1Piɛr 2 - BII BILA

Yeesu a vanaa diandaa

¹ Lelan, la kɛɛ dɛnɛ-dɛnɛ co kɔlvesɛiyo a o kɛ́-kɛ̀ co kafalan, muulɔnndo, yeemɛi bɛnduei a caanda diolan tɛɛmbuuo.

² Maa mɛɛ cɛlɛkpɛa yeema mɛɛyan yɛ, la kaola mɛɛma sɔɛi Hala-an lende, haliko mi la hindu, mi la sɔla cindaa,

³ kani la dombi mí la ca maa Maalii naŋ.

⁴ La sɔɔnguu ndu o ibuŋ, ndu pow kiyɛiyo, o vanndacieea viow-vo, kɛ mí Hala ca ndu ɲɛ sɔvɛ bɛndu, mó hɛli ndu.

⁵ Niaa bɛɛ, la va maa powta kiyɛi, mì la sɔla luɛyɔɔ o tangul cɛi Kɔl-Diandaa nin, mì la va vanaa-solia-lasálàá diandaa, le sálàla kɔltan solio, la hɛnan Hala o Yeesu Krista nin-ndan,

⁶ kani o co o sɛvaa o Sɛbɛ Hala-o nin aa: «Tofa vɔ, i co pow-sɔngio handɔɔ Siɔn, o sɔvɛ ya hɛli-o, vana-vana laalan ndu pɛ, ndu tulnun lasiɛmbu le.»

⁷ Bɛɛlen le co le niaa vanaa laalannda. Kɛ le vanaa kɛɛ le laalanndo-a, pow vanaa tangulaa viow-vo, ndu siŋnun pow lebollo ni,

⁸ O kon kɔɔli, mó dimi vɛlɛ aa: «Pow tosa mà boŋ, mà del-lo co kon ni.» Vanaa kan a del kani a kɛɛ le diom Hala-o biyɔɔ, nduyɛ ken ndíì kelun le nda ni.

⁹ Kɛ niaa, vanaa Hala hɛli-a niaa co ni, vanaa-solia-lasálàá lemasaa, kunda diandaa, haliko mi la yonda dɛnnda kɛndɛla vana soli niaa o ɲumndan nin, mó cuu niaa o ɲɛ-tengaa ndɔ sɔvɛɔ-o nin-ndo lan.

¹⁰ Niaa ve paandu vanaa ndɔ le, kɛ hau nin, la siŋnun yungu Hala-o, ɲíí ve paandu le niaa le, kɛ hau nin la sɔla ɲííye tuinɔnndo.

Mɛɛ vanaa laalannda bɛnda mà kela vanaa ceenda tɛɛn yɛ

¹¹ Niaa vanaa hɛnan ya-a, i co niaa sila, niaa co mialla a vanaa hiavannda o lɛŋnden coo-a, la kpakpala yeeman falun co kɔlta niaalan cɔlɔbaa-on.

¹² La nɔ kela kɛndɔɔ vanaa co vanaa laalan te-a tɛɛn, haliko a ɲiinduu niaa bɛɛ còòlan coo maa vanaa tosaa dɛnnda vɔɔn, mà ce dɛnnda kɛndɛla niaalan, mà biilu Hala paale o hunnin-nden.

¹³ La tosa le Maalii, mì la tuisin simlacia co vanndacieea kpede tɛɛn-nda o labɛngunin, o va masa bɛndoo,

¹⁴ o va masaa n'bungaa, a masa bɛndoo viam le vanaa tosaa dɛnnda vɔɔnda sangaa tuisio coo, te kon te le vanaa tosaa dɛnnda kɛndɛa nuvalio mello-a.

¹⁵ Kani hɛnan Hala-o co ni, mì la tosa dɛnɛ kɛndɔɔ le diɔmaa co haa sɔɔn vɔɔnndon dimio a niaa o kɔɔ-a sondolan kindaa.

¹⁶ La kela maa vanaa co o ba nda coo-a, kɛ nduyɛ, la siinguu hɔ́ɔ́yɛi niɛi kunga viannanndo le dɛnɛ vɔɔndo vionɔɔ le, kɛ la tosa dɛnndan maa vanaa baalaa Hala.

¹⁷ La ke vana-vana bɛɛlen, la kaola puapilɛa niaa vanaa laalannda, la vo Hala mì la ke masaa bɛɛlen.

Tɔɔmasele sangala Krista lan

¹⁸ Niaa cɛa, la tuisin tootoo mì la ke vanaa niaa bɛndua bɛɛlen taw, o co ko a naŋ súú ma va niaa biyɔɔ kɛndɔɔ-a le, kɛ hali a kendu calle-a bɛɛ.

¹⁹ Kani o co dɛnɛ kɛndɛ le sangaa biuvɔnndo o kafalan coo le sɔɛi Hala-e biyɔɔ.

²⁰ Kani taa saangiaa pɛ vana le kela nɔm vɔɔndo, ɔ́ɔ̀ bɛɛle n sɔla o ken nin-nden? Kɛ taa saangiaa pɛ vana o dɛnɛ kɛndɛ n tosa-o kɔɔli, dɛnɛ kɛndɔɔ o va le nɔm Hala o hɔl ni.

²¹ Le ken kpeekpei niaa sɔla veeloo ni, kani Krista bɛɛ sanga le niaa mó mel niaa tɔɔmaseloo haliko mi la dem foofola ndɔlan.

²² Ndu tosa haki loo, ndu sɔɛi fula o sondo le vana hui loo,

²³ ndu nda yei o mingi loo, ndu nda saangiaa, o pasa loo, kɛ mó mɛi Hala Vana kialaa iyama sandaa sɔɛi ndɔɛi o ba.

²⁴ Mó cua hakila naalan o n'dial o yɔmndo coo, haliko mi n vi a ba hakio, o kon mì n muungu yoomu a ceen sandaa. Fungbula ndɔlan la tosa ni mì la sɔla siongɔɔ.

²⁵ Kani maa saa luusian-nda niaa va ni, kɛ sunsun la muungu vana co niaa mandaa-o o ibuŋ, ndu co kɔlta niaalan mandaa ni.