1Masaa 10 - BII BILA

Masa laandu fula Saba-o kɔɛ Salomɔn yilɔɔ

¹ Mɛɛ masa laandu va o lɛŋnde Saba len nin-ndo tuei Salomɔn tɔ́ɔ́ le kɔlkalu Mɛlɛka ke ndu-o, mó yiyan le kɔlan ndu kɔlɔɔ solio a ɲuuniaala kàlà-kálàlan.

² Mó can, mó dovi ɲɛm cun kɛndɔn, sianion taw a powta báà kàlà-kálàlan ɲɔɔmɛɛa o lakɔɔ, mó cua vɛlɛ buɛyaa ndɔa sɛ́lɔ́ɔ́ taw, mó kɔa a nda kɔɔli Yerusalɛm. Mɛɛ o tiiya o Salomɔn ndo, mó ɲuuniaa ndu sɔɔn ndóò nɔ o kɔl le ndu ɲuuniaa-on kpow.

³ Mí Salomɔn mulul ndu ɲuuniaala lan kpede, o pilɛ bɛɛ o mɛi le tɛɛsiaa le.

⁴ Mɛɛ cuaa ho tuei mulila kɔlkalula Salomɔn-ndan, mó ca cɛi ndóò tangul-lo,

⁵ ɲɛdiaa va dionnɔnndo o Salomɔn ndo cɛinin-ndo, cɛila vanaa ndɔa baalaa va nin-ndan, volɔɔla va vanaa va mɔiyan toosiaa le ndu yɔngoo-a ndáà nɔ lekɔɔ lan a sálàla loamaala ndóò soli o Cɛi-Mɛlɛka-o nin-ndan kpede, mó hilul.

⁶ Mó dimul masaa Salomɔn aa: «Toɲaa kpeekpei ɲɛ yáà tuei a nɔm pila o kɔɔ a á kɔlkalu nɔmndo o kɔɔ-o co ni!

⁷ Yáà laalan ndɔ sɔɛi ken te, fɔ hunɔɔ ya pila hin hoo mí ca a lehɔl-lo. Ɲɛ ndáà dimul-la-o tiiya bɛɛ hali tálá ɲɛ ya hun cɔ a lehɔl-lo le. Kɔlkalu nɔmndo a bolofaa nɔmndo hiow bɔɔ o ndáà dimul-la-o polon!

⁸ Mbɔ̀ vanaa nɔmnda a vanaa nɔmaa baalaa pɛl tɔnɔ bɛndu! Kani lepalaa-lepala a co nɔm o hɔl má va nɔm nilan yaŋɔɔ, a co kɔlkalu nɔm bɛndoo tueyɔɔ tuŋ.

⁹ Màá Mɛlɛka Hala nɔmndo sɔla biiloo le hɛli o hɛli nɔm, mó suili nɔm masaa Israɛlla coo-o! Kani le tùú Mɛlɛka kaola Israɛlla taw-vo o suili nɔm masaa le dɛnɛ sandaa tosaa a le yamɛi caa kiolɔɔ nda coo le fɛɛn a fɛɛn ni.»

¹⁰ O kon, mó cua sianion kilolan vàálan tan yáá a kɛmɛ leŋuɛɛnu, cuɛima cun kɛndɛan taw a powta báà kàlàlan, mó ke masaa. Kabi paale len, vana hin-ndɛ a cuɛima súú vaa lende o lɛŋnde Israɛl-ten nin maa ma masa laandoo Saba yɔngu ɲinkon Salomɔn-ndan te.

¹¹ Dɛ̀ndɛ̀la mamɛnnda Hiram ndóò yɛɛ Ofir lan láà hin a sianion, pɛngɛn yɔm santal taw a á powta báà kàlàlan ni.

¹² Mí masaa Salomɔn toosiaa ɲɛ sɛɛŋanndo pum o pilɛ le Cɛi-Mɛlɛka-o a pɛngɛn yɔm santal mun, mó toosiaa vɛlɛ o pilɛ le cɛi lemasaa. Mó toosiaa bondomalan a bangalan a pɛngɛn pilɛn mun le vanaa solia n'condua. Cɔn nin a telen kon háá paalen nden, vana ci lɛ yɔmii bɛndui súú vaa lende hunɔɔ o lɛŋnde Israɛl-ten nin te.

¹³ Ɲɛ-ɲɛ masa laandu óò fula kon Saba-o fula lehɔl, mí masaa Salomɔn ke ndu kpede. Mó mulin mó ke ndu vɛlɛ ɲɛm celen, n masaa Salomɔn daama ndóò nɔla ndu keo-von. O kon kɔɔli, mí masa laandu kon muungun a buɛyaa ndɔa o lɛŋnde ndɔlen nin.

Bolofaa Salomɔn-ndo

¹⁴ O vɔsi oo vɔsi nin, sianion kilolan vaalan bidiin ndáà cuu Salomɔn Yerusalɛm ni,

¹⁵ handɔɔ o mulu ndóò bii vanaa hun a vɔngulan o lɛŋnden nin-nda a yulaa o ba-o coo, handɔɔ niko o mulu masaa n'bungaa ndáà bii mialla o ba-o coo.

