1Masaa 9 - BII BILA

Mɛlɛka cɔmnun Salomɔn o diinndɔɔ

¹ Mɛɛ Salomɔn cii Cɛi-Mɛlɛka-o a cɛi ndɔ lemasaa tangul, mó toosiaa vɛlɛ ɲɛ-ɲɛ ndóò yeema le tosaa,

² mí Mɛlɛka cɔmnun ndu Salomɔn o diinndɔɔ mɛɛ ndóò cɔmnun ndu Kabaɔn yɛ.

³ Mó dimul ndu aa: «I cɛl piɛile tɛɛlannde n piɛi ya len, i dindi Cɛi n tengul-la hoo le diola nilan vaa piɔlnɔnndo lenin le lɔ́ɔ́-lɔ́ɔ̀-o, i nɔnin vɛlɛ hɔlla a kɔllo lecoo lɔ́ɔ́-lɔ́ɔ̀.

⁴ Nduyɛ, taa kela pɛ ya o hɔl mɛɛ David fuɲa nɔm kela yɛ, mì kɔl nɔmndo dendu, mà sandu, taa kela pɛ o silala ya co nɔm yɔngoo lan kpow coo, ma bii tɔŋnda nilan a sɔɔn nun kpede,

⁵ le fɛɛn a fɛɛn, i feŋanin kpɛŋɛ lemasa Israɛlla o nɔm ndo cɛinin te. Lende koni yáà dimul David fuɲa nɔm ni maa o cuavaa ndɔa tɛɛn, ò folanin vana muungunin masaa Israɛlla coo o fonda ndɔɔ-o le.

⁶ Kɛ te la mulul-la pɛ kɔɔ niaa cuavaa nɔmnda, te la kɛɛ pɛ le tɔŋnda ya yɔngu niaa lan biyɔɔ, te la mɛi ya pɛ mì la kɔ sooluu halaa celen, mì la baŋ vulan nda o labɛngunin,

⁷ i toawnin Israɛlla mì faŋa nda o lɛŋnde ya yɔngu nda le calle nin-nden nin, mì faŋa vɛlɛ hɔlla o Cɛi yáà dindi hoo o diola nilan-ndo coo. O kon kɔɔli, i tuisinin Israɛlla siɛmbulan, mì vanaa-mangalaa-isɔɔa kpede a mam nda.

⁸ Kɔndɔfili bɛndoo biinin vanaa vanin keiyo o Cɛi bɛndu sɔvɛɔ ho ikɛi-ya kpow, mà dimi aa: ‹Ko le yɛɛ kpeekpei Mɛlɛka soli yɛ mɔnɛ vaa nuaa a vannda ha a á Cɛiyo ho?›

⁹ Mà mulul nda aa: ‹Le tùú nda mulul Mɛlɛka Hala ndaa, o soli fuɲaa ndaa mamaa Esipte-o kɔɔ, má yiinun a halaa celennda, má baŋ vulan nda o labɛngunin le nda sooloo-o ndu Mɛlɛka tuisi nda dɛnɛ palaa bɛndoo ho coo ni.›»

Baalala yɛ́-yɛ́la Salomɔn tosa lan

¹⁰ O vɔsilan bidiin bɛngu, mí Salomɔn tangul cɛila tiɔnndan ndan: Cɛi-Mɛlɛka-o a cɛi lemasaa.

¹¹ Salomɔn ciiyo tangulta tiɔnnda lan, mó ke Hiram, ó va masaa Tir-o kobilan bidiin o tàndá Kalile-o nin. Kani Hiram kon ndóò ke Salomɔn yɔmii sɛɛdrei, yɔmii siprɛsiei a sianion mɛɛ ndóò nɔ makoo yɛ ni háá mó cii tangulta lan kpede.

¹² Mí Hiram can Tir le hunɔɔ kobila Salomɔn ndóò ke ndu lan-ndan tofaa, kɛ la hɛnan ndu le.

¹³ O kon mó dimul ndu aa: «Caan ni sei, kobila n ke ya lan-ndan la co ɲɛ-ɲɛ le.» Le kɔlɔ kin nda co vɔ kobila lan veeloo ni aa «Lɛŋnde Kabul-ten (kon co dimio ni aa ‹Lɛŋnde fondolen›»). Diola lan tàndà kon nɔ vɔ háá hau ni.

¹⁴ Nduyɛ, mí Hiram ndóò yɔŋ masaa Salomɔn sianion kilolan vàálan tan yáá a kɛmɛ leŋuɛɛnu.

