1Masaa 8 - BII BILA

A kɛsi kesu kpemaa o Cɛi-Diandaa nin

¹ O kon, mí masaa Salomɔn veelu kaasoŋaa kɔlkalua Israɛlla, vanaa va bolii lapangɛi-ya a simlacia layungua Israɛlla kpow, mó cuungiaa nda kpede Yerusalɛm le kesu kpema Mɛlɛka-o cuaa o Kobi David-o nin, o co Siɔn-ndo pɛɛn, le heeloo a ndu o Cɛi-Mɛlɛka-o nin.

² Mí vanpiaandua Israɛlla kpow a cuungian vɛlɛ o masaa Salomɔn ndo le kafo paangii Etanim-nde tosaa, paangii ŋɔmmɛwndɔɛi pɛɛn.

³ Mɛɛ kaasoŋaa kɔlkalua Israɛlla hin, mí vanaa-solia-lasálàá cua kesu kpemaa, má kɔa a ndu,

⁴ mí vanaa-solia-lasálàá a leviia cua kesu kpema Mɛlɛka-o, cɛi-kola-toandaa-labɔɔŋianndo a ɲɛm diandan va le vali solia lasálàá mi n va o cɛi kon nin-ndon kpow, má kɔa a mun.

⁵ Mí masaa Salomɔn nda sɛ́lɛ́ Israɛlaa va a cuungiannda ndu ikɛi-ya kpow a sim o kesu kalaa hɔl-ndɔ, má soli saa a nawva sálà, vanáà nɔla nda cɔm te, kani a va sɛ́lɛ́.

⁶ Mí vanaa-solia-lasálàá kɔ kɛsi kesu kpema Mɛlɛka-o o fonda ndɔɔ, o Fonda Diandaa-Diandaa va o cɛi-kola-toandaa diandaa nin, o Cɛi-Mɛlɛka-o nin-ndo nin, o kumbannda mɛlɛkaa kanda ɲɛm Hala-on-nda bɛngu.

⁷ Kani kumbannda mɛlɛkaa kan la va lapɛɛngaa o Fonda Diandaa-Diandaa kon coo, mí la kumbu kesoo a yɔmii ndáà saa le kesu kalaa cuaa-e.

⁸ Má bɛndi yɔmii ndáà cua kesu kalaa-e, vanáà lo o Cɛi-Diandaa nin mì vanáà ce ndi bolle, kɛ vanáà lo o bɛ́ɛ̀ mì vanaa ce ndi le. Yɔmii ken co vɔ lon háá paalen nden.

⁹ Powta yɛ́ndɛ́la tiɔnndan koni la va lenin ni, powta yɛ́ndɛ́la Moise ndóò kɛsi lenin Horɛb telen Mɛlɛka yii kpemaa nda Israɛlla o fula nda va Esipte-o lan pɛɛn.

¹⁰ Tuma vanaa-solia-lasálàá fula o Cɛi-Diandaa nin-ndo, mí kumnde pia o Cɛi-Mɛlɛka-o nin ca.

¹¹ A tiwba le muungoo lenin le baala ndáà tosaa le, kani mí biilu Hala-o pia o Cɛi kalaa nin ca.

¹² O kon, mí Salomɔn dimi aa: «Mɛlɛka, nɔm óò yeema le calle o cɛi ɲumndan ma co nin-ndo nin.

¹³ Kɛ i cii nɔm Cɛiyo tengul, nɛɛ n vanin le lɔ́ɔ́-lɔ́ɔ̀-a pɛɛn.»

Sɔɔn dimin le Cɛi-Hala-o sɔɔ ndu Mɛlɛka o ba-on

¹⁴ Mí masaa Salomɔn mulin, mó dɔaw Israɛlla kpow duaa, sɛ́lɔ́ɔ́ kpow va isisi ndu ikɛi.

