1Masaa 19 - BII BILA

Elii fula yoomuan mó kɔannun Horɛb

¹ Mí Akab downun Yesabɛl laa ndɔ kona a dɛnnda Elii tosa lan kpow o kɔɔ, a mɛɛ o diw vɛlɛ vanaa-tɛɛngaa-diom Baal-la lon kpede a mɔɛi cɔwve yɛ.

² O kon, mí Yesabɛl yoo ndu kiilaa le ndu kɔlan dimullo aa: «A telenndo ho siɔdii, te i dii nɔm mɛɛ n diw vanaa-tɛɛngaa diom Baal-la nuaa yɛ le few, mɛɛ halaa tuisí ya sanga hiow sangalan kpow-vo coo!»

³ Elii cɔu lende, mó can, mó kɔannun le yoomu ndɔɔ ciindiaa. Mó kɔa Bɛɛr-Seba, o tàndá Yuda-o nin, mó kɔ mɛi buɛi ndɔɔ lon,

⁴ mí ndu pila niinu kɔlan kpɛŋ o lɛŋnde veselɛilen nin, mó kɔ cal o yɔmndo pum bɛngu, mó yeema piɔ́mndo, mó dimi aa: «Hee ndi hiow bɔɔ ba, Mɛlɛka! Lelan cua yoomu nuu, kani i co fisa a fuɲaa nia le.»

⁵ O kon kɔɔli, mó hinin o yɔm kon bɛngu, mó lɔl. Mí mɛlɛkanɔɔ pum pilan ndu, mó dimul ndu aa: «Cɔn ma de ɲɛdiaa!»

⁶ Ndóò tiondɔɔ, mó ca dɛɛ toaŋaa o powta tuwlan coo a bonyii mamɛnnde ndu o bollen coo. Mó dia, mó kol. O kon kɔɔli, mó muungun vɛlɛ ihini.

⁷ Kɛ mí mɛlɛkanɔ Hala-o pilan ndu vɛlɛ, mó dimul ndu aa: «Cɔn ma de ɲɛdiaa. Kani tiŋndo bandu vɔ nɔm laci dɛ!»

⁸ Mí Elii can, mó dia ɲɛdiaa, mó kol. Mí ɲɛdiaa kon luei ndu yoomuan, mó kɔa palɛi belehiɔɔlu a malɔ belehiɔɔlu, mó lo kɔlan háá mó tiiyaa o pembii Hala-e, pembei Horɛb pɛɛn.

Hala luei vɛlɛ Elii yoomuan

⁹ Elii ndóò tiiyaa Horɛb lon, mó luɛi o buululan nin, mó lɔl lon. Icɔl kon, mí Mɛlɛka soaa o ndu lo, mó ɲuna ndu aa: «Elii! Yɛɛ nɛ n hin yɛ tosa nanu?»

¹⁰ Mó muli aa: «Kaola paŋalaa bɛndoo ya kaola Mɛlɛka ni, Hala-Nɔ-Kpaayaa-Kpow-vo pɛɛn, kani Israɛlla tɛɛmbuu kpema nɔmndo, a pesipesi fondala-loamaa-lasálàla nɔmndan, má diw vanaa-tɛɛngaa-diom Hala-a nɔmnda a mɔɛi cɔwve, ya pilɛ kpé lo yoomu ni. Ya bɛɛ, a co nɛilan nuwviaa le ya diyɔɔ.»

¹¹ O kon mí Mɛlɛka dimul ndu aa: «Fula ma kɔ sim ya o hɔl o pembei coo.» Nduyɛ Mɛlɛka va hiovɔɔ. Fɔ́ɔ́fɔ̀, mí hoeyii fùkù-fùkùei can hɔŋndo, mí pembon a powta kpovalan la va piɔsio Mɛlɛka laci. Kɛ Mɛlɛka ve o hoeyii ken nin te. O kon kɔɔli, mí lɛŋnden le ɲiiya, kɛ Mɛlɛka ve o lɛŋnde ɲiiyaale len nin te.

