1Masaa 6 - BII BILA

Salomɔn tangul Cɛi-Hala-o

¹ Israɛlla fulaa o cɛlen nin Esipte, má tosa vɔsilan kɛmɛ lehiɔɔlu a belaŋɔmaa, Salomɔn ndóò nɔ nin vɔsilan tan hiɔɔlu o masale ndɔlen nin, o paangii diinndɔɛi nin, i ndáà veelu aa paangii Siv-e, mí Salomɔn kandu Cɛi-Hala-o tangullo.

² Cɛi Salomɔn ndóò tengulu Mɛlɛka-o va bandei dunndo belaŋɔmpum, buo dunndo bidiin, helɔɔ dunndo beleyaa.

³ Tongo-sɛmtɛ tase va o Cɛi-Hala kon sondoo-o va bandei dunndo bidiin mɛɛ Cɛi-Hala kalaa ndóò nɔ buo yɛ. Yingila ndɔɔ va dunndo tɔ́.

⁴ Mó toosiaa diola pɔmbɔlan o Cɛi-Hala kon, mó kayakaya cilinndon o diola pɔmbɔla lan.

⁵ Mó tangul cɛila coocoolan helɔɔ leyàá o Cɛi-Hala kon balɔɔ, mí la balu cìì ndɔɛi sɔ́, kandɔɔ o cɛi bɛndu lenin va o sondoo-o, kɔlan tiiyaa háá o cɛi va o tumndo-o dí.

⁶ Cɛi va lebɛngu-o va buo dunndo leŋuɛɛnu, cɛiyo tɛɛn dunndo leŋɔmpum, ó va lecoo-o dunndo leŋɔmmɛw. Cìì cɛi kon ndíì nɔ celul pilɛ kandɔɔ lɛŋ háá lecoo le. Lelan yindɔ cɛila lan ndóò luei o cìì Cɛi-Hala lebollo nin te.

⁷ A powta kpulukuulan nda baŋ Cɛi-Hala kon ni, a cii ndu tangul lende, vana tui kunduvaa, cuei, te kon te ciliŋii kɛ́-kɛ̀ diom te.

⁸ Diola luɛyaala cɛi tase va o cɛi coocoo bɛngu-o la va o Cɛi-Hala kon o ba kɛndɔɔ coo. O helɔɔlan coo vanáà kei le luɛyɔɔ o cɛi coocoo va tɛɛn-ndo nin ni, lecoo koni vanáà kei vɛlɛ le tiiyaa o cɛi coocoo yàándɔ va lecoo-o nin ni.

⁹ Mɛɛ Salomɔn tangul Cɛi-Hala-o, mó cii ndu tangul, mó hɛɛnduu kpóŋndán, mó toosiaa kaa ndɔɔ a pɛngɛn yɔm sɛɛdre.

¹⁰ Cɛila coocoola ndóò tangul, mí láà balu Cɛi-Hala kon-ndan, o kɛ́-kɛ̀ ndóò nɔ helɔɔ bandei dunndo leŋuɛɛnu. A yɔmii sɛɛdrei ndáà toosiaa kpóŋmá Cɛi-Hala kon ni.

¹¹ O kon, mí Mɛlɛka dimul Salomɔn aa:

¹² «Cɛi-Hala n co hoo tangullo-o, taa kela pɛ mɛɛ tɔŋnda nilan la dimi yɛ, taa bii pɛ pɛɛkula nilan, mà manda silala ya yɔngu nɔm-ndan kpow, i peelulnin nɔm kpema yáà yiilu David fuɲa nɔm-ndo.

¹³ I vanin Israɛlla tɛɛn, i melnin vanaa nia le, Israɛlla pɛɛn.»

A bɛɛndiaa Cɛiyo lenin

¹⁴ Mɛɛ Salomɔn cii Cɛi-Hala-o tangul,

¹⁵ mó kumbu cììn Cɛi kalaa lenin a pɛngɛn sɛɛdreon, kandɔɔ lɛŋ helɔɔ háá o kpóŋndán. Mó yɛɛmbuu pɛngɛn siprɛsion lɛŋ le Cɛiyo lenin kpow kumbɔɔ.

¹⁶ Mó toosiaa fondaa pum lenin di a yɔmii sɛɛdre, o va bandei dunndo bidiin. Lenin ndon ndóò kɛsi kesu kpema Mɛlɛka-o ni, fonda kon va Cɛi-Diandaa ni.

¹⁷ Mí Cɛi-Hala tɔ̀ va niko o Cɛi-Diandaa hɔl-ndɔ-o va bandei dunndo belehiɔɔlu.

¹⁸ Tuuliaala cale sɔ̀ɔ̀velan a tuuliaala peengela ndɔlan la va o pɛngɛn yɔm sɛɛdren va o Cɛi-Hala-o nin-ndon coo. Cɛiyo lenin kpow va o kumbaa a yɔmii sɛɛdrei, powvo pilɛ bɛɛ vanáà ci le.

¹⁹ Mó bɛɛndiaa Cɛi-Diandaa va kon lenin-ndo, cɛi kpeekpei va o Cɛi-Hala-o tɛɛn-ndo pɛɛn, le kesu kpemaa Mɛlɛka-o kɛsio lenin.

