1Masaa 3 - BII BILA

Salomɔn yil cua masaa Esipte-o pum o nɔ̀u nin

¹ Mí Salomɔn yiinun a Faraɔnnɔɔ, ó va masaa Esipte-o, mó yil cua ndɔɔ o nɔ̀u nin, mó kɔa a ndu o Kobi David-o nin. Má kɔ lo lon háá mó cìì cɛi ndɔ ndu pila-o, Cɛi-Mɛlɛka-o a kpaki ndóò balu Yerusalɛm-ndo tangul.

² O telen kon yɛ, o sooluulan vannda va sálàlan solio ni, kani Cɛi-Mɛlɛka-o ndóò tengulun-ndɔ le.

³ Salomɔn ndóò kaola Mɛlɛka taw, o va vɛlɛ kelaa o silala David fuɲa ndɔ ndóò yɔngu ndu lan coo. Kɛ a kon kpede, o sooluulan ndu bɛɛ ndóò soli sálàla cɔlua a sálàla ansan-ndan ni.

Salomɔn piɛi Hala le ndu kɔl taasio yɔngoo

⁴ Paale pum, mí masaa Salomɔn kɔa Kabaɔn le sálàlan solio lon, kani lon sooluula leboltan la va ni. Mó soli sálàla loamaalan vàá pilɛ o fonda-loamaa-lasálàá coo o sooluula lan.

⁵ Mí Hala cɔmnun ndu o lɔma sɔlaan nin icɔllo Kabaɔn ndon, mó ɲuna ndu aa: «Piɛi ya ɲɛ n yeema mì ke nɔm-ndo»

⁶ Mí Salomɔn muli aa: «A yɔŋnun vana lo o lediom coo-o a vana nɔm baalaa, o co David fuɲa ni-o. A tosa kon le tùú o kela nɔm o hɔl o sakpoyɛi nin, o dɛnɛ sandaa nin a o toɲaa nin-ndo. Má lo o lediom coo a ndu, má ke ndu hɔ́ɔ̀, mí hɔ́ɔ́ kon va hau icali o kpɛŋɛ ndɔ lemasaa coo.

⁷ A toɲa, Mɛlɛka Hala nuu, nɔm ke ya vana nɔm baalaa masalen o fonda David fuɲa ni-o ni. Kɛ nduyɛ, i co vɔ o bɔɔ le, i nɔ vɔ kɔlkalu ya tosa masalen ɲɛkɛndɛi le.

⁸ Nduyɛ, ya vana nɔm baalaa, i co vanaa nɔm pila hɛli-a tɛɛn, vanaa kan yɛ, vana cii nda sina le, a cuu vɛlɛ cɔm te, kani a co sɛ́lɛ́ taw.

⁹ Lelan, i tɛɛlun nɔm, yandi, ke ya vana baala nɔmndo kɔl taasio le masalen caa tosaa vanaa nɔmnda coo, mì handu pɛɛngulan dɛnɛ kɛndɔɔ a dɛnɛ vɔɔndo tɛɛn. Kani te o co lende le, nɛ̀ɛ́-nɛ̀ nɔlà yɛ masalen tosaa vanaa nɔmaa co haa sɛ́lɛ́ bɛndoo-a coo?»

¹⁰ Mí piɛile Salomɔn-nde len le hɛnan Mɛlɛka.

¹¹ O kon, mí Hala dimul ndu aa: «Le tùú n piɛi le nɔm pila yoomu vilɛi sɔla loo, le tùú n piɛi bolofaa le nɔm pila loo, le tùú n piɛi le yaamɔaa nɔmnda vu loo, kɛ má piɛi kɔl taasio le masalen tosaa o sandei nin,

¹² i co nɔm ɲɛ n piɛi ya-o ke, i co nɔm kɔlkaloo a sinapɛngoo ke, ò vana-vana sɔla vɔ paandu nɔm laci loo, o vana-vana sɔla lɛnin vɛlɛ o nɔm kɔɔli loo.

¹³ O kon kɔɔli, i kenin nɔm ɲɛ celen, o n piɛi ya loo: bolofaa bɛndoo a biiloo. O ceen nɔmndo nin kpow, vana-vana venin o masaa tɔ̀a tɛɛn maa nɔm te.

