1Masaa 22 - BII BILA

Akab del Aramiia coo a cɔwvo

¹ Mí vɔsilan tan yáá la hiaw o kon kɔɔli, cɔw tosan Aramiia nda Israɛlla tɛɛn te.

² Kɛ o vɔsi yàándɔɔ, mí Yosafat va masaa Yuda-o kɔa o Akab masaa Israɛl-lo.

³ Nduyɛ, Akab ndóò cii nin vanaa ndɔa baalaa dimul aa: «Vɛ̀ɛ̀ la co pá sina maa kobi naa Ramɔt co o tàndá Kalaad-o nin-ndo co ni? Kiisan yɛɛ nɛ naa n co yɛ niko le kɔlan ndu hiɔlɔɔ masaa Aram o ba?»

⁴ O kon mó ɲuna niko Yosafat aa: «Vɛ̀ɛ̀ a kɔanin ya cɔwvo mala Ramɔt co o tàndá Kalaad-o nin-ndo?» Mí Yosafat mulul ndu aa: «Oi, n siŋnunnin ɲɔɔ ndu pilɛ naa nɔm, vanaa nia baalaa a vanaa nɔmaa baalaa, soa nia a soa nɔmnda bɛɛ siŋnunnin ɲɔɔ ndu pilɛ.»

Vanaa-tɛɛngaa-diom Hala-a lacòòvaa dimi maa Akab nɔlanin yaamɔɔa

⁵ Mí Yosafat dimul masa Israɛlla aa: «Kɛ nɔm yɛ, ɲuna fɔlɔn Mɛlɛka.»

⁶ Mí masa Israɛlla cuungiaa vanaa-tɛɛngaa-diom Hala-a ndɔa, a va le n'van kɛmɛ lehiɔɔlu, mó ɲuna nda aa: «Vɛ̀ɛ̀ i bɛnda mì kɔ del Ramɔt co o tàndá Kalaad-o nin-ndo coo a cɔwvo baa i bɛnda mì kɔɛ le?» Má mulul ndu aa: «Kɔ, kani Mɛlɛka malnin kobi kon nɔm o ba.»

⁷ Kɛ mí Yosafat ɲuna aa: «Vɛ̀ɛ̀ vana-tɛɛngaa-diom Hala celen co nanu le Mɛlɛka ɲunaa le?»

⁸ Mí masa Israɛlla mulul ndu aa: «Vana-tɛɛngaa-diom Hala-o pum co nanu le Mɛlɛka ɲunaa, kɛ i yeema ndu le, kani o dimul-la sɔɔn kɛndɛ lɔ́ɔ́-lɔ́ɔ̀ le, fɔ sɔɔn vɔɔnndon kínɛí, Misee po Yimla-o pɛɛn.» Kɛ mí Yosafat deŋul ndu aa: «Masa suu nuaa le!»

⁹ Mí masa Israɛlla veelu vana bɛndoo o pilɛ, mó viam ndu aa: «Kɔ sisa, mà kɔ hun a Misee po Yimla-o.»

¹⁰ Masa Israɛlla nda Yosafat masaa Yuda va icali nda ŋiɔn kpow o kpɛŋɛla lemasala ndalan coo a volɔɔla lemasalan lekɔɔ, o falii va o dio luɛyaa kobio Samari-e hɔl-ndɔ, mí vanaa-tɛɛngaa-diom Hala-a kpow a va sɔɔn tosannin-ndon dimio nda o hɔl.

¹¹ Sedekia po Kenaana-o ndóò toosiaa leela n'cilinndan, mó dimi aa: «Mɛlɛka dimi maa a leelan ndan n kuindikuindinin vanaa cɔvaa Aramiia ni háá ma cii nda diw.»

¹² O kon, mí vanaa-tɛɛngaa-diom Hala-a tɔ̀a kpow cɛl diom pilɛ kon, má dimi aa: «Kɔ cɔlɔba Ramɔt co o tàndá Kalaad-o nin-ndo, Mɛlɛka malnin kobi kon nɔm o ba, mà nɔla ndu.»

