1Masaa 5 - BII BILA

Lɛŋii va masaa Salomɔn o ba bɛngu-e

¹ Salomɔn va vɛlɛ masalen tosaa o masɛi yɛ́-yɛ́i va kandɔɔ o pee bɛndoo Efrate-e coo, keiyo a lɛŋnde Filistia, kɔlan tiiyaa háá o pɛɛngulan a lɛŋnde Esipte len. Háá mó vu, vanaa kan va muloo malɔɔ ndu o ba, a va vɛlɛ ndu baalaa tosallo.

² Lepalaa-lepala ɲɛdiaa va dionnɔnndo o Salomɔn-ndo cɛinin-ndo va hoo ni: maalon kilolan vàála ŋɔmahiɔɔlu, kpeyan yuku-yukoo kilolan vaalan tɔ́ a laŋɔmaa,

³ navaa celulaa tɔ́, navaa va billo dioo yondoo nin-nda bidiin a saa kɛmɛ. Visia celennda va vɛlɛ dionnɔnndo o ndu lo cɛinin maa kialla, puwvɛa, cuinaa yondoa a yovaa celulaa.

⁴ Kani masale Salomɔn-nden léè taŋ peo Efrate leeloo a ba paalen le del-lo, kandɔɔ Tifsa kɔlan háá Kaasa. Masaa yɛ́-yɛ́a va o lɛŋnde len nin-nda kpow va ndu o ba bɛngu. Bɛndaa va nda tɛɛn nda masaa balu ndu-a kpow.

⁵ Tuma Salomɔn va masaa-o, Yudaa nda Israɛlla kpow a vannun a kɔlɲuloo. Cɔnɔnndo Dan tiiyaa Bɛɛr-Seba, vana-vana va calnɔnndo o rɛsɛŋun ndɔn bɛngu a o voosun ndɔn bɛngu.

⁶ Salomɔn ndóò nɔ cɛila ndáà tangul le soa mandaa lan vaalan belehiɔɔlu le soa va ɲɛla ɲaanannda ndɔlan nanɔɔ-a. Ndóò nɔ vɛlɛ vanaa ɲaanun a ɲɛla ɲaanannda lan-nda vaalan tɔ́ a latiɔn.

⁷ Masaa n'bungaa tɔ́ a à ŋiɔnda va masaa Salomɔn a vanaa va ɲɛdiaa dioo o ndu lo cɛinin-nda baloo dɔvɔɔ ni. Masa ibunga oo masa ibunga ndóò nɔ paangii ndóò yɔngu balo kon-nde. Ndáà nɔ hɔlten o sɔɛi balo kon coo ni haliko ɲɛ-ɲɛ ndóò bii masaa lepɛŋ te.

⁸ A va ndu vɛlɛ ɔrse a bil soa dia-o yoo mɛɛ ndóò ɲuna vana-vana yɛ.

Salomɔn pɛlnun diolan le kɔlkalu ndɔɔ

⁹ Mí Hala ke Salomɔn kɔlkaloo a dɛnɛ sinaa taw, mó ke ndu kɔl taasio o kɔannan kɛ́-kɛ̀ mɛɛ sióónndon co o mɛmma ihɛllan kɔngɔ nuaa yɛ.

¹⁰ Mí kɔlkalu Salomɔn-ndo hiaw kɔlkalu Arabua a kɔlkalu Esiptea kpow.

¹¹ Mó hiaw vannda kpow kɔlkaloo, mó hiaw Etan Ɛsrahiinɔ, Heman, Kalkɔl a Darda, poaa Mahɔl-la kɔlkaloo. Lelan, mí tɔ́ɔ́ ndɔɔ kela vanaa-mangalaa-isɔaa va o tàndá kon nin-nda kpow tɛɛn.

¹² Talelan vàálan tan yáá o dimi ni. Condun o soli-on va vàá pilɛ a ŋuɛɛnu.

¹³ O soo a yɔmii súú-súù ka o kɔɔ, kandɔɔ a yɔmii sɛɛdrii co o lɛŋnde Liban-nden nin-nde, kɔlan tiiyaa háá a bil hisɔp. Mó soaa vɛlɛ a visia, a yowva, a ɲaa yooma sasun lɛŋ-nda a á suwva o kɔɔ.

¹⁴ Vannda va fulaa o vanaa-mangalaa-isɔɔa kpow tɛɛn le kɔlan sɔɔn kɔlkalun Salomɔn va dimio-on tueyɔɔ. Masaa o lɛŋnden kpow coo, a tuei kɔlkalu Salomɔn-ndo tɔ́ɔ́-a va vannda vomɔɔ le kɔlan ndu yaŋnɔnndo.

Salomɔn co bɛɛndianndo le Cɛi-Hala-o tangullo

¹⁵ Hiram caaŋoo David va masaa Tir ni. Lɔ́ɔ́ o tuei maa a pɔla Salomɔn má siinguu ndu masaa o fonda fuɲa ndɔ-o-o, mó viam vanaa ndɔa baalaa o Salomɔn ndo le ndu yilɔɔ.

