1Masaa 16 - BII BILA

¹ Mí Mɛlɛka soaa o Yehu, vana-tɛɛngaa-diom Hala-o, po Hanani-o lo le Baesa sɔɔn mun tɛɛngullo aa:

² «O cundoo nin ya soli nɔm ni, mí siinguu nɔm simlacinɔ Israɛlla kpow, kɛ má kela mɛɛ Yeroboam kela yɛ, má luei yungu nuu, Israɛlla o hakilan nin le ya kɔllo tɛɛmbuuo.

³ Lelan, i co niaa cii o lepola selemenden niaa yungu nɔmndo latulu, mì tosa a niaa mɛɛ ya tosa a yungu Yeroboam, po Nebat-o yɛ.

⁴ O yungu Baesa-o nin kpede, vana-vana hun vu pɛ ciee, tunnda dianin ndu ni, o kɛ́-kɛ̀ hun vu yɛ pɛ yondoo nin, yowva dianin vɛlɛ kon.»

⁵ Sɔɔn tɔ̀un Baesa-on, ɲɛ-ɲɛ o tosa a cɔwla bɛndula o nɔla lan kpow, sɔɔn mun co n'sɛvaa o sɛbɛ Dɛnnda lemasalan Israɛl nin.

⁶ Baesa vuo, má kumbu ndu Tirsa o fonda nda kumbu fuɲaa ndɔa mamaa-o. O kon mí Ela po ndɔ koma sul masaa o fonda ndɔɔ.

⁷ Mí diom Mɛlɛka-o dimulun Baesa nda yungu ndɔɔ fulaa vana-tɛɛngaa-diom Hala-o, Yehu po Hanani-o o sondo le dɛnndan tan tiɔn: dɛnɛ tasoo, le tùú Baesa nda yungu ndɔɔ ndáà tosa ɲɛ hɛnan Mɛlɛka loo, má tɛɛmbuu ndu kɔllo a dɛnnda nda va tosaa maa Yeroboam nda yungu ndɔɔ lan-ndo. Dɛnɛ diinndɔɔ, le tùú Baesa ndóò diw yungu Yeroboam-ndo-o.

Ela siŋnun masa Israɛlla

⁸ O vɔsi bidiin a o ŋɔmpumndɔɔ o masale Asa, masaa Yuda len bɛngu, mí Ela po Baesa-o siŋnun masa Israɛlla kpow. Tirsa o va icali ni, mó tosa masalen vɔsilan tan tiɔn.

⁹ Ela lo mɔiyan kolɔɔ o Arsa vana va bɛ́ɛ̀ lemasaa bollen-ndo lo cɛinin Tirsa lon, mí buɛi ndɔɔ pum, diolan Simri, ó va simlacinɔ kunda tálá vanaa cɔvaa ɲaanun ɲɛla ɲaanannda soa nan-ndan-ndo yii ndu dúmbú.

¹⁰ Mí Simri luɛi, mó dii ndu. O vɔsi bidiin a o ŋɔmmɛwndɔɔ o masale Asa va masaa Yuda-o len bɛngu dɛnɛ kon yɔŋnun ni. O kon kɔɔli, mí Simri kalaa koma sul masaa o fonda ndɔɔ. 23

¹¹ Ndóò siŋnɔnndo dɔ́ɔ́ masaa, mó cal o kpɛŋɛ lemasaa nin, mó diw yungu Baesa-o kpow, vanayan ndɔn a canyan ndɔn, vana-vana o mɛi yoomu le.

¹² Mí Simri cii polale Baesa len diyɔɔ kpede mɛɛ Mɛlɛka ndóò dimi sɔɛi ken a sondo Yehu, vana-tɛɛngaa-diom Hala-o yɛ.

¹³ Kon kpow tosan le tùú Baesa nda Ela po ndɔ ndáà tosa hakilan má mal vɛlɛ Israɛlla o hakilan nin le Mɛlɛka Hala Israɛlla kɔllo tɛɛmbuuo a piɔmaa ndaa fondoa-o.

¹⁴ Sɔɔn tɔ̀un Ela-on a ɲɛ-ɲɛ o tosa kpow, kon co o sɛvaa o sɛbɛ Dɛnnda lemasalan Israɛl nin.

Simri siŋnun masa Israɛlla

¹⁵ O vɔsi bidiin a o ŋɔmmɛwndɔɔ o masale Asa va masaa Yuda-o len bɛngu, mí Simri tosa masalen Tirsa le palɛi ndii ŋɔmmɛw. Nduyɛ, telen kon vanaa cɔvaa Israɛlla kila dɔ́ɔ́ngɔ́ɔ̀ le Kibetɔn, kobi Filistia delɔɔ coo a cɔwvo ni.

¹⁶ Mɛɛ nda tuei maa Simri koma yii masaa dúmbú mó dii ndu, mí nda kpow a cɛlan paale len o dɔ́ɔ́ngɔ́ɔ̀ nin, má suili Ɔmri va simlacinɔ vanaa cɔwva-o masaa Israɛlla coo.