Misee tɛɛnguu diom Hala-o

¹³ Mí kiilanɔ kɔɛ Misee veeloo-o dimul ndu Misee aa: «Vanaa-tɛɛngaa-diom Hala-a kpow a cɛlan le masaa sɔɔn kɛndɔn tɛɛngullo aa o nɔlanin cɔwvo. Lelan, nɔm bɛɛ kɔ ma kɔ dimul ndu diomnda kɛndɛlan maa nda.»

¹⁴ Kɛ mí Misee muli aa: «Te Mɛlɛka co yoomu, i tɛɛngulnin ndu ɲɛ Mɛlɛka dimulnin ya-o!»

¹⁵ Mɛɛ Misee tiiya o masaa Akab lo, mí masaa ɲuna ndu aa: «Misee, vɛ̀ɛ̀ n bɛnda mì n kɔ del Ramɔt co o tàndá Kalaad-o nin-ndo coo a cɔwvo baa n bɛnda mì n kɔɛ le?» Mí Misee mulul ndu aa: «La kɔ, la nɔlanin. Kani Mɛlɛka malnin kobi kon nɔm o ba.»

¹⁶ Kɛ mí masaa cɔɔlu ndu ɲuna aa: «Vɛ̀ɛ̀ kpɛ́ ya viom yɛ nɔm mɛnanndo le ya toɲaa dimullo o diola Mɛlɛka lan?»

¹⁷ O kon, mí Misee mulul ndu aa: «I ce Israɛlla kpow a sɛŋiannda o pembon coo maa saa nɔ vana mandaa le-a. Nduyɛ Mɛlɛka dimi aa: ‹Vannda ha nɔ lɛ simlacinɔ le, lelan, vana-vana muungun o ndu lo a kɔlɲuloo.›»

¹⁸ O kon mí masa Israɛlla dimul Yosafat aa: «Vɛ̀ɛ̀ i dimul nɔm te? O dimul-la sɔɛi kɛndɛ lɔ́ɔ́-lɔ́ɔ̀ le, fɔ sɔɔn vɔɔnndon.»

¹⁹ Mí Misee dimi vɛlɛ aa: «Tuei-yɔ niko diom Mɛlɛka dimi-o. A toɲa, i ce Mɛlɛka icali o kpɛŋɛ ndɔ lemasaa nin o halataala, vanaa ndɔa baalaa va isisi ndu ikɛi, a va a balaa sɔ́ o ba kɛndɔɔ coo a o ba mɛllo coo.

²⁰ Mí Mɛlɛka ɲuna aa: ‹Nɛ̀ɛ́-nɛ̀ tiw yɛnin ba Akab dɛɛniaa, haliko mo kuel Ramɔt co o tàndá Kalaad-o nin-ndo a cɔwvo, mò kɔ vu lon?› Kɛ mí vana-vana muli muli ndɔ.

²¹ O kon mì yiyanndo pum fula, mó sim Mɛlɛka o hɔl, mó dimi aa: ‹Ya dɛɛniaanin ndu ni.› Kɛ mí Mɛlɛka ɲuna yiyan kon aa: ‹Vɛ̀ɛ̀ n tosa yɛnin?›

²² Mí yiyan kalaa muli aa: ‹I co lakɔ, mì kɔ siŋnun yiyan lacòòvaa, mì còòlan la luɛi vanaa-tɛɛngaa-diom Hala-a masaa kpow o lasondo.› O kon, mí Mɛlɛka mulul ndu aa: ‹Mɛɛ a nɔlanin ndu dɛɛniaa lekɛ́ndɛi, fula ma kɔɛ, mà kɔ tosa mɛɛ n dimi nuaa yɛ.›

²³ Lelan Mɛlɛka luei yiyan lacòòvaa vanaa-tɛɛngaa-diom Hala-a nɔmnda kpow nin nuaa ni. Kani o cii nin kiolɔɔ le nɔm dɛnɛ palaa tuisio coo.»

²⁴ Fɔ́ɔ́fɔ̀, mí Sedekia po Kenaana-o sɔɔnguu, mó lɔaa Misee kpaŋnde, mó ɲuna aa: «Vɛ̀ɛ̀ kɔl Mɛlɛka-o looku yɛ fulaa ya nin le kɔlan nɔm sɔɔn mun dimullo?»

²⁵ Mí Misee mulul ndu aa: «A biinin sɔɔn mun bila telen n vanin vinivininndo o cɛilan nin-ndo.»