¹⁵ Mó dimi aa: «I mel Mɛlɛka Hala Israɛlla balika le kpema o yiilu David fuɲa ni-o peeloo, kani mí ndóò dimi aa:

¹⁶ ‹Kabi paale ya soli vanaa nia, a co Israɛlla-a o lɛŋnde Esipte len nin-nden, i hɛli kobi kɛ́-kɛ̀ o polama Israɛlla tɛɛn le ya cɛi tengul nɛɛ diola nilan la vanin biilɔnndo-a le. Kɛ David ya hɛli ni, mí siinguu ndu simlacinɔ vanaa nia, Israɛlla pɛɛn.›

¹⁷ David fuɲa ni ndóò yeema le Mɛlɛka Hala Israɛlla cɛiyo tengullo,

¹⁸ kɛ mí Mɛlɛka dimul ndu aa: ‹Yiyan kɛndɔɔ pila n sɔla kon le ya Mɛlɛka cɛiyo tengullo ni.

¹⁹ Kɛ nduyɛ, o co nɔm te tangulnin cɛi kalaa le, po nɔmndo co ndu hunɔɔ tangul ni, po nɔm pila vialunin-ndo pɛɛn, ndu tengulnin ya cɛiyo ni.›

²⁰ Sɔɛi Mɛlɛka ndóò dimi ken-nde kpeekpei o peelu nuaa ni. Ya koma cal o kpɛŋɛ lemasa fuɲa nuu coo ni le masalen tosaa Israɛlla coo maa mɛɛ Mɛlɛka ndóò dimi yɛ. I tangul Cɛiyo ho le diola Mɛlɛka lan, Hala Israɛlla pɛɛn.

²¹ Mí bɛɛndiaa fondaa le kesu kpema Mɛlɛka-o co nin-ndo kɛsio, kpema ndu Mɛlɛka ndóò yiilu fuɲaa naa mamaa telen o soli nda o lɛŋnde Esipte len nin-ndo.»

Piɛile Salomɔn-nden

²² O kon kɔɔli, mí Salomɔn sim o fonda-loamaa-lasálà Mɛlɛka-o hɔl-ndɔ Israɛlaa sɛ́lɛ́a va lon-nda kpow o hɔl, mó heelu balan, mó dimi aa:

²³ «Òó Mɛlɛka, Hala Israɛlla! Kandɔɔ o halataala coocoo, háá o lɛŋnden coo nanu, Hala celen co maa nɔm te. A lò o lediom coo, a nɔ vɛlɛ ɲííye a vanaa nɔmaa baalaa co kelaa o nɛila nɔmndan coo-a.

²⁴ Sɔɛi nɔm óò dimul sindɛ David fuɲa ni-e, ndi n peelu peeloo ho ni. Ɲɛ nɔm óò dimi-o, ndu n tosa hoo hau ni.

²⁵ Lelan, Mɛlɛka, Hala Israɛlla, peelu niko vɛlɛ sɔɛi nɔm óò dimul vana nɔm baalaa-e, David fuɲa ni pɛɛn. Kani mí nɔm óò dimul ndu aa: ‹Te cuavaa nɔmnda mandan pɛ, mà kela o nɛila nilan coo mɛɛ nɔm pila tosa yɛ, mɛɛ a folanin vana muungunin o fonda nɔmndo, mò cal o kpɛŋɛ nɔm lemasaa nin le masalen tosaa Israɛlla coo-o le.›

²⁶ Lelan, Hala Israɛlla, peelu niko kpema nɔm óò yiilu vana nɔm baalaa-o, o yɔŋnun David fuɲa ni-o.

²⁷ Kɛ nduyɛ, vɛ̀ɛ̀ Hala nɔla pá calle o lɛŋnden coo? Tofa vɔ mɛɛ halataalaa pɛngɛlan mó tiw tɛngɛ̀-tɛngɛ̀ yɛ, a kon kpow Hala sul o halataala le, o co vɔ le sulɔɔ o Cɛile ya tengul ndu len-nden nin te!

²⁸ Kɛ o va bɛɛ lende, Mɛlɛka Hala nuu, yaŋ nilan o piɛile ya vana nɔm baalaa co nɔm-nden. Tuei tɛɛlɔn ya co nɔm-ndo, yaŋnun piɛile ya co nɔm nden hau len.

²⁹ Paalen a ɲumndan, màá hɔlte nɔmnden le va o Cɛiyo ho coo, kani fondaa ho n dimi ni aa nanu diola nɔmndan la vanin piɔlnɔnndo ni. Lelan, yaŋ nilan o piɛile vana nɔm baalaa co o fondaa ho len.

