1Nsaŋ 5 - BII BILA

Nɔla naa n nɔla ceendo-o

¹ Vana-vana laalan pɛ maa Yeesu co Krista ni, mɛɛ ndu velun o Hala nin, vana-vana kaola pɛ fuɲaa, kaolaa o kaola vɛlɛ cuavaa fuɲa kon velu-a ni.

² O Hala kaolaa a o kelaa o tɔŋnda ndɔlan coo naa n sínà ni maa n kaola cuavaa Hala-a.

³ Kani Hala kaolaa co sɔɔn ndɔn biyɔɔ ni. Nduyɛ tɔŋnda ndɔlan la lusul te,

⁴ kani vana-vana co pɛ cua Hala-o, nɔlaa o nɔla ceendo ni. Ɲɛ tosa yɛ mì n nɔla ceendo-o, ndu co laalan naa ni.

⁵ Ɔ́ɔ̀ vana nɔla ceendo-o, te o faŋan pɛ o vana laalan maa Yeesu co Po Hala-o ni-o kɔɔli?

Seile solin a Yeesu Krista o kɔɔ len

⁶ Ndu Yeesu Krista hin a mɛnndan a á koovan ni, o co ka a mɛnndan daama le, kɛ mɛnndan a koovan. Kɔl-Diandaa co seilen timbio, kani toɲaa Kɔl-Diandaa co ni.

⁷ Seiya nda yáá co seilen tɛndaa ni:

⁸ Kɔl-Diandaa, mɛnndan a koovan, ɲɛ pilɔɔ kpé seyaa kan co dimio ni.

⁹ Te n cɛl pɛ seile vanndacieea, seile Hala len nden, len le hiow vaa le bɔɔ. Kani seile Hala len le co ni maa o co sɔɛi o Po ndɔɔ nin.

¹⁰ Vana laalan pɛ Po Hala-o, ndu nɔ seile len ndu o kɔl. Vana laalan yɛ Hala le, mɛɛ o siinguu ndu vana lacòòvaa, kani o kɛɛ seile Hala co tɛndaa a Po ndɔɔ o kɔɔ len laalanndo.

¹¹ Seile len le co len ni: Hala ke naa yoomu fɛɛn-fɛɛndo, o Po ndɔɔ nin yoomu kalaa co ni.

¹² Vana nɔ pɛ Poo, ndu nɔ yoomoo, vana nɔ yɛ Po Hala-o le, ndu nɔ yoomu le.

Yoomu fɛɛn-fɛɛndo

¹³ I sɛval niaa ndi, haliko mi la sina maa la nɔ yoomu fɛɛn-fɛɛndo, niaa laalan o diola Po Hala-o lan-nda.

¹⁴ Tiindan naa n nɔ o ndu nin-ndo co hoo ni: te n ɲuna ndu pɛ ɲɛ pum, o co hɛnan ndɔɔ-o, o yaŋ naa nilan.

¹⁵ Te n sínà yɛ pɛ maa o yaŋ naa nilan, mɛɛ ɲɛ-ɲɛ naa n ɲuna ndu pɛ, n nɔnnùn o kɔl maa n co sɔla.

¹⁶ Te vanndo ce pɛ puapilɛ ndɔɔ haki tosa mì vana vi loo tosaa, o piɛi mì Hala ke ndu yoomoo, te o va pɛ maa lekɛ́ndɛi haki kon tosa mì vana vi le. Haki tosa mì vana vi-o co, o co le haki kon te ya co dimio le piɛilen te.

¹⁷ Dɛnɛ vɔɔn oo dɛnɛ vɔɔn, hakio o co ni, kɛ hakio pum co, o tosa mì vana vi le.

¹⁸ N sina maa vana-vana velun pɛ o Hala nin, ndu hiw lɛ laci a hakio tosaa le. Kani Po Hala-o co ndu kandaa, Vana Vɔɔndo nɔ lɛ kpaaya ndu coo le.

¹⁹ N sínà maa a Hala-a naa n co ni, mì ceendo kpede va o kpaaya Vana Vɔɔndo bɛngu.

²⁰ N sínà vɛlɛ maa Po Hala-o hin, mó ke naa kɔlkaloo le Hala toɲaa sinaa, o ndu nin naa n co ni, le sauma Yeesu Krista Po ndɔ-an. Ndu co Hala toɲaa a yoomu fɛɛn-fɛɛndo ni.

²¹ Cuavaa nia, la mandan a piɔmnda.