¹⁷ O kon kɔɔli, mí Ɔmri nda vanaa ndɔa cɔwva kpow a faŋan Kibetɔn, má kɔ tiila Tirsa.

¹⁸ Lɔ́ɔ́ Simri ce maa kobio cuu biyɔɔ-o, mó kɔ luɛi o cɛiyo pum nin o bɛ́ɛ̀ lemasaa nin, mó mal yinnden o bɛ́ɛ̀ kalaa, mí ndu pila vu o yinnde len nin.

¹⁹ Kon kpow tosan le tùú Simri ndóò tosa hakilan, mó tosa ɲɛ hɛnan Mɛlɛka loo-o a le tùú ndóò tosa dɛnnda vɔɔnndan maa Yeroboam, mó mal Israɛlla kpow o hakilan nin-ndo.

²⁰ Dɛnnda tɔ̀la Simri lan a dúmbú ndóò yii-o kpow, sɔɔn mun co n'sɛvaa o sɛbɛ Dɛnnda lemasalan Israɛl nin.

²¹ Simri vuo, mí Israɛlla koma piɔvan kundalan tan tiɔn: vanaa tasea ndáà yeema mí Tibni, po Kinat-o ndóò siŋnun masa ndaa, kɛ mí a pilla nda sim Ɔmri kɔɔli.

²² Kɛ o mɛɛlulan, mí vanaa ndáà yeema Ɔmri-a hiaw vanaa ndáà yeema Tibni po Kinat-o-a sɛ́lɔ́ɔ́. Tibni vuo, mí Ɔmri koma siŋnun niko masaa.

Ɔmri siŋnun masa Israɛlla

²³ O vɔsi beleyaa a ò pilɛndɔɔ o masale Asa va masaa Yuda-o len bɛngu, mí Ɔmri siŋnun masa Israɛlla, mó tosa vɛlɛ masalen vɔsilan tɔ́ a latiɔn, o tosa fɔlɔn masalen vɔsilan tan ŋɔmpum Tirsa.

²⁴ O kon kɔɔli, mó kɔa o Semɛr lo, mó piandu pembei Samari volin latámán vàálan tan ŋɔmpum. Mó tangul kobio o pembii ken coo, mó ke ndu diolan aa Samari, kani lende Semɛr, vana ndóò nɔ fonda kon-ndo ndóò nɔ diolan ni.

²⁵ Kɛ mí Ɔmri va ɲɛ hɛnan Mɛlɛka loo tosaa, mó tosa dɛnnda vɔɔnndan hiovɔɔ la masaa tasea kpow tosa lan coo.

²⁶ Mó tosa mɛɛ Yeroboam, po Nebat-o tosa mó mal Israɛlla o hakilan nin má lo piɔmaa ndaa fondoa kan sooloo háá mí Mɛlɛka Hala Israɛlla tuulu kɔl a nda yɛ.

²⁷ Dɛnnda tɔ̀la Ɔmri lan, ɲɛ-ɲɛ ndóò tosa a cɔwla bɛndula o nɔla lan kpow, sɔɔn mun co n'sɛvaa o sɛbɛ Dɛnnda lemasalan Israɛl nin.

²⁸ Ɔmri vuo, má kumbu ndu Samari. Mí Akab po ndɔ koma sul masaa o fonda ndɔɔ.

Akab siŋnun masa Israɛlla

²⁹ O vɔsi beleyaa a o ŋɔmaandɔɔ o masale Asa va masaa Yuda-o len bɛngu, mí Akab, po Ɔmri-o siŋnun masa Israɛlla. Mó tosa masalen Samari vɔsilan bidiin a latiɔn.

³⁰ Kɛ mí ndu Akab, po Ɔmri-o bɛɛ tosa ɲɛ hɛnan Mɛlɛka loo, mó tosa hakilan hiovɔɔ o la masaa tasea kpow a tosa lan coo.

³¹ O hini kɔl le hakila o tosa mó vial Yeroboam, po Nebat-o lan te, kɛ mó mulin, mó kɔ yil Yesabɛl, cua Ɛtbaal va masa Sidɔnnda-o o nɔ̀u nin. O va vɛlɛ piɔmndo Baal sooloo.

³² Mó tangul fonda-loamaa-lasálàá le Baal kon o máán ndóò tangul Samari-o nin,

³³ mó baŋ vɛlɛ yɔm soolaa lon. O kon mí Akab tɛɛmbuu Mɛlɛka Hala Israɛlla kɔllo hiovɔɔ masaa Israɛlaa tosa masalen ndu tase-a kpow coo.

³⁴ O telen kon Hiɛl fula Betɛl-lo mingi Yeriko tangul ni. Kɛ mí diom Mɛlɛka ndóò dimi sindɛ a sondo Yosue, po Nun-ndo-o peelun. Kani o cɛiyo kilaa, mí Abiram po ndɔ tasoo vu. Kandɔɔ vɛlɛ dɔ́ɔ́ koŋndan lueiyo, mí Sekub, po ndɔ diinndɔɔ bɛɛ ndu vu.