɛndɔɔ, mò nuwviaa dɛnɛ kɛndɔɔ, mò tol ndu kɔɔli.

¹² Kani Mɛlɛka nɔ hɔlten vanaa sandaa coo, o co nilan yaŋɔɔ o piɛile ndalen, kɛ a kpaayaa Mɛlɛka mululun vanaa tosaa dɛnnda vɔɔnda ni.

¹³ Nɛ̀ɛ́ saangiaa yɛnin niaa, te la nɔ pɛ dialun fulan le dɛnɛ kɛndɔɔ tosaa?

¹⁴ La sɔla pɛ sangaa le dɛnɛ kɛndɛ niaa co tosaa-o, mɛɛ dɛnɛ kɛndɔɔ vanin le niaa. La nɔ siòònde a ɲɛ vanndacieea nɔ siòònde-o le, la va yoloma-yoloma le.

¹⁵ Kɛ la ke Krista co Maalii-o bɛɛlen o kɔlta niaalan nin. La va lɔ́ɔ́-lɔ́ɔ̀ a bɛɛndiannda, haliko te vanndo ɲuna pɛ niaa le kɔlɔ niaa nɔ kɔlkɛsiaa-o, la tɛɛsial ndu kɔlɔ kon.

¹⁶ Kɛ la tosa kon o fɛ́ɛ́-fɛ́ɛ́o nin a o tuisinndo nin. La nɔ yiyannda kɛndɛlan, haliko o va bɛɛ o fondala nda co niaa congòó lan, mì siɛmbulan la bii vanaa co niaa diolan tɛɛmbuuo le kela niaa kɛndɔɔ-a.

¹⁷ Kani o co fisa mì vana sanga o dɛnɛ kɛndɔɔ tosaa, te hɛnan Hala-o co kon ni, a sangaa o dɛnɛ vɔɔndo tosaa.

¹⁸ Kani, lepilɛ kpé Krista bɛɛ vi le hakilan ni. Ndu vana sandaa, mó vu le vanaa sendu le-a, le niaa yɔɔ o Hala lo. Ndóò vuo o falon nin, mí Kɔl-Diandaa mingi ndu yoomu.

¹⁹ O kon mó kɔ dimul kɔlta va o biyɔɔ nin-ndan diom Hala-o.

²⁰ Kɔlta tosa lɔ́ɔ́ kon nila kalulan-ndan, telen biuvɔn Hala-o va vɔ hiovɔɔ laci-o, o palɛi Noe va dɛ̀ndɛ̀ bɛndu vanaa bɔɔ luei lenin too siɔlɔɔ-e bɛngu. Vanaa ŋɔmaa kpé a sɔla cindaa o mɛmma man nin ni.

²¹ Tuula yinɔɔ co niaa hau ciindiaa-o va kon ni, yinɔɔ kon dindi vana le nɔɔ n'faloo le, kɛ piɛilen o co le Hala yɔngɔnndo fasɛi ni, ndu ciindiaa vana a tendul Yeesu Krista-o o kɔɔ ni.

²² Yeesu hel o halataala mó kɔ cal Hala o ba kɛndɔɔ coo-o pɛɛn, o nɔ̀ mɛlɛkaa, masɛi a kpaayalan kpow ndu o ba bɛngu-o.