¹² Tuma lɛŋnden le pɛngi ɲiiyaa-o, mí yinnden le fula, kɛ Mɛlɛka ve vɛlɛ o yinnde len nin te. Yinnden hiovɔɔ, mí ɲɔɔ mei kpili-kpili, mí diom fɛ́ɛ́-fɛ́ɛ́o pum tuɛinun.

¹³ Elii tueyɔɔ dɔ́ɔ́ diom kon, mó kuumbun doma ndɔ bɛndoo o hɔl, mó fula, mó sim o buululan sondoo. Mó tuɛi diomndo pum aa: «Elii! Yɛɛ nɛ n hin yɛ tosa nanu?»

¹⁴ Mó muli aa: «Kaola paŋalaa bɛndoo ya kaola Mɛlɛka ni, Hala-Nɔ-Kpaayaa-Kpow-vo pɛɛn, kani Israɛlla tɛɛmbuu kpema nɔmndo, a pesipesi fondala-loamaa-lasálàla nɔmndan, má diw vanaa-tɛɛngaa-diom Hala-a nɔmnda a mɔɛi cɔwve, ya pilɛ kpé lo yoomu ni. Ya bɛɛ, a co nɛilan nuwviaa le ya diyɔɔ.»

¹⁵ Mí Mɛlɛka dimul ndu aa: «Muungu, kei o nɛi n hin coo-o, o kei o lɛŋnde veselɛilen nin-ndo, ma kɔɛ Damas. A tiiya pɛ lon, a pɔla Hasaɛl, ò siŋnun masaa o lɛŋnde Aram-nden coo.

¹⁶ O ndu kɔɔli, à pɔla Yehu po Nimsi-o, mì ndu siŋnun masaa Israɛlla coo, mà pɔla vɛlɛ Elise po Safat-o, po imama Abɛl-Mehola-o, mì ndu siŋnun vana-tɛɛngaa-diom Hala-o o fonda nɔmndo.

¹⁷ O kon, vana-vana hɛlun pɛ mɔɛi cɔvii Hasaɛl-le, Yehu kɔ dii vana kon, vana-vana hɛlun pɛ mɔɛi cɔvii Yehu-e, Elise kɔ dii vana kon.

¹⁸ Kɛ o Israɛlla tɛɛn, i mɛinin vannda vàálan tan ŋɔmmɛw yoomu, vanaa beŋ vulan Baal o labɛngunin te-a, vanaa kɔɔmian Baal má deembuu ndu a lasondo le-a.»

Elise siŋnun vana-tɛɛngaa-diom Hala-o o fonda Elii-o

¹⁹ Mí Elii faŋan o fonda kon, mó komal Elise po Safat-o. O va vàá a nawva a ŋiɔn-ŋiɔnda kundalan tɔ́ a latiɔn. Ndu pila va vàá a kunda tɔ́ a o diinndɔɔ ni. Mí Elii sɔɔnguu ndu ikɛi, mó vuu ndu doma ndɔ bɛndoo coo.

²⁰ O kon, mí Elise mɛi navaa ndɔa kan ndon, mó ɲaanun Elii kɔɔli, mó dimul ndu aa: «Mɛi-yɔ i kɔ kɔman fɔlɔn Pua nda Nde, mì congun nda. I cii pɛ i del niko nɔm kɔɔli.» Kɛ mí Elii mulul ndu aa: «Ɛ̀ɛ̀ muungun sei! Mo va maa isɔɔ ya vem nɔm tosa ni?.»

²¹ Elise sɛyanndo nda Elii, mó kɔ bii navaa ndɔa váà kan nda ŋiɔn, mó soli nda sálàá, mó tuɛi visin ndan o yɔmii ndáà baa nda o lebol-le coo, mó yɔngu mun vanaa va lon-nda, má dia. O kon kɔɔli, mó del Elii kɔɔli, mó siŋnun vana baalaa ndɔɔ.