1Masaa 2 - BII BILA

Silala mɛɛlaala David yɔngu Salomɔn po ndɔ lan

¹ Mɛɛ David sina maa piɔ́m ndɔɔ tiiya, mó sila Salomɔn po ndɔ, mó dimul ndu aa:

² «I co hunɔɔ nɛi caanda kpow diam-ndo diomɔɔ. Lelan, luei yoomuan mà tosa vanapɔnɔyɛi.

³ Bii diom Mɛlɛka Hala nɔmndo, mà kela o nɛila ndɔlan coo. Bii tɔŋnda ndɔlan a silala ndɔlan, mà kela o pɛɛkula ndɔlan coo mɛɛ o co o sɛvaa o tɔŋ Moise-o nin yɛ, haliko mi tuula nɔmndan kpow la bɛnda nɔm o ba, mì dɛnnda nɔmndan la biinun bila.

⁴ O kon Mɛlɛka peelunin sɔɛi o dimul-la-e aa: ‹Te cuavaa nɔmnda caa pɛ kelaa, taa kela pɛ ya o hɔl o sandei nin a kɔlta ndalan a á yiyannda ndalan kpow, le fɛɛn a fɛɛn, nɔm David, a folanin vana calnin o kpɛŋɛ lemasaa coo mò tosa masalen nɔm kɔɔli-o le.›

⁵ Handɔɔ o kon coo, nɔm Salomɔn, a sina ɲɛ Yoab, po Seruya-o tosal-la-o, ndu dii simlacia ŋiɔŋaa vanaa cɔvaa Israɛlla ni, Abnɛr po Nɛr-o nda Amasa po Yetɛr-o pɛɛn. Telen kɔlɲuloo va-o ndu kɔ mal kpundɛ cɔw kon ni, mó suinun kooma man o yáwle va ndu o caŋ-nden a o samtala va ndu o n'pelu lan.

⁶ Lelan, mɛi ndu yoomu mò yuuva háá mò vi a ba ndɔ le. Kɛ yɔŋnun vana taasi o dɛnɛ kon nin dɛ!

⁷ Pɔɛɛnun le poaa Barsilai fula Kalaad-o-a kɛndɛi mingullo le, cɛl nda mà va ɲɛdiaa nɔmndo dioo. Kani lende koni nda bɛɛ mala ya telen ya va Absalɔm puapilɛ nɔm ɲaanɔnndo-o ni.

⁸ A ce Simei po Kera fula Bahurim o polale Bɛnyamɛn-nden nin-ndo, pɔɛɛn a ndu le, kani ndu dimul-la diomnda vɔɔnndan, mó mɛɛniaa ya paale ya va ɲaanɔnndo le kɔlan Mahanaim-nden ni. Kɛ lɔ́ɔ́ ya bii nɛiyo le muungoo-o, mó toal Yurdɛn le ya bɔŋaa. Mí yiilu ndu kpemaa o diola Mɛlɛka lan, mí dimul ndu aa: ‹I diinin nɔm a mɔɛi cɔw le.›

⁹ Lelan, vana kɔlkaloo n co ni, mal ndu haki le, a sina mɛɛ n bɛnda le ndu biyɔɔ yɛ. A yuuvɛi ndɔɛi ken kpede, dii ndu.»

David vi mí Salomɔn po ndɔɔ muungu o fonda ndɔɔ

¹⁰ Mí David diam fuɲaa ndɔa ciee-piɔ́m, má kumbu ndu o Kobi David-o nin.

¹¹ Vɔsilan belehiɔɔlu David tosa masalen Israɛlla coo ni. O tosa masalen Hebrɔn vɔsilan tan ŋɔmmɛw, mó tosa vɛlɛ masalen Yerusalɛm vɔsilan beleyaa a layàá.

¹² Mí Salomɔn siŋnun masaa o fonda David fuɲa ndɔ-o, mí masale ndɔlen le koma sim yili.

Salomɔn vem Benaya mó kɔ dii Adoniya

¹³ Paale pum, mí Adoniya po Hakit-o komal Bat-Seba kalaa Salomɔn, mí Bat-Seba ɲuna ndu aa: «Vɛ ya komallo ho nuaa? Vɛ̀ɛ̀ sɔɛi kɔlɲuluei n hin ni?» Mó mulul ndu aa: «Oi, sɔɛi kɔlɲuluei ni.»

¹⁴ Mó dimi aa: «I yeema mì dimul nɔm isɔɔ.» Mí Bat-Seba mulul ndu aa: «Ava, mɛɛ soo.»

¹⁵ Mó dimul ndu aa: «A sina maa ya ndáà bɛnda le masalen yɔngoo ni, Israɛlla kpow a va nin cumndo mì yáà siŋnun masaa. Kɛ mí masale kalalen le hialun ya, mí le kɔa o Salomɔn pɔmbɔ ni lo. Nduyɛ, Mɛlɛka ke ndu masalen nden ni.