²⁰ Cɛi-Diandaa kalaa va bandei dunndo bidiin, buo dunndo bidiin, helɔɔ dunndo bidiin. Mó yikpa cɛi kon lenin kpow a sianin diandan. Mó toosiaa fonda-loamaa-lasálàá a yɔmii sɛɛdrei, mó yikpa ndu a sianin diandan.

²¹ Mí Salomɔn yikpa lenin Cɛiyo a sianin diandan, mó toandu yɔlɔn n'sianion o Cɛi-Diandaa kon sondoo, o ndóò yikpa kon a sianion-ndo.

²² Mó yikpa Cɛi-Hala-o kpow a sianion, mó yikpa vɛlɛ fonda-loamaa-lasálà va o Cɛi-Diandaa sondoo-o a sianion.

²³ Mó cɔaw mɛlɛkaa kanda ɲɛm Hala-on-nda nda ŋiɔn a yɔm oliviei yondoo, mó kɛsi nda o Cɛi-Diandaa nin, o kɛ́-kɛ̀ va simndan dunndo tɔ́.

²⁴ Kumbanndan latiɔn-tiɔn ndáà nɔ ni. Kumban tase mɛlɛkanɔ tase kanda ɲɛm Hala-on-ndo va bandei dunndo leŋuɛɛnu, kumban diinndɔɔ dunndo leŋuɛɛnu. Kon co dimio ni maa cɔnɔnndo o kumbanndo pilɛ bollen kɔlan tiiyaa o kumbanndo pilɔɔ mɛɛlulan, ɲɔɔ va bandei dunndo tɔ́.

²⁵ Lende koni mɛlɛkanɔ diinndɔ kanda ɲɛm Hala-on-ndo bɛɛ va bandei ni. Bandii pilɛi kpen-kpen ndáà nɔ nda ŋiɔn ni.

²⁶ Mɛlɛkaa ŋiɔŋaa kanda kan ɲɛm Hala-on-nda, o kɛ́-kɛ̀ va simndan dunndo tɔ́.

²⁷ Mó kɛsi nda o Cɛi-Diandaa kesu kpema Hala-o va nin-ndo tɛɛn déŋ. Kumbannda ndalan la va lapɛɛngaa, mí kumban o tasoo pilɛ pilan cìì cɛiyo kpengei pilɛi, mí kumban o diinndɔɔ pilan cɛiyo kpengei pilɛi. Mí kumbannda ndalan lapilɛlan la bɔɔŋian o cɛiyo kɔllo déŋ.

²⁸ Mó yikpa mɛlɛkaa kanda kan ɲɛm Hala-on-nda a sianion.

²⁹ O cììn Cɛi-Hala-o kpow coo, mó tuuliaa mɛlɛkaa kanda ɲɛm Hala-on-nda, siɔ́ɔ́la vawlan a peengela pɛɛngaalan.

³⁰ Mó yikpa vɛlɛ Cɛiyo lɛŋ, lenin a o bɛ́ɛ̀ a sianion.

³¹ Mó sial koŋ kumbula tiɔndo a pɛngɛn oliviee yondoo le Cɛi-Diandaa kesu kpema Hala-o va nin-ndo kindaa. Kèédei a koŋnda lan o pilɛ va celullo cìì cɛiyo piɔwvo leŋuɛɛnu.

³² A yɔmii oliviei yondoei o toosiaa kumbula tiɔnnda koŋndo ni. Má tuuliaa mɛlɛkaa kanda ɲɛm Hala-on-nda, siɔ̀ɔ́la vawlan a peengela pɛɛngaalan lecoo, má yikpa lan a sianion.

³³ Lende koni ndóò toosiaa vɛlɛ o Cɛi-Hala-o sondoo ni. A pɛngɛn oliviee yondoo ndóò toosiaa yɔm koŋndan la luɛi nin-ndo ni, mó toosiaa koŋnda tiɔnndalan a pɛngɛn yɔm siprɛs. Bu koŋ kalaa va cìì cɛiyo piɔwvo lehiɔɔlu.

³⁴ Mó landu kolala landaala nɔ tuuliaala kɛndɛ-kɛndɛlan-ndan tan tiɔn o dioo coo, koŋ oo koŋ kola landaa o pilɛ.

³⁵ Mó tuuliaa vɛlɛ mɛlɛkaa kanda ɲɛm Hala-on-nda, siɔ̀ɔ́la vawlan a peengela pɛɛngaalan lecoo, mó yikpa ɲɛm mun a sianion.

³⁶ O kon kɔɔli, mó kunga bɛɛ va lenin-ndo a powta sialaalan polan man yáá a á pɛngɛn yɔm sɛɛdre polalen lepilɛ.

³⁷ O vɔsi hiɔɔlundɔɔ o masale Salomɔn-nden nin, o paangii Siv nin nda kila Cɛi-Mɛlɛka-o ni.

³⁸ O vɔsi tɔ́ a ò pilɛndɔɔ nin o paangii Bul nin, i co paangii ŋɔmaandɔɛi-ye, mí Cɛi-Mɛlɛka-o cuu tangul mɛɛ ndóò tuunun yɛ a mɛɛ ndóò bɛnda le tangulɔnndo yɛ kpede. O vɔsilan tan ŋɔmmɛw bɛngu o tangulun ni.