1Masaa 14 - BII BILA

Piɔ́m Abiya, po Yeroboam-ndo

¹ O telen kon, mí Abiya po Yeroboam-ndo del a nàá.

² Mí Yeroboam dimul laa ndɔ aa: «A yandi, kaandian ma ven hɔlla, yɔŋii vana sina maa lanɔɔ Yeroboam n co ni, o kon ma kɔɛ Silo. A komalnin Ahiya vana-tɛɛngaa-diom Hala-o lon, ndu dimi sindɛ ni maa i siŋnunnin masaa Israɛlla coo.

³ Kɔ a bululan tɔ́, a dɛɛla toaŋaalan a á hem malɛɔ o ba, mà kɔ luɛi ndu coo. O dimulnin nɔm mɛɛlula nàà poombɔɔ ho.»

⁴ Mí lanɔɔ Yeroboam tosa lende. Mó can, mó kɔa Silo, mó kɔ luɛi o Ahiya lo cɛinin. Tuma kon nin Ahiya ve lɛ cɔ le, kani ndóò yuuva nin taw-taw.

⁵ Kɛ Mɛlɛka ndóò ciinin Ahiya dimul aa: «Lanɔɔ Yeroboam co hunɔɔ nɔm isɔɔ ɲuna le po ndɔ co a naa-o. O hin pɛ, o cɔmnunnin maa vanalanɔ celen, a bii pɛ a mulul ndu mɛɛ o bɛnda yɛ.»

⁶ Mɛɛ Ahiya tuei pelun ndɔn diom le hunɔɔ luɛyɔɔ cɛinin, mó dimi aa: «Lanɔɔ Yeroboam, le yɛɛ n yeema yɛ le tosaa maa vanalanɔ celen n co ni? Luɛi niko, kani i nɔ yoongoo pum le nɔm, kɛ o co yongu kɛndɛ le.

⁷ Muungu, mà kɔ dimul Yeroboam maa diom Mɛlɛka Hala Israɛlla dimi-o co hoo ni aa: ‹I hɛli nɔm caanda tɛɛn, mí siinguu nɔm simlacinɔɔ vanaa nia coo, Israɛlla pɛɛn.

⁸ Mí poonda masalen yungu David-o o ba, mí sɔaa nɔm o ba. Kɛ a tosa maa vana ni baalaa David le, kani ndu mó bii tɔŋnda nilan, mó kela o nɛi nuu coo a kɔl ndɔɔ kpow. Dɛnnda hɛnan ya lan daama o tosa ni.

⁹ Nɔm, a tosa dɛnnda vɔɔnndan hiovɔɔ vanaa tosa masalen nɔm tase-a coo, kani a cownun halaa celen, a co piɔmaa n'cilinnda-a le ya kɔllo tɛɛmbuuo, ma mulul-la kɔɔ.

¹⁰ Lelan, i co hunɔɔ dɛnɛ palaa tuisi yungu nɔmndo coo, mì diw vanpiaandua co o nɔm Yeroboam-ndo cɛinin-nda, o va cɛ piaandu o va hɔ́ɔ́ piaandu. I co hunɔɔ nda basɔɔ o lɛŋnde Israɛl-ten nin selemenden mɛɛ vana basu billo yɛ.

¹¹ Te vana fula o yungu nɔmndo nin-ndo hun vu pɛ ciee, tunnda de ndu, o hun vu pɛ yondoo nin, yowva de ndu.› Mɛɛ nuaa Mɛlɛka dimi ni.»

¹² Mí Ahiya, vana-tɛɛngaa-diom Hala-o hiaw laci a sɔɛi, mó dimul lanɔɔ Yeroboam aa «Lelan, cɔn mà muungu o nɔm ndo. Kɛ a pila dɔ́ɔ́ pɛ pelei ciee, po nɔmndo malnun kɔl.

¹³ Israɛlla kpow a caŋnin ndu ma kumbu ndu, kani ndu pilɛ kpé sɔlanin kumbɔɔ fulaa o yungu Yeroboam-ndo nin ni. O yungu kon nin kpow, ndu koni Mɛlɛka Hala Israɛlla ce dɛnɛ sandaa o kɔl ni.

¹⁴ Mɛlɛka co hunɔɔ masaa kɛsi Israɛlla coo, paale len kpeekpei masa kon co yungu Yeroboam-ndo diw ni, o tamalanin bɛɛ le. Vɛ̀ɛ̀ o co dɛnɛ kon te tiiya hau nuaa le?.