²⁶ Mí masa Israɛlla dimul buɛi ndɔɔ pum aa: «Bii Misee, ma kɔɛ a ndu o Amon simlacinɔ kobio lo a o Yoas po masaa lo,

²⁷ ma kɔ dimul nda aa ya laa a mal ndu o kaasoo, mà va ndu baloo dɔvɔɔ a buloo a á mɛnndan daama. A vá tosaa lende háá telen ya fulanin o cɔwvo mì muungu nanu kɛndia a kɔlɲuloo-o.»

²⁸ Mí Misee mɛnalan ndu aa: «Taa muungu nanu kɛndia a á kɔlɲuloo pɛ few, mɛɛ o co Mɛlɛka le vem ya nɔm sɔɔn mun tɛɛngullo le!» Mó dimul vɛlɛ vannda aa: «Niaa vannda súúlan kpow, la yaŋnun.»

Masaa Akab sɔla piɔ́mndo o cɔwvo

²⁹ O kon mí masa Israɛlla nda Yosafat masaa Yuda a can le kɔlan Ramɔt va o tàndá Kalaad-o nin-ndo delɔɔ coo a cɔwvo.

³⁰ Mí masa Israɛlla dimul Yosafat aa: «I co kaandian mì ven hɔlla, mì kɔɛ le cɔwvo. Kɛ nɔm nɔm, cuɛinun volɔɔla nɔmnda lemasalan.» Mí masa Israɛlla kaandian le kɔlan o cɔwvo.

³¹ Kɛ nduyɛ, masaa Aram ndóò cii nin simlacia vanaa ɲaanun ɲɛla ɲaanannda ndɔla soa nan-ndan-nda n'van beleyaa a vanaa ŋiɔn dimul aa: «Niaa niaa cɔlɔba vanaa cɔvaa Israɛlla le, la cɔlɔba vɛlɛ simlacinɔ vanaa ndaa cɔwva le, kɛ la cɔlɔba masa Israɛlla kínɛí.»

³² Lelan, telen simlacia vanaa cɔvaa ɲaanun a ɲɛla ɲaanannda soa nan-ndan-nda ce Yosafat-o, má dimi aa: «A toɲa masa Israɛlla co hoo ni.» Ma kuel ndu. Kɛ mí Yosafat mɛli yeelan.

³³ Mí simlacia vanaa ɲaanun a ɲɛla ɲaanannda soa nan-ndan-nda sina maa o co masa Israɛlla le. Má faŋan ndu kɔɔli, má kɔannun.

³⁴ Kɛ langbanɔɔ pum vuuo kpaasiaa ndɔɔ o vana sinan dɛnɛ loo nin, mí kɔɛi kɔ bii masa Israɛlla o pɛngɛn doma cɔw va ndu lekɔɔ-o-on tɛɛn. Mí masa kalaa dimul vana va kɔlan a ɲɛ ɲaanan ndɔ soa nan-ndo-o aa: «Mulin, ma faŋa ya o cɔwvo ho nin nanu, a yɔŋul-la bɔɔ!»

³⁵ Kɛ le tùú cɔwvo ndóò kendu paale len taw-vo, má mɛi masa Israɛlla ɲinkon kpɛŋ o ɲɛ ɲaanan ndɔ soa nan-ndo nin le cɔwvo nda Aramiia, icɔllo, mó vu. Mí kooma bolin ndɔɔ ma va tolɔɔ o ɲɛ ɲaanan kon nin di.

³⁶ Paalen delɔɔ, má yonda aa: «Vana-vana muungu o kobi ndɔ nin, o lɛŋnde ndɔlen nin!»

³⁷ Nuaa masaa Akab sɔla piɔ́mndo ni, má mingi ndu Samari. Lon nda kɔ kumbu ndu ni.

³⁸ Tuma nda va ɲɛ ɲaanan soa nan-ndo tɔɔ o dalaa Samari nin-ndo, mí tunnda va kooma Akab-an deembuuo, mí vanlaandua suundɛiya va pulɔnndo o dala kon nin, maa mɛɛ Mɛlɛka pila ndóò dimi yɛ.