³⁰ Ya vana nɔm baalaa a vanaa nɔmnda, a co Israɛlla-a, n sim pɛ o fondaa ho mì n piɛi nɔm, tuei naa diom nɛɛ n vanin o calta nɔmndan o halataala-a, mà mal naa haki.

³¹ Te vanndo cua pɛ hakio a puapilɛ ndɔɔ, mà dimul ndu le mɛnanndo, te o mɛnan pɛ o fonda-loamaa-lasálàá nɔmndo ho cɛinin nanu,

³² yaŋnun ndu diom nɛɛ n co o halataala-a, mà cɛn, mà kelu yamɛi vanaa nɔmaa baalaa tɛɛn, mà yaala vana nɔ dí loo, mò sɔla sanga o bɛnda le sɔlaa-o, mà ke vana nɔ dí-o dí ndɔɔ.

³³ Tuma vanaa nɔmnda, a co Israɛlla-a cuanin hakio a nɔm, mà mal nda yaamɔaa ndaa o ba-o, taa muungu pɛ nɔm o ibuŋ, mà lisa diola nɔmndan, taa ɲɔɔlu nɔm pɛ, mà del nɔm o labɛngunin o Cɛiyo ho nin,

³⁴ yaŋ nda nilan nɛɛ n co o halataala-a, mà mal nda haki, mà mingi nda o lɛŋnde n ke sindɛ fuɲaa ndaa mamaa len nin. Kani vanaa nɔmnda nda co ni.

³⁵ Tàà tosa pɛ hakio pum a nɔm, mì halataalaa kindan, mì piɔɔ ve lɛ sia le, tàà piɛi pɛ o fondaa ho, mà lisa diola nɔmndan, mà mangala kela nda vɔɔndo,

³⁶ mulul nda nɛɛ n co o halataala-a, ma mal vanaa nɔmaa baalaa a yungu nɔmndo haki, Israɛlla pɛɛn, mà cɔm nda nɛi nda bɛnda le kelaa coo-o. O kon kɔɔli, a tuisi piɔɔ o lɛŋnde nɔmnden coo, lɛŋnde n ke len vanaa nɔmnda kɛ́ɔ len pɛɛn.

³⁷ Te yima fofolan ma lueilul nda pɛ o lɛŋnden nin, mì nàà halimaa tol nda coo, te tɔlɔɔlan la ɲɔfɔliaa pɛ mì la foofi, te sóónɔa a kambalaa súú-súù ka luɛi pɛ o lɛŋnden nin, te yaamɔɔa tiila pɛ vanaa nɔmnda o kobila mayoomula ndalan nin mà tiw nda ba, te kpundɛlan a nààla vɔɔnndan la tol pɛ nda coo,

³⁸ te vana pilɛ, te kon te Israɛlaa tɔ̀a kpow a solul pɛ nɔm diomndan o piɛilen nin le nɔm tɛɛlɔnndo, te vana-vana sina pɛ yɔŋ ndɔ vɔɔndo o kɔl ndɔɔ nin, mò muli hɔlla a ba Cɛiyo ho, mo heelu balan, mò piɛi nɔm,

³⁹ mulul nda nɛɛ n co o calta nɔmndan o halataala-a, mà mal nda haki, mà kelu yamɛi vana-vana mɛɛ dɛnnda ndɔlan la co yɛ. Kani nɔm pilɛ kpé sina kɔlta vanndacieea kpow ni.

⁴⁰ Tosa lende, o kon mì Israɛlla ke nɔm bɛɛlen le lɔ́ɔ́-lɔ́ɔ̀ o lɛŋnde n ke fuɲaa naa len coo.

⁴¹ Te miallo, vana co Israɛlnɔ loo cɛn pɛ o lɛŋnde levil-ten nin, mò hin le tɔ́ɔ́ o tuei diola nɔmndan-ndo,

⁴² kani vannda tuɛinin diola nɔmnda bɛndulan, kpaaya nɔmndo a yoomuma nɔmndan tɔ́ɔ́, te o hin pɛ mò hun piɛi nɔm o Cɛiyo ho nin,

⁴³ yaŋ mial kon nilan nɛɛ n co o fonda nɔm calaa o halataala-a, mà toosiaa balahavɛila ndɔlan kpow mɛɛ o ɲunanin nɔm yɛ, haliko mi vanaa súúla yɛ́-yɛ́a co o lɛŋnden coo kpow-va sina diola nɔmnda bɛndulan, mà ke nɔm bɛɛlen maa mɛɛ vanaa nɔmnda, Israɛlla co nɔm bɛɛlen keo yɛ. O kon mì vanaa kan sina maa diola nɔmndan lekɛ́ndɛi la co o Cɛi ya tangul hoo-o coo ni.

⁴⁴ Te vanaa nɔmnda, a co Israɛlla-a fula pɛ le kɔlan yaamɔaa ndaa cɔlɔbaa, mà bii silala n kenin nda lan, mà kela lecoo, taa muli pɛ hɔlla a kpengii kobi n hɛli hoo-o co-e, a kpengii ya tengul nɔm Cɛiyo ho-e le nɔm Mɛlɛka piɛiyo,

⁴⁵ tuei nda diom ma mulul nda nɛɛ n co o halataala-a, ma cɛn ma sim le nda.

⁴⁶ Tàà cua pɛ hakio a nɔm, kani vanaciee kɛ́-kɛ̀ co le o cue haki loo, taa tuulu pɛ kɔl a nda ma mal nda yaamɔɔa o ba, yaamɔaa kan kɔ a nda polon, a kɔ a nda macɛlu,

⁴⁷ tàà lo pɛ o cɛle len nin, mà keeliaa kɔllo, tàà muungu pɛ nɔm o ibuŋ mà ɲɔɔlu nɔm o lɛŋnde nda co len va nin o biyɔɔ nin-nden nin, mà dimi aa: ‹N cua hakio, n tɛɛmbuu tɛɛmbuu bɛndu, n laasian›,

⁴⁸ tàà ɲɔɔlu pɛ nɔm a kɔlta ndalan kpow a á yoomu ndaa kpow, tàà lo pɛ o lɛŋnde nda kɔɛ a nda o biyɔɔ nin-nden nin mà muli hɔlla kpengii lɛŋnde n ke sindɛ fuɲaa ndaa len, kpengii kobi n hɛli hoo-o a kpengii Cɛi ya baŋ hoo o diola nɔmndan-ndo le nɔm tɛɛlɔnndo,

⁴⁹ mulul nda piɛile ndalen mà mal nda haki nɛɛ n co o calta nɔmndan o halataala-a, mà sim le nda,

⁵⁰ mà mal vanaa nɔmnda haki le hakila nda cua a nɔm-ndan a le nila kalula nda tosal nɔm-ndan, mà luei vanaa nda co o ba o cɛlen nin-nda kɔl iɲííyo o kɔl, mì vanaa kan tuinun nda iɲíí.

⁵¹ Kani vanaa nɔmnda nda co ni, kɛ́ nɔmndo nda co ni, nɔm soli nda o tóndó icilin tuwvo nin Esipte ni.

⁵² Telen oo telen vana nɔm baalaa nda vanaa nɔmnda, a co Israɛlla-a solul nɔm pɛ diomndan le nɔm tɛɛlɔndo, kumbi hɔlla ma tofa ciŋ, ma yaŋ nilan o koŋul nda co o nɔm ndo-o.

⁵³ Kani nɔm Maalii, nɔm Mɛlɛka hɛli naa Israɛlla vanaa-mangalaa-isɔaa kpow tɛɛn o lɛŋnden coo ni, ma siinguu naa kɛ́ nɔmndo mɛɛ nɔm óò dimul Moise vana nɔm baala lɔ́ɔ́ kon yɛ, lɔ́ɔ́ n soli fuɲaa naa mamaa Esipte-o.»