¹⁴ Handɔɔ o kon coo, taa kela pɛ o nɛila nilan coo, ma bii sɔɔn nun a tɔŋnda nilan mɛɛ David fuɲa nɔm tosa yɛ, i cɔɔlunin yoomu nɔmndo bɛndi.»

¹⁵ Mɛɛ Salomɔn tendu, mó sina maa lɔma sɔlaan ni. Mó muungu Yerusalɛm, mó kɔ sim o kesu kpema Mɛlɛka-o hɔl-ndɔ, mó soli sálàla loamaalan a sálàla kɔlɲululan, mó tosa vɛlɛ kafoo le vanaa ndɔa baalaa kpow.

Yamɛi kɔlkalui Salomɔn kelu-e

¹⁶ Paale pum, mí vanlaandua suundɛiya pum nda ŋiɔn a kɔa o masaa Salomɔn ndo, má kɔ sim ndu o hɔl.

¹⁷ Mí vanalanɔɔ pilɛ dimul masaa aa: «Masaa, naa cuaa ho n co cɛinin latulu ni, n lo naa ndu cɛinin, mí vialu hɔ́ɔ́ piaandoo.

¹⁸ Palɛi ŋiin o kon kɔɔli, mí ndu bɛɛ vialu hɔ́ɔ́ piaandoo. Kɛ naa ndu kpé n va cɛinin ni, vana celen ve naa ikɛi lon te.

¹⁹ Icɔllo pum, mó hini po ndɔɔ coo, mí poombɔɔ vu.

²⁰ A di-tɛɛndo, i va o lɔan, mó can, mó cua po nuu ya o ibuŋ, mó yambun ndu o ibuŋ. Mó cua po ndɔ vi-o, mó mingi ndu yambɔɔ ya ikɛi.

²¹ Yáà cɔnɔnndo idiiyo le po nuu vɔɛsio, mí ca ndu o vílɛ́iyo. Kɛ ɲɔɔ tengaa, mí mɛɛndian ndu ɲɛkɛndɛi, mí ca maa o co po ni ya velu-o le.»

²² Mí vanalanɔɔ pilɔɔ dimi aa: «Còòlan fúú! Po nuu kpeekpei co hoo ni, o nɔmndo vi ni.» Kɛ mí vanalanɔ tasoo dimi aa: «Còòlan! O co po ni le vi kon te, o nuu co hoo ni.» Lende nda va sɛɛngianndo masaa o hɔl ni.

²³ Mí masaa dimul nda aa: «Nɔm co dimio aa po nɔmndo co hoo ni, o ndɔɔ vi ni. Ndu bɛɛ co dimio aa po nɔmndo vi ni, o ndɔɔ co hoo yoomu ni.»

²⁴ Mí masaa dimul vannda aa: «La cuu vɔ ya mɔɛi cɔwve.» Má yoo ndu mɔɛi.

²⁵ Mó dimi aa: «La kiolu hɔ́ɔ́ co hoo yoomu-o tɛɛn kpali, mì la yɔngu vana pilɛ bungɛi ipilɛ, mì la yɔngu vanndo pilɔɔ bungɛi pilɛi.»

²⁶ Mí ɲííye bii cua velu cɛlɛkpɛ va kon yoomu-o-o, mí kɔllo ɲiiya ndu nin. Mó tɛɛlun masaa aa: «Te lende ni, mɛɛ a dii poombɔɔ le. À yɔngu cuaa ho ndu.» Kɛ mí cuaa pilɔɔ ndu dimi aa: «Ya i cɛl! La kiolu ndu tɛɛn. O kon, nɔm sɔlà lɛ ndu le, ya bɛɛ i sɔlà lɛ ndu le.»

²⁷ Mí masaa muli, mó dimi aa: «La dii ndu le. La yɔngu cua tasoo ho cɛlɛkpɔɔ ho. Ndu co kala ndɔ ni.»

²⁸ Mí Israɛlla kpow a tuɛi a yamɛi Salomɔn ndóò kelu ken-nde o kɔɔ. Mí vannda kpow a vo ndu taw, kani má sina maa kɔlkalu Hala-o va ndu nin le yaman kiolɔɔ o sandei nin.