³⁹ Sɔɔn tɔ̀un Akab-on, dɛnnda ndóò tosa lan kpow, cɛi lemasa ndóò tangul a ciŋun kamaa-o a kobila ndóò tangul tan kpow, sɔɔn mún co n'sɛvan o sɛbɛ Dɛnnda lemasalan Israɛl nin.

⁴⁰ Akab vuo, má kumbu ndu o fonda ndáà kumbu fuɲaa ndɔa mamaa-o. Mí Ahasia po ndɔ koma sul masaa o fonda ndɔɔ.

Masale Yosafat len o tàndá Yuda-o coo

⁴¹ O vɔsi hiɔɔlundɔɔ nin, o masale Akab masaa Israɛl-ten bɛngu, mí Yosafat po Asa-o siŋnun masaa o tàndá Yuda-o coo.

⁴² Yosafat ndóò nɔ vɔsilan beleyaa a laŋuɛɛnu, mó siŋnun masaa. Mó tosa masalen vɔsilan bidiin a laŋuɛɛnu Yerusalɛm. Asuba kala ndɔ ndóò nɔ diolan ni, cua Silhi-o o va ni.

⁴³ Mó kela mɛɛ Asa fuɲa ndɔ kela yɛ, o faŋan o nɛila fuɲa ndɔ lan coo le, mó va ɲɛ co sakpo Mɛlɛka o hɔl-lo tosaa.

⁴⁴ Kɛ o faŋa tombun soolan te. Vannda va hiovɔɔ laci a sálàlan solio a á cuɛima cun kɛndɛan lomɔɔ o tombun mun.

⁴⁵ Mí Yosafat luei kɔlɲuloo ndu pila a masa Israɛlla tɛɛn.

⁴⁶ Sɔɔn tɔ̀un masaa Yosafat-on, dɛnnda tɔɔla o tosa lan a cɔwla o nɔla lan kpow la co lasɛvaa o sɛbɛ Dɛnnda lemasalan Yuda nin.

⁴⁷ Mó cii vanaa va suunda bilaa n'piɔmndo-a o lɛŋnden nin, áà lo o lɛŋnden nin telen Asa fuɲa ndɔ va masaa-o-a pɛɛn.

⁴⁸ Tuma kon, masa ve o lɛŋnde Edɔm-nden nin te, masa ibunga masa bɛndu va Yuda-o ndóò suili-o daama va lon ni.

⁴⁹ Mí Yosafat toosiaa dɛ̀ndɛ̀la mamɛnndan Tarsis le kɔlan sianion nuwviaa Ofir, kɛ o nɔla kɔlan te, kani mí dɛ̀ndɛ̀la lan la yomiyomi Ɛsiɔn-Kebɛr.

⁵⁰ O kon mí Ahasia po Akab-o dimul Yosafat aa: «Mɛɛ buɛyaa nɔmnda kɔ latulu a buɛyaa nia o dɛ̀ndɛ̀la bɛndula mamɛnndan nin.» Kɛ Yosafat cɛl te.

⁵¹ Mɛɛ Yosafat masaa Yuda dem fuɲaa ndɔa ciee-piɔ́m, má kumbu ndu o sɛila fuɲaa ndɔa mamaa nin, o Kobi David fuɲa ndɔ bɛndu-o nin. Mí Yoram po ndɔ koma sul masaa o fonda ndɔɔ.

Ahasia siŋnun masaa Israɛlla coo

⁵² O vɔsi tɔ́ a o ŋɔmmɛwndɔɔ nin o masale Yosafat masaa Yuda len bɛngu, mí Ahasia po Akab-o siŋnun masaa Israɛl o kobio Samari nin. Mó tosa masalen vɔsilan tan tiɔn Israɛlla coo.

⁵³ Kɛ mó tosa ɲɛ hɛnan Mɛlɛka loo, mó kela o nɛila fuɲa ndɔlan, o nɛila kala ndɔlan a o nɛila masaa Yeroboam po Nebat-o kela coo lan coo, Yeroboam luei Israɛlla o pɔwlan nin-ndo pɛɛn.

⁵⁴ Mó baŋ vulan piɔmndo Baal o labɛngunin le ndu sooloo, mó tɛɛmbuu Mɛlɛka, o co Hala Israɛlla-o kɔl taw mɛɛ fuɲa ndɔ tosa yɛ.