¹⁶ Lelan sisa, i co nɔm isɔɔ ɲuna, kɛɛ ndi le yandi.» Mí Bat-Seba cɛl aa: «Ava, mɛɛ soo.»

¹⁷ Mí Adoniya dimi aa: «I laalan maa masaa Salomɔn kɛɛnin nɔm diom tueyɔɔ le. Lelan yandi, kɔ dimul-la ndu mò ke ya Abisak fula Sunɛm-ndo, mò siŋnun laa nuu.»

¹⁸ Mí Bat-Seba mulul ndu aa: «I tuei, ya pila co lakɔ masaa sɔɛi nɔmnde tiiyal.»

¹⁹ Mí Bat-Seba kɔa o Salomɔn ndo le ndu diom Adoniya sɔɔ ndu o sondo-o tiiyallo. Masaa cɔu dɔ́ɔ́ kala ndɔ, mó can isisi ɲaali, mó kɔa ndu bɔŋa, mó baŋ vulan ndu o labɛngunin, o kon kɔɔli mó muungu, mó kɔ cal o kpɛŋɛ ndɔ lemasaa coo. Má cuu kala ndɔ kon kpɛŋɛ lemasa celen, má kɛsi ndu po ndɔɔ o ba kɛndɔɔ coo, mó cal lenin.

²⁰ Mí Bat-Seba dimul Salomɔn aa: «I nɔ sɔɛi pɔmbɔ le nɔm dimullo, kɛ kɛɛ ndi le dɛ!» Mí masaa Salomɔn mulul ndu aa: «Nde, dimi sɔɛi n nɔ o kɔl-le, i kɛɛnin te.»

²¹ Mí Bat-Seba dimi aa: «I yeema ma ke Adoniya bɛ nɔm Abisak fula Sunɛm-ndo, mò va laa ndɔ.»

²² Salomɔn tueyɔɔ sɔɛi ken, mó mulul kala ndɔ aa: «Abisak fula Sumɛn-ndo kínɛí n yeema le Adoniya yɔngoo ni? Nɔm óò downùn niko ndu masale tɔ̀len, kani ndu cuu ya o kɔɔ ni. Downun ndu masalen nda vanaa co ndu kɔɔli-a, Abiatar vana-solia-lasálàá nda Yoab po Seruya-o pɛɛn!»

²³ O kon mí Salomɔn mɛnan Mɛlɛka o hɔl aa: «Te Adoniya sɔla piɔ́mndo le sɔɛi o dimi hee-e le few, mɛɛ Hala tuisí sanga hiow sangalan kpow-vo ya coo!

²⁴ Te Mɛlɛka lueí ya yoomuan, mó kɛsi ya o kpɛŋɛ lemasa David fuɲa ni-o coo-o co yoomu, Mɛlɛka yiilúl-la hoo kpemaa le ya pila a le polale nilen masalen yɔngoo-o pɛɛn, paalen nden hau, fɔ mì Adoniya sɔla piɔ́mndo!»

²⁵ Mí Salomɔn viam Benaya po Yehoyada-o, mó kɔ dii Adoniya.

Salomɔn tow Abiatar mó faŋa ndu Yerusalɛm

²⁶ O kon kɔɔli, mí masaa Salomɔn dimul Abiatar vana-solia-lasálàá aa: «Kɔnnun Anatɔt o nɔm ndo, kani nɔm óò bɛnda mì nɔm óò sɔla hau piɔ́mndo. Kɛ i co nɔm diyɔɔ le, bau telen David fuɲa ni va masaa-o, má kɔa a kesu kpema Maalii-o, o co Mɛlɛka-o ndu o hɔl, má sanga vɛlɛ fuɲa nuu kɔɔli o sangala kei ndu coo lan kpow nin.»

²⁷ Mí Salomɔn soli Abiatar o baala solia lasálà Mɛlɛka-o nin. Nuaa sɔɛi Mɛlɛka ndóò dimi Silo le polale Helii, bolle vanaa-solia-lasálàá-e i peelun ni.

Salomɔn dii Yoab

²⁸ Mɛɛ Yoab tuei dɛnɛ yɔŋnun Adoniya nda Abiatar-o, mó sɔndan, mó kɔa o cɛi-kola-toandaa Mɛlɛka-o nin, mó kɔ bii kpɛ̀ɛ́n fonda-loamaa-lasálàá. Kani ndóò sim Adoniya kɔɔli ni, kɛ óò sim Absalɔm kɔɔli le.

²⁹ Mí vanndo dimul masaa Salomɔn aa: «Yoab ɲaanun o cɛi-kola-toandaa Mɛlɛka-o nin, o co o viannanndo o fonda-loamaa-lasálàá ikɛi!» Mí Salomɔn dimul Benaya po Yehoyada-o aa: «Kɔ dii ndu!»