¹⁶ Mí Salomɔn ndu viam kiilaa o Hiram ndo, má kɔ dimul ndu aa:

¹⁷ «A sina maa David fuɲa ni tiwba le Mɛlɛka Hala ndɔɔ Cɛiyo tengullo le, kani yaamɔaa va fulaa nɛɛ-nɛɛ ka le ndu delɔɔ coo a cɔwlan. Kɛ o mɛɛlulan, mí Mɛlɛka ke ndu kpaayaa mó nɔla nda.

¹⁸ Nihau yɛ, Mɛlɛka Hala nuu cii kɔlɲuloo luei naa tɛɛn naa vanaa-mangalaa-isɔaa balu lɛŋnde nilen-nda kpow. Lelan, buulan co ya le yaamɔɔ le, buulan co ya le dɛnɛ palaa kɛ́-kɛ̀ le.

¹⁹ I yeema niko le Mɛlɛka Hala nuu Cɛiyo tengullo. Kani nuaa ndóò dimul sindɛ fuɲaa nuu ni aa: ‹Po nɔm ya siinguunin masaa o fonda nɔmndo, mò cal o kpɛŋɛ nɔm lemasaa coo-o tangulnin Cɛiyo le ya biiloo ni.›

²⁰ Lelan yandi, cɛl mì vannda kilul-la yɔmii sɛɛdrei Liban. Kani a sina maa vana-vana co naa tɛɛn nanu mo caa yɔmnde kiolɔɔ maa Sidɔnnda le. Buɛyaa nia vanin buɛyaa nɔmnda ikɛi. Ɲɛ-ɲɛ n ɲuna pɛ le buɛyaa nɔmnda salaa, i yɔngunin vɛlɛ kon.»

²¹ Lɔ́ɔ́ Hiram tuei sɔɛi Salomɔn dimi ken-nde-o, mó dɔawnun ɲaale taw-taw, mó dimi aa: «Biiloo co hau le Mɛlɛka! Kani o ke David po kɔlkaloo le simndan sɛ́lɛ́ bɛndoo ho laci.»

²² O kon kɔɔli, mó vim Salomɔm kiilaa, má kɔ dimul ndu aa: «I tuei ɲɛ n ɲuna ya-o, i cɛl le nɔm yɔmii sɛɛdrei a yɔmii siprɛsiei yɔngoo kpow mɛɛ n yeema yɛ.

²³ Buɛyaa nia cuanin yɔmii ken o pembon Liban coo, mà kɔɛ a ndi háá o mɛmma ihɛllan kɔngɔ. Mà yii ndi kundaa, mà tɛɛnguu ndi mɛnndan, mà kɔ tiimbuu ndi nɛɛ n yeemanin-nda. O kon, buɛyaa nɔmnda nda kɔ cua niko ndi lon. Nɛi nɔm bɛnda ma mala ya coo-o co ni, mà va ya ɲɛdiaa keo, mì dɔw vanaa co o ya lo cɛinin-nda balo.»

²⁴ Mí Hiram ke Salomɔn yɔmii sɛɛdrei a yɔmii siprɛsii ndóò yeema-e kpow.

²⁵ Lelan vɔsi-vɔsi, maalon kilolan milionndan tan ŋɔmpum a cuɛima olivema sɔvɛ-sɔvɛan litililan vàálan tan ŋɔmaa Salomɔn va Hiram yɔngoo le vanaa va o ndu lo cɛinin-nda baloo dɔvɔɔ ni.

²⁶ Mí Mɛlɛka ke Salomɔn kɔlkaloo mɛɛ ndóò yiilu ndu kpemaa yɛ. Kɔlɲuloo va Salomɔn nda Hiram tɛɛn. Le hee, má yii kpemaa nda ndu.

Salomɔn tuu mɛɛ baala lepɔtɔllo bɛnda le tosanndo yɛ

²⁷ Mí Salomɔn soli pɔtɔlla o lɛŋnde Israɛl-ten nin, mí vannda vaalan beleyaa a va baala kon tosaa.

²⁸ O ipaangu oo ipaangu nin, vannda vaalan tɔ́ ndóò viam o pembei Liban coo ni. Adoniram va pɔtɔlaa kan bollen ni. Ndáà kɔɛ pɛ lon, ndáà tosa baalaa paangei pilɛ, ndáà muungu o la nda lo, ndáà pɛngi le paangon mún miun.

²⁹ Vanaa vilia lavolɔɔa vaalan belaŋɔmmɛw a vanaa sialaa lapowva vaalan belaŋɔmaa Salomɔn ndóò nɔ o pembei coo ni.

³⁰ Handɔɔ o kan coo, vannda vàálan tan yáá a kɛmɛ leyáá masaa n'bungaa Salomɔn-nda ndáà handu simlacia le baalalan hɔlten nɔu coo ni.

³¹ A va powta bɛndula kɛndɛ-kɛndɛlan kaaliaa, má va lan siɔlɔɔ ɲɛkɛndɛi le Cɛi-Hala-o kilaa a lan mɛɛ masaa ndóò dimi yɛ.

³² Mí vannda Kebal sɔɔnguu buɛyaa Salomɔn-nda a buɛyaa Hiram-nda ikɛi le lan siɔlɔɔ. Má sial powtan, má toosiaa yɔmnde le Cɛi-Hala-o tangullo.