1Masaa 17 - BII BILA

Elii vana-tɛɛngaa-diom Hala-o dimi maa valo kàlà-kálàá co hunɔɔ tiiya

¹ Mí Elii fula Tisbe o tàndá Kalaad-o nin-ndo dimul masaa Akab aa: «Le Mɛlɛka yoomaa, Hala Israɛlla pɛɛn, o ya co baalaa tosallo-o, i dimul-lɔ niaa maa o vɔsila co lan hunɔɔ lan bɛngu kpede, piɔɔ venin sia le, kɛmma venin cɛɛluu le. Fɔ mì piɛi ndu malan piɔɔ sia, te kon te malan kɛmndan ma cɛɛluu.»

² O kon mí Mɛlɛka dimul Elii aa:

³ «Faŋan nanu, mà kɔɛnnun a ba paalen le can-ndo, mà kɔ vionnun o pee pɔmbɔɔ Kerit kɔngɔ, o co hoo Yurdɛn a ba paalen le can-ndo-o pɛɛn.

⁴ Mɛmma pee pɔmbɔ kon n vanin kolɔɔ ni, i dimulnin basabasakoendea ma va nɔm baloo yoo lon.»

⁵ O kon, mí Elii tosa mɛɛ Mɛlɛka dimul ndu yɛ, mó can, mó kɔ cal o pee pɔmbɔɔ Kerit kɔngɔ.

⁶ Idii oo dii, basabasakoendea va ndu buloo a vision yoo, icɔl oo icɔl, a va ndu buloo a vision yoo lon. Mɛmma pee kon o va kolɔɔ ni.

Elii kɔɛ Sarɛpta

⁷ Kɛ le tùú piɔɔ ve sia o lɛŋnde len nin too, telen bingi hiovɔɔ, mí pee kalaa vela sɛ́ɛ́n.

⁸ Le hee, mí Mɛlɛka dimul Elii aa:

⁹ «Cɔn ma kɔɛ Sarɛpta, o lɛŋnde Sidɔn-nden nin, mà kɔ cal lon. I dimul vanalanɔ pɔnɔ ndɔ vi-o pum o ciee kon nin, mò kɔ va nɔm baloo dɔvɔɔ.»

¹⁰ Mí Elii bii nɛiyo le kɔlan Sarɛpta. Ndóò tiiyaa ciee-lekɔɔ, mó ca vanalanɔ pɔnɔ ndɔ vi-o pum yɔmnde tingɔɔ. Mí Elii veelu ndu, mó dimul ndu aa: «Kɔ kondul-la mɛnndan ɲɛ-pɔmbɔ o fɛngɔɔ niŋ, mì kol.»

¹¹ Tuma cuaa va kɔlan mɛnndan kɔndɔɔ-o, mí Elii koma veelu vɛlɛ ndu, mó dimul ndu aa: «Ma cuu ya vɛlɛ buloo ɲɛ-pɔmbɔ.»

¹² Kɛ mí cua kalaa mɛnalan ndu po aa: «Le Mɛlɛka Hala nɔm co hoo yoomu-o, i nɔ bulu loamaa nanu le. Kpeyanndo baa ca daama ya nɔ nihau o bonyei nin ni a cuɛiyan ɲɛ-pɔmbɔ o kúŋndo nin. Yɔmnde ya hin tingɔɔ nuaa ni, mì kɔ toŋ ɲɛ tɔ̀ kon, mì n de naa po nuu, mì n cal piɔ́mndo cum.»

¹³ Mí Elii mulul ndu aa: «Siòòŋii bii nɔm te, muungu ma kɔ tosa mɛɛ n dimi yɛ. Kɛ nduyɛ, toŋ fɔlɔn dɛɔ ɲɛ-pɔmbɔ mà cuu ya malan n kɔ toŋ niko o celen le niaa po nɔmndo.

¹⁴ Kani Mɛlɛka Hala Israɛlla dimi aa: ‹Háá paale ndu Mɛlɛka tuisinin piɔɔ o lɛŋnden coo len, kpeyanndo cuunin o bonyii o co nin-nde nin te, cuɛiyan bɛɛ ma cuunin o kúŋndo nin te.›»

¹⁵ O kon, mí cuaa kɔa, mó kɔ tosa mɛɛ Elii dimul ndu yɛ. Mí ɲɛdiaa kpuula nda o ba, má lo ndu dioo háá le telen vilɛi, ndu pila, yungu ndɔɔ a Elii.

¹⁶ Kpeyan va kon o bonyei nin-ndo cuu le, cuɛima va man vɛlɛ o kúŋndo nin-ndan bɛɛ ma cuu le, mí ɲɔɔ tosan mɛɛ Mɛlɛka ndóò dimi a sondo Elii-o yɛ.

Po vanalanɔ pɔnɔɔ vi-o muungu yoomu

¹⁷ O dɛnnda lan kɔɔli, mí po vanalanɔ yiya kon Elii-o del a nàà kàlà-kálàá, mí nàà kon dɔaw ndu yɛɛvɛ háá mó malnun kɔl.

¹⁸ Mí cua kon ɲuna Elii aa: «Yɛɛ nɛ co yɛ naa tɛɛn naa nɔm? Vɛ̀ɛ̀ le Hala hakila nilan cɔɔmullo n hin nanu ni haliko mi po nuu sɔla piɔ́mndo?»

¹⁹ Mí Elii mulul ndu aa: «Yɔngu vɔ ya po nɔmndo.» Mí ndu Elii cua po kon kala ndɔ o balan coo, mó hel a ndu o cɛi coocoo o va lɔan nin-ndo nin, mó kɔ yambu ndu o kpele ndɔɔ coo.

²⁰ Mó piɛi Mɛlɛka aa: «Mɛlɛka, Hala nuu, vɛ̀ɛ̀ mà cɛl mì mɔnɛi bii cua yiya ya hoo-o le piɔ́m po ndɔɔ?»

²¹ Mí Elii kuumbun poombɔɔ coo leyáá, mó piɛi Mɛlɛka, mó dimi aa: «Mɛlɛka Hala nuu, i tɛɛlun nɔm yandi, mingi pɔmbɔɔ ho yoomoo o milin.»

²² O kon mí Mɛlɛka tuɛi Elii diom, mí poombɔɔ tendul, mó muungu yoomu.

²³ Mí Elii cua niko poombɔɔ, mó toal a ndu, mó kɔ mingul kala ndɔ ndu. Mí Elii dimul ndu aa: «Má cè po nɔmndo! O muungu yoomu.»

²⁴ Mí cua kon dimul Elii aa: «I laalan nihau lekɛ́ndɛi maa vana-tɛɛngaa-diom Hala-o n co ni, toɲaa kpeekpei sɔɛi Mɛlɛka-i co nɔm fulaa o sondo-e co ni.»