³⁰ Benaya tiiyaa o cɛi-kola-toandaa Mɛlɛka-o, mó dimul Yoab aa: «Masaa dimi aa nɔm fula.» Kɛ mí Yoab mulul ndu aa: «Ɛ-ɛ, nanu ya co vu ni.» Benaya muungoo, mó kɔ downun masaa kona mɛɛ Yoab mulul ndu yɛ.

³¹ Mí masaa dimul ndu aa: «Mɛɛ kɔ tosa mɛɛ ndu pila dimi yɛ, kɔ dii ndu mà kumbu ndu, haliko mi n sɔla hakio malɔɔ naa polale fuɲa nuu le vanaa ŋiɔŋaa Yoab kon dii haa fondo fúú-a:

³² Abnɛr po Nɛr va simlacinɔ vanaa cɔwva Israɛl-lo a Amasa po Yetɛr va simlacinɔ vanaa cɔwva Yuda-o pɛɛn. Vanaa ŋiɔŋaa kan ndáà hiow ndu sandei, ndáà va vɛlɛ fisa a ndu ni. Kɛ mó diw nda, fuɲa nuu sina le. Lelan Mɛlɛka co ndu pila màá kon mingi coo.

³³ Màá Mɛlɛka tuisi Yoab nda polale ndɔlen sangaa coo le lɔ́ɔ́-lɔ́ɔ̀. Kɛ màá o ke David pila, polale ndɔlen ndu kɔɔli, cuavaa tosanin masalen ndu kɔɔli-a a masale ndɔlen kɔlɲuloo le fɛɛn a fɛɛn!»

³⁴ O kon mí Benaya po Yehoyada-o muungu nɛɛ Yoab va-a, mó kɔ cuku ndu, mó dii ndu. Má kumbu ndu o ndu lo bɛɛ, o lɛŋnde veselɛilen nin.

³⁵ O kon kɔɔli, mí masaa Salomɔn handu Benaya po Yehoyada-o simlacinɔ vanaa cɔwva o fonda Yoab-o, mó mingi vɛlɛ Sadɔk vana-solia-lasálàá o fonda Abiatar-o.

Salomɔn dii Simei

³⁶ Mí Salomɔn viam vanndo le Simei veeloo, mó dimul ndu aa: «Baŋ cɛiyo Yerusalɛm mà cal lon. A bɛnda ma faŋan Yerusalɛm ma kɔɛ nɛɛ-nɛɛ le.»

³⁷ Sina pɛngu maa paale n faŋannin ciee nanu mà taŋ pee pɔmbɔɔ Sedrɔn-nden, a co vu ɲinkon. A vi yɛ pɛ mɛɛ nɔm pila nuwviaa piɔ́m kon ni.

³⁸ Mí Simei mulul masaa aa: «Ava, mɛɛ i tuei, i co tosa mɛɛ masaa nuu dimi yɛ.» Mí Simei cal Yerusalɛm le telen vilɛi.

³⁹ Kɛ vɔsilan tan yáá o kon kɔɔli, mí buɛyaa Simei-ya nda ŋiɔn a sɔndan, má kɔannun o Akis po Maaka va masaa o kobio Kat nin-ndo lo. Mí vanndo dimul Simei aa: «Buɛyaa nɔmnda co Kat.»

⁴⁰ Mɛɛ Simei tuei sɔɛi ken, mó toosiaa sofɛlɛ ndɔɔ le kɔlan buɛyaa ndɔa nuwviaa Kat o Akis lo. Mó kɔa Kat, mó kɔ bii nda, mó muungu a nda Yerusalɛm.

⁴¹ Má kɔ dimul Salomɔn maa Semei ndóò faŋan Yerusalɛm mí ndóò kɔa Kat, kɛ maa o muungu Yerusalɛm.

⁴² O kon mí masaa Salomɔn viam vanndo le Semei veeloo. Mó dimul ndu aa: «A sina maa mí yáà mɛnalan nɔm o diola Mɛlɛka lan maa paale n faŋannin Yerusalɛm mà kɔɛ nɛɛ celen-nden, a co ɲinkon piɔ́mndo sɔla. Mí nɔm pila mulul-la aa: ‹Ava, i tuei, o bɛnda.›

⁴³ Le yɛɛ nɛ n tɛɛmbuu yɛ niko mɛnan n mɛnan Mɛlɛka o hɔl-lo, má kɛɛ diom yáà dimul nɔm-ndo biyɔɔ?»

⁴⁴ O kon mí masaa dimul ndu vɛlɛ aa: «Nɔm pila sina dɛnɛ vɔɔn n tosal David fuɲa ni-o, kɔl nɔmndo co lesei. Lelan Mɛlɛka co nɔm màá kon mingul.

⁴⁵ Kɛ ya Salomɔn, Mɛlɛka dɔawnin ya duaa. O siminin masalen yili o David lo cɛinin le fɛɛn a fɛɛn.»

⁴⁶ Mí masaa viam Benaya po Yehoyada-o, mó fula, mó kɔ dii Simei. Kandɔɔ yɛ nin telen kon, mí masalen le sim Salomɔn o ba yili.