¹⁶ Mí masaa Salomɔn cɔaw kɔ̀ɔ̀la cɔwlan kɛmɛ lediin a sianin fɛtufɛton, mó teengiaa mun kilolan tan ŋɔmpum le o kɛ́-kɛ̀ cɔwva.

¹⁷ Mó cɔaw vɛlɛ kɔ̀ɔ̀la cɔwla pɔmbɔla n'sianilan kɛmɛ leyáá. Sianion kiloo ndu pilɛ a tálá ndóò lɔɔ le o kɛ́-kɛ̀ toosiaa ni. O kon, mí masaa kɔ kɛsi lan o Cɛiyo-Bundɔɔ-Liban nin.

¹⁸ Mó cɔaw vɛlɛ kpɛŋɛ lemasa bɛndoo a ciŋun kamaa, mó yikpa ndu a sianin diandan.

¹⁹ Helɔɔlan tan ŋɔmpum la va o kpɛŋɛ kon ni, fonda kɛsiaa kɔɔ va o kpɛŋɛ kalaa coo-o va o tiilanndo tiw. Nɛɛ kɛsiaa ladunnda va kpengeí a kpengei pilɛi. Yàlàá nda ŋiɔn a va a sialaa o kpengun miuŋun kpɛŋɛ kalaa, a va isisi, kpengeí o pilɛ kpengei pilɛi o pilɛ.

²⁰ Yàlàá tɔ́ a à ŋiɔn a va vɛlɛ a sialaa o helɔɔla ŋɔmpumnda lan coo, a va isisi, a ŋɔmpum o ba mɛllo coo, a ŋɔmpumnda pilla o ba kɛndɔɔ coo. Kabi bɛɛ dɛnɛ súú vaa lende tosan-ndɔ o masale kɛ́-kɛ̀ nin te.

²¹ A sianion ndáà cɔw taalala kólaala Salomɔn-ndan kpow ni, má toosiaa vɛlɛ ɲɛm-laandun va o Cɛiyo-Bundɔɔ-Liban nin-ndon kpow a sianin diandan, o kɛ́-kɛ̀ cownun a n'voli le. Bau telen Salomɔn va masaa-o, vannda ndáà ci mun ɲɛ sɔvɛ taw le.

²² Kani masaa Salomɔn ndóò nɔ dɛ̀ndɛ̀la bɛndula mamɛmnda fula Tarsis lan o mɛmma ihɛllan coo, dɛ̀ndɛ̀la mamɛnnda Hiram-ndan la va vɛlɛ ndu o ba. O vɔsila yaa oo vɔsila yaa bɛngu, dɛ̀ndɛ̀la fula Tarsis lan la va hunɔɔ lapiaalan ca a sianion, a volion, a ciŋun kamaa, a tɔmnda a á yovaa kɛndɛ-kɛndɛa pum.

²³ Masaa Salomɔn ndóò hiow masaa va o lɛŋnden coo-a kpow bolofaa a kɔlkaloo.

²⁴ Lelan vannda o lɛŋnden kpow coo ndáà yeema le ndu cɔu a le nilan yaŋɔɔ o kɔlkalu ndɔɔ, kani Hala ndóò vow ndu kɔlkalu kon o kɔl ni.

²⁵ Vɔsi oo vɔsi, vannda va kɔlan a ɲɛm cɔwnun a volion-ndon, n cɔwnun a sianion-ndon, volɔɔla cuɛinanndan, ɲɛm cɔwvon, ɲɛm cun kɛndɔn, soa piaandua, te kon te milɛɛa o Salomɔn ndo.

²⁶ Mí Salomɔn cuungiaa ɲɛla ɲaanannda soa nan-ndan vàá pilɛ a kɛmɛ lehiɔɔlu, soa vaalan tɔ́ a latiɔn, mó manda a pum ndu ikɛi Yerusalɛm, mó yaa a pilla o kobila yɛ́-yɛ́la ndóò bɛɛndiaa le nda mandaa lan nin.

²⁷ Mó tosa mí volion kui Yerusalɛm maa lapow, mí yɔmii sɛɛdrei muungu mɛɛ buumbuue vul o dɛɛlalan nin nuaa yɛ.

²⁸ Esipte a Silisii soa Salomɔn-nda va cɔnɔnndo ni. Yulaa ndáà kɔɛ pɛ Silisii, ndáà pendu soa ndaa.

²⁹ A va ɲɛ ɲaanan soa nan-ndo pilɛ piondɔɔ Esipte volin latámán kɛmɛ leŋɔmpum, sow o pilɛ támálan kɛmɛ a beleŋuɛɛnu. Yulaa pilɛa kan koni ndáà yoo vɛlɛ masaa Hitiia a masaa Aramiia ɲɛm mun le piondɔɔ ni.