¹⁵ Le piɔmaa nda cownun má tɛɛmbuu Mɛlɛka kɔllo-a, Mɛlɛka lɔaanin Israɛlla, má ɲiiya mɛɛ kpɛ̀ndɛ̀le co o mɛnndan nin-nden le ɲiiya nuaa yɛ. O solinin nda o lɛŋnde kɛndɛ-kɛndɛle ndóò yɔngu fuɲaa ndaa mamaa len nin, mò saŋ nda o pee bɛndoo leeloo.

¹⁶ Mɛlɛka mululnin Israɛlla kɔɔ le haki Yeroboam tosa-o a le malɔɔ o mal nda o hakio nin-ndo.»

¹⁷ O kon, mí lanɔɔ Yeroboam can, mó muungu Tirsa. Mó tiiya o ndu lo bɛɛ, kɛ cuaa dɔ́ɔ́ pelei le lueiyo cɛinin, mí poombɔɔ malnun kɔl.

¹⁸ Má kumbu ndu, mí Israɛlla kpow a tosa biisi ndɔɔ mɛɛ Mɛlɛka ndóò dimi a sondo Ahiya, vana-tɛɛngaa-diom Hala-o yɛ.

¹⁹ Sɔɔn tɔ̀un Yeroboam-ndon, mɛɛ o tosa cɔwlan yɛ a mɛɛ o va masalen tosaa yɛ kpow co n'sɛvaa o sɛbɛ Dɛnnda lemasalan Israɛl nin.

²⁰ Faw-faw, vɔsilan bidiin a latiɔn Yeroboam tosa o masalen ni malan o vu. O kon, mí Nadab po ndɔ koma sul masaa o fonda ndɔɔ.

Roboam siŋnun masaa Yuda

²¹ Roboam, po Salomɔn-ndo ndóò nɔ vɔsilan belehiɔɔlu a ò pilɛ, mó siŋnun masaa Yuda. Mó tosa masalen vɔsilan tɔ́ a laŋɔmmɛw Yerusalɛm, kobi Mɛlɛka ndóò hɛli kon o polama Israɛlla tɛɛn, mí ndóò cɔmnun vanaa ndɔa lon-ndo pɛɛn. Naama kalaa Roboam ndóò nɔ diolan ni, Amɔnnɔɔ o va ni.

²² Vanaa fula o polale Yuda len nin-nda ndáà tosaa ɲɛ hɛnan Mɛlɛka loo, má tɛɛmbuu Mɛlɛka kɔllo a hakila ndalan hiovɔɔ o la fuɲaa ndaa mamaa va tosaa lan coo.

²³ Mí nda bɛɛ tangul tombon a powta sálàlan, má toosiaa sungbuma soolan o pembon kpow tullo a o yɔmii kiyɛiye kpede bɛngu.

²⁴ Hali vanaa va o kaannde suundaa len-nda, a va o lɛŋnde len nin. Má kɔ vow balan o dɛnnda vɔɔnnda kɛ́-kɛ̀ vanaa-mangalaa-isɔaa Mɛlɛka ndóò tow Israɛlla laci-a va tosaa lan nin.

²⁵ Vɔsi Roboam suili vɔsilan laŋuɛɛnu o masalen-ndo, mí Sisak masaa Esipte kɔ del Yerusalɛm coo a cɔwvo.

²⁶ Mó cua bolofaa va o Cɛi-Mɛlɛka-o nin-ndo a o va o cɛi masaa nin-ndo. Mo cua ɲɛ-ɲɛ va lon kpow, mó cua kɔ̀ɔ̀la cɔwla n'sianila Salomɔn ndóò cɔw lan.

²⁷ Mí masaa Roboam cɔaw kɔ̀ɔ̀la cɔwla celen a daɲan, mó yɔngu simlacia vanaa cɔvaa va diola luɛyaala bɛ́ɛ̀ lemasaa kandaa-a.

²⁸ Nduyɛ telen oo telen masaa ndóò cɛn pɛ kɔlan o Cɛi-Mɛlɛka-o nin, vanaa cɔvaa va diola luɛyaala bɛ́ɛ̀ lemasaa kandaa-a ndáà kɔɛ a lan, o kon kɔɔli, ndáà mingi vɛlɛ lan nɛɛ la va kan-nda.

²⁹ Sɔɔn tɔ̀un Roboam-ndon a ɲɛ-ɲɛ o tosa kpow co o sɛvaa o sɛbɛ Dɛnnda lemasalan Yuda nin.

³⁰ Kabi masindɛ, cɔwvo tuŋ va Roboam nda Yeroboam tɛɛn ni.

³¹ Roboam vuo, má kɔ kumbu ndu o fonda ndáà kumbu fuɲaa ndɔa-o, o Kobi David-o nin. Amɔnnɔɔ kala ndɔ va ni, diola ndɔlan aa Naama. Mí Abiyam po ndɔ koma sul masaa o fonda ndɔɔ.