Salomɔn piɛi duaa Hala o ba

⁵⁴ O piɛile tɛɛlannde Salomɔn va len tosaa len nin kpede, o va vula baŋaa o fonda-loamaa-lasálàá hɔl-ndɔ, a balan laheelaa coocoo. Ndóò ciiyo piɛilen kpede, mó can,

⁵⁵ mó sim, mó heelu diomndo, mó dɔaw Israɛlaa va lon-nda kpow duaa, mó dimi aa:

⁵⁶ «Biiloo co le Mɛlɛka, le ke o ke vanaa ndɔa, Israɛla pɛngio mɛɛ ndóò dimi yɛ-o. Lekɛ́ndɛi, sɔɔn kɛndɛn ndóò dimi a sondo Moise vana ndɔ baalaa-on kpow, ikɛ́-kɛ̀ lo le peelɔnndo le.

⁵⁷ Màá Mɛlɛka Hala naa lo naa ikɛi mɛɛ o va fuɲaa naa mamaa ikɛi yɛ! Màá ò múlùl naa kɔɔ mo mal naa le!

⁵⁸ Kɛ màá o muli naa kɔltan o ndu lo, mì n kela o nɛila ndɔlan kpow coo, mì n bii tɔŋnda ndɔlan, mì n tuei silala ndɔlan, mì n bii sɔɔn ndɔn o dimul sindɛ fuɲaa naa-on!

⁵⁹ Màá Mɛlɛka Hala naa va yiyanndo idii a icɔl o sɔɔn ya langa dimul ndu mun-ndon coo, haliko mo lo naa ikɛi o dɛnndan kpow nin!

⁶⁰ O kon vanaa súúla yɛ́-yɛ́a co o lɛŋnden coo kpow-va co sina ni maa Mɛlɛka co Hala ni, maa o celen co o ndu kɔɔli le few!

⁶¹ Màá kɔlta niaalan kpow la va le Mɛlɛka Hala naa mɛɛ la co hau nuaa yɛ! Màá la tuei silala ndɔlan, mì la bii vɛlɛ tɔŋnda ndɔlan!»

A solul Mɛlɛka sálàlan

⁶² Mí masaa Salomɔn nda Israɛlla solul Mɛlɛka sálàlan.

⁶³ Mì Salomɔn dii nawva vaalan bidiin a latiɔn, mó dii saa a cuinnda vaalan kɛmɛ a bidiin le Mɛlɛka sálà kɔlɲuloo solullo. O kon mí ndu masaa nda Israɛlla kpow a tosa kafoo, má sɔaa Cɛiyo Mɛlɛka o ba.

⁶⁴ Paale len, mí masaa sɔaa bɛ́ɛ̀ va o Cɛi-Mɛlɛka-o sondoo-o Mɛlɛka o ba, kani o bɛ́ɛ̀ lon ndóò soli sálàla loamaalan ni, mó loam kpeyan sálàá a cuɛima cɔlua sálà kɔlɲulua. Bau fonda-loamaa-lasálà n'daɲa va o Cɛi-Mɛlɛka-o hɔl-ndɔ-o ndóò dɔɔnan taw, sálàla loamaalan, sálàla kpeyanndan a cuɛima cɔluma va le sálàla kɔlɲululan solio-an maa sul o fonda kon te.

⁶⁵ O telen pilɛ kon, mí Salomɔn tosa kafoo. Israɛlla va lon sɛ́lɔ́ɔ́ taw, mí vannda hun fulaa o lɛŋnden kpow nin. Kandɔɔ Lebo-Hamat kɔlan tiiyaa háá o pee pɔmbɔɔ Esipte, mí nda kpow a hun Mɛlɛka Hala ndaa o hɔl. A tosa palɛi ndii ŋɔmmɛw, má handu vɛlɛ palɛi ŋɔmmɛvii celen lecoo. Faw-faw palɛi tɔ́ a ihiɔɔlu nda tosa ni.

⁶⁶ O paale ŋɔmaandɔlen coo, mí masaa Salomɔn dimul nda le muungoo o la nda lo, má dɔawnun ɲaale, má mel masaa balika, má dɔaw ndu duaa. O kon mí vana-vana muungu o ndu lo bɛɛ a kɔlkɛndɔɔ le kɛndɛi Mɛlɛka ndóò tosal David vana ndɔ baalaa a vanaa ndɔa-e, Israɛlla pɛɛn.