¹⁵ Mí masaa Salomɔn tundu vannda le baalala lepɔtɔltan tosaa le Cɛi-Mɛlɛka-o, cɛi ndɔ lemasaa, sɛmtɛ ndáà veelu aa Millo-o a kpakio Yerusalɛm tangullo. Mó tundu vɛlɛ nda pɔtɔlten le kobilan ndan tangullo: Hatsɔr, Mekido a Kesɛr.

¹⁶ Mí Faraɔnnɔɔ, ó va masaa Esipte-o ndóò kɔ del kobio Kesɛr coo a cɔwvo, mó diw Kanaŋaa va lon-nda, mó loam kobi kon. O kon kɔɔli, mó yɔngu cua ndɔ laandu va kɔlan calle Salomɔn o ba o nɔ̀u nin-ndo lɛŋnde len.

¹⁷ Lelan Salomɔn mingi Kesɛr tangul ni, mó mingi vɛlɛ kobilan ndan tangul: Bɛt-Hɔrɔn va a ba too-o,

¹⁸ Baalat a Tadmɔr, o tàndá vesɛi va o lɛŋnde len nin-ndo nin.

¹⁹ Mó mingi vɛlɛ kobila celen tangul, la ndóò manda ɲɔɔn nin-ndan kpow, lapum le ɲɛla ɲaanannda soa nan-ndan mandaa, lapum yɛ le soa mandaa. Mó tangul ɲɛ-ɲɛ ndóò yeema le tangullo Yerusalɛm, Liban a o lɛŋnde va ndu o ba bɛngu len kpede nin.

²⁰ Vanaa celen va vɛlɛ o lɛŋnde len nin: Amoriia, Hitiia, Perisiia, Hiviia a Yebusiia, nda kpow a ve cuavaa Israɛl te.

²¹ Mí Salomɔn sɛva poaa vanaa-mangalaa-isɔaa kan, áà lo o lɛŋnde ndalen nin, Israɛlla nɔla nda tovɔɔ le-a, má lo pɔtɔlten a baalala kálà-kálàlan tosaa. Nduyɛ háá paalen nden, a co vɔ o pɔtɔlte len nin.

²² Salomɔn siinguu Israɛlnɔ kɛ́-kɛ̀ cɛ le, nda o siinguu vanaa va ndu mandaa-a, vanaa cɔwva, vanaa bɛndua, simlacia vanaa ɲaanun a soa-a, simlacia va ɲɛm cɔwvon mandaa-a ni.

²³ Mó hɛli simlacia va masaa latàndàá bollen-nda kɛmɛ leŋuɛɛnu a beleŋuɛɛnu.

²⁴ Tuma cua Faraɔnnɔɔ faŋan o Kobi David-o nin, mó kɔa o cɛi Salomɔn ndóò tengul ndu-o nin-ndo, telen kon Salomɔn tangul Millo ni.

²⁵ O vɔsio nin, leyáá Salomɔn ndóò soli sálàla loamaalan a sálàla kɔlɲululan o fonda-loamaa-lasálà ndóò tengul Mɛlɛka-o coo ni. O fonda-loamaa-lasálà va Mɛlɛka o hɔl-lo coo ndóò loam vɛlɛ sálàla cuɛima cun kɛndɛ-kɛndɛlan ni, kani lende ndóò bɛnda le tosaa o Cɛi-Mɛlɛka-o nin ni.

²⁶ Mí Salomɔn cɔaw dɛ̀ndɛ̀la mamɛnndan Ɛsiɔn-Kebɛr ciee, Eilat ikɛi kpɛɛlun, nɛɛ dɛ̀ndɛ̀lan láà sim o makpɛ̀ndɛ̀an kɔngɔ o lɛŋnde Edɔm-nden nin-nda.

²⁷ O kon, mí Hiram viam vanaa ndɔa baalaa, áà caa tɛɛnguuo a dɛ̀ndɛ̀la mamɛnndan ɲɛkɛndɛi-ya o Salomɔn ndo le buɛyaa Salomɔn kon liilaa.

²⁸ Mí vanaa tɛɛnguu kan a dɛ̀ndɛ̀lan-nda kpow a kɔa o lɛŋnde Ofir len nin a sianion kilolan milionndo o pilɛ a vaalan kɛmɛ lediin, má kɔ yɔngu masaa